Hereva Gwauraia Goevagoeva

OI HEREVA namonamo totona hereva oi gwauraia goevagoeva. Reana oi herevalaia gauna be mai anina bada bona idia ura kamonai, to bema idia lalo-pararalaia haraga lasi, ena anina do ia boio.

Idia lalo-pararalaia lasi herevana ese taunimanima ia hagoadaia lasi. Ena be tau ta ena gado regena ia bada bona idia kamonai be auka lasi, to bema hereva ia hedinarai goevagoeva lasi, do idia badinaia lasi. Unai be hegeregere, kamonai taudia idia lalo-pararalaia lasi gado idauna ai ia hereva. (Ier. 5:15) Baibel ese ita ia hamaoroa: “Tuari kibi bema idia hiriria namonamo lasi neganai, daika ese tuari totona do ia hegaegae? Unai bamona danu, bema umui emui hereva anina be idia hedinaraia lasi, daika ese hereva ena mamina do ia abia?”​—1 Kor. 14:​8, 9.

Dahaka Dainai Hereva Idia Hedinarai Goevagoeva Lasi? Reana uduna oi kehoa namonamo lasi. Bema aukina masolo idia goada bona udu bibina idia mareremarere momokani lasi, hereva idia hedinarai goevagoeva lasi.

Bema oi hereva haraga emu hereva idia lalo-pararalaia be auka. Unai be hegeregere idia rekodia herevana be sipidi bada ai oi gadaralaia. Hereva ibounai idia noho, to namo idia havaraia lasi.

Nega haida, hereva idia hedinarai goevagoeva lasi, badina uduna eiava hereva halasia kahadia ma ta be mai ena dika. To unai bamona hekwakwanai idia haheaukalaia taudia danu ese inai karoa lalonai idia noho gaudia idia badinaia neganai edia hereva idia hanamoa diba.

To, nega momo ta ena hereva ia hedinarai goevagoeva lasi bona idia lalo-pararalaia be auka, badina hereva momo ia gwauraia tamona. Reana hereva edia kahana, leta, eiava dokona ia reaia danu. Ta ese hereva ia gwauraia hebou kava neganai, kamonai taudia ese lalohadai haida idia kamonai to haida idia kamonai lasi. Ta ese hereva ia gwauraia goevagoeva lasi neganai, ia hadibaia namonamo be auka.

Hereva Goevagoeva Dalana. Hereva oi gwauraia goevagoeva totona emu gado ai hereva idia hakapua dalana oi lalo-pararalaia be namo. Gado momo ai, hereva be mai edia kahana maragidia. Unai kahana maragidia lalonai be leta ta eiava haida bona idia oi gwauraia hebou be namo. Unai bamona gadodia ai oi hereva neganai unai kahana ta ta oi gwauraia be namo, ena be ibounai oi gwauraia edia siahu be tamona lasi. Bema oi ura emu hereva ia goevagoeva, oi hereva metairametaira bona hereva edia kahana ta ta oi gwauraia toho. Reana matamanai emu hereva ena toana be idau, to oi karaia loulou neganai, emu hereva do ia namo. Oi hereva namonamo totona reana hereva haida oi gwauraia tamona, to namona be unai oi karaia lasi bema unai ese hereva edia anina ia hunia.

Inai oi laloa: Hereva gwauraia goevagoeva karana hanamoa totona reana oi hereva bona duahiduahi neganai, oi karaia goevagoeva momokani. To namona be hanaihanai unai bamona oi hereva lasi. Badina ena mamina be oiemu hereva dalana amo do ia idau.

Bema emu gado regena ia bada lasi, emu kwarana oi abia isi bona emu aukina be kemena amo oi kokia. Baibel oi duahia neganai, buka be ataiai sisina oi dogoatao, unai amo emu matana oi hamarerea sisina sibona kamonai taudia bona emu Baibel oi itaia totona. Unai neganai, gau ta ese oiemu hereva gwauraia namonamo karana ia koua lasi.

Emu masolo hamanokaia dalana oi dibaia neganai, emu hereva ia namo ia lao. Momo idia diba emu vairana ena masolo eiava emu hahodi idia biagua masolo idia auka neganai, emu hereva dalana idia hadikaia diba. Unai bamona masolo aukadia ese emu lalona, hereva halasia kahadia, bona hahodi biagua kahadia idia gaukara hebou dalana idia hadikaia diba.

Aukina masolo idia manoka be gau badana, harana ese ia hadibaia hegeregerena ia marere namonamo totona. Namona be udu bibinadia idia manoka danu. Namona be idia mareremarere haraga, uduna bona aiona dekenai ia vara rege ibounai idia hanamoa totona. Bema aukina bona udu bibinadia idia auka, uduna ia kehoa namonamo lasi bona gado regena be isena edia huana amo ia mai. Unai dainai gado regena do ia auka, ia bada lasi, bona ia hedinarai goevagoeva lasi. To, aukina bona udu bibinadia oi hamanokaia neganai, hereva gwauraia kava lasi. Unai oi karaia bona nega tamona hereva oi gwauraia goevagoeva.

Oiemu kara oi itaia totona namona be oi duahia badabada. Hereva halasia kahadia namodia oi gaukaralaia dalana oi itaia namonamo. Oiemu uduna oi kehoa namonamo, gado regena ia lasi namonamo totona, a? Namona be oi laloatao, malana sibona ese hereva ia halasia lasi, ena be oi gaukaralaia bada. Aiona, aukina, udu bibinadia, vairana ena masolo, bona aiona ena masolo iboudiai idia gaukara hebou. Oi hereva neganai, toana be emu vairana ia mareremarere lasi, a? Bema unai bamona, reana emu hereva idia hedinarai goevagoeva lasi.

Bema rekoda masini oi abia, oi sibona emu hereva dalana ai oi haroro bamona oi hereva, bona sibona emu gado regena oi rekodia. Unai bamona hereva be miniti haida lalonai oi rekodia. Oi rekodia gauna oi kamonai neganai, oi itaia bema hereva haida oi gwauraia goevagoeva lasi. Oi kamonai bema hereva be uduna lalonai oi gwauraia bamona, gau ta ese emu gado regena ia hamaragia, eiava hereva edia kahana haida oi reaia, bona unai ena badina oi tahua. Reana unai manoka gaudia oi hanamoa diba bema ataiai idia noho herevadia oi badinaia.

Emu hereva gwauraia dalana be mai ena dika ta, a? Emu uduna oi kehoa namonamo, guna bamona lasi, bona mani hereva oi gwauraia maoro. Oi hahodi neganai baragi oi hahonua, bona oi hereva metairametaira. Edia hereva dalana be mai ena dika taudia momo be unai idia karaia bona edia hereva gwauraia goevagoeva dalana idia hanamoa. Bema leta s dainai oi hekwarahi, oi gwauraia neganai emu malana be emu isena amo oi veria. Ena be unai ese emu hekwakwanai ia kokia momokani lasi, to oi lalo-hekwarahi lasi. Oi laloatao Iehova ese Mose, ena hereva dalana be reana mai ena dika ta, ia abia hidi Israela taudia bona Aigupito ena Farao dekenai hadibaia hereva mai anina bada ia gwauraia totona. (Eso. 4:​10-12) Bema oi ura, ia ese oi do ia gaukaralaia danu, bona emu haroro gaukara do ia hanamoa bona do oi kwalimu.