Sibona oi nanadaia: ‘Haida idia laloa lau be laloa maoromaoro, ma haida edia ura lau abia dae bona haida edia kara lau haheaukalaia tauna, a? Eiava lau be kara auka bona haida edia hemami lau laloa lasi tauna, a? Lau ese haida edia lalohadai lau kamonai henia bona lau abia dae, a?’ Bema laloa maoromaoro karana ita habadaia, ita hahedinaraia Iehova bona Iesu ita tohotohoa noho. Laloa maoromaoro ita hahedinaraia diba, bema iseda noho dalana ia idau bona senisi haida do ita karaia. Iseda noho dalana ia idau neganai, unai ese hekwakwanai matamata ia havaraia diba. Hegeregere, reana gorere badana ta ita davaria, iseda moni ia ore, eiava gavamani ia senisi dainai hekwakwanai haida idia vara. (Had. 9:11) Danu, iseda hesiai gaukara ai asainmen idia haidaua karana ese ita ia tohoa diba. Noho dalana matamatana ita manadalaia diba bema inai dala foa ita badinaia: (1) ia vara gauna oi abia dae, (2) vaira negana oi laloa, (3) idia vara gau namodia oi moalelaia, bona (4) ma haida oi durua. w23.07 rau 21-22 par. 7-8

Peroveta tauna Daniela be mero matamata neganai, tuari taudia ese idia abia bona Babulonia dekenai idia laohaia. To gavamani taudia idia itaia Daniela ena ‘tauanina bona toana be namo herea’ bona ia be lohia besena amo ia mai. (1 Sam. 16:7) Unai dainai, idia ese King ena ruma ai do ia gaukara totona idia hadibaia. (Dan. 1:​3, 4, 6) Iehova ese Daniela ia lalokau henia badina unai mero matamata ese abia hidi ia karaia Iehova do ia badinaia. Daniela ena mauri lagani be 20 bamona neganai, Iehova ia gwau ia be kara maoromaoro tauna Noa bona Iobu bamona—idia ruaosi be lagani momo lalonai Iehova idia hesiai henia. (Gen. 5:32; 6:​9, 10; Iobu 42:​16, 17; Ese. 14:14) Oibe, Daniela be lagani momo lalonai mai abidadama ida hesiai gaukara ia karaia bona Iehova ese ia lalokau henia.—Dan. 10:​11, 19. w23.08 rau 2 par. 1-2

Ruma ta oi hoia totona abia hidi oi do karaia lasi neganai, oi ura hoia rumana ena kahana ibounai oi sekea. Baibel ita duahia bona stadilaia neganai, unai bamona ita karaia diba. Bema oi duahia haragaharaga, hahediba hereva badadia sibona do oi dibaia, unai be “Dirava ena hereva amo hahediba hereva ginigunadia.” (Heb. 5:12) To, ruma ena kahana ibounai oi sekea namonamo hegeregerena, Baibel oi stadilaia namonamo bona lalopararalaia be namo. Dala namona ta be, oi tahua edena dala ai Baibel ena kahana idauidau be gau tamona idia herevalaia. Danu, oi hekwarahi oi abia dae hereva momokanidia oi lalopararalaia, bona oi tahua dahaka dainai idia be hereva momokani. Baibel ibounai ita lalopararalaia totona, ena hereva momokani dobudia ita diba be namo. Aposetolo Paulo ese Keristani tadikaka taihu ia hamaoroa Dirava ena Hereva do idia stadilaia namonamo, unai amo hereva momokani “ena lababa, ena lata, ena ataiai, bona ena dobu do [idia] lalopararalaia momokani.” Unai amo edia abidadama be “badina aukana latanai do [ia] gini goada.” (Efe. 3:​14-19) Ita danu be unai bamona do ita karaia. w23.10 rau 18 par. 1-3