LALOHEKWARAHI HANAIA DALANA

Lalohekwarahi be Do Ia Ore

Baibel ena aonega herevadia ese ita ia durua diba lalohekwarahi idia havaraia anina lasi gaudia ita dadaraia totona. Ita sibona ese lalohekwarahi idia havaraia gaudia idauidau ita haorea diba lasi. To iseda Havaraia Tauna ese ia haorea diba. Danu ia ese tau ta ia abia hidi ita do ia durua totona. Ia be Iesu Keriso. Guna tanobada ai ia noho neganai ia karaia gaudia bamona, kahirakahira tanobada hegegemadai ai gau namodia momo do ia karaia. Hegeregere:

IESU ESE IA HAHEDINARAIA BAMONA, GORERE DO IA HANAMOA.

“Gorere dainai idia hisihisi bada taudia . . . , be ia dekenai idia abia lao bona ia hanamodia.”—MATAIO 4:24.

IESU ESE TAUNIMANIMA MOMO TOTONA RUMA BONA ANIANI DO IA HENIA.

“Idia [Keriso ese do ia lohiaia taudia] ese edia ruma do idia haginia, bona unai ruma lalonai do idia noho. Idau taudia ese edia ruma do idia abia lasi. Bona idia ese vain umadia do idia hadoa, vadaeni vain ena anina, uaina do idia inua. Idau taudia ese edia uaina do idia inua lasi.” —ISAIA 65:21, 22.

IESU IA LOHIA NEGANAI, TANOBADA AI MAINO BONA NOHO NAMO DO IA VARA.

“Lau ura king ena mauri dinadia ibounai lalonai, iena bese taudia ese kara maoromaoro do idia karaia, bona edia noho be namo, bona edia gaukara ena anina do idia abia, hua ese iena diari ia henia dinadia ibounai. King ena basileia be mani do ia bada, davara ta dekena amo ela bona ma davara ta, Euperate Sinavai dekena amo ela bona tanobada ena dokona dekenai. . . . idia dagedage taudia ese, iena vairanai do idia moru diho, edia kwaradia be tano dekenai do idia atoa.”—SALAMO 72:7-9.

IESU ESE KARA GAGEVA DO IA HAOREA MOMOKANI.

“Ia ese manoka taudia, bona ogogami taudia dekenai do ia bogahisihisi, bona gau lasi taudia be mase dekena amo, ia ese do ia hamauria. Bema unai ogogami taudia, be haida ese idia dagedage henia neganai, king ese unai ogogami taudia do ia hamauria.”—SALAMO 72:13, 14.

IESU ESE HISIHISI BONA MASE DO IA HAOREA DANU.

“Mase be do ia ore, bona lalohisihisi, taitai, bona hisihisi danu be do idia ore.”—APOKALUPO 21:4.

“LALOHEKWARAHI BADADIA DO IDIA VARA”

“Hari tanobada be lalohekwarahi, laloa momo, lalohisihisi, bona hisihisi amo ia honu, guna bamona lasi.”—⁠Mohamed S. Younis, Gallup managing editor.

Dahaka dainai lalohekwarahi ia vara noho? Baibel ese haere maorona ia henia. 2 Timoteo 3:1 ia gwau: “Nega dokona ai . . . lalohekwarahi bona hekwakwanai badadia do idia vara.” (The Amplified Bible) Baibel ese lalohekwarahi ia vara momo ena badina ia gwauraia neganai, taunimanima edia kara dikadia ia herevalaia. Hegeregere, mataganigani, hekokoroku, tomadiho idauidau edia kara koikoidia, dagedage taudia, ruma bese lalonai lalokau be lasi, bona sibona idia biagua lasi. (2 Timoteo 3:2-5) Iesu Keriso be Dirava ena Basileia—guba gavamani unai—ena King ai ia lao neganai, dina gabedia do ia haorea.—Daniela 2:44.