Gari Lasi Toana

HEREVA henia tauna be ena hereva hamatamaia totona ia toreisi neganai gari mamina ia abia diba, bona bema nega momo hereva ia henia lasi reana ia gari bada. Pablisa be haroro dinana ai ia hereva negadia ginigunadia lalonai reana ia gari. Iehova ese peroveta gaukarana totona Ieremia ia abia hidi neganai, Ieremia ia gwau: “Lohiabada Dirava e, lau be hereva dalana lau diba lasi, lau be mero sibona.” (Ier. 1:​5, 6) Iehova ese Ieremia ia durua, bona oi do ia durua danu. Gabeai, gari lasi toana oi hahedinaraia diba.

Ia gari lasi hereva henia tauna ia lalo-maino. Unai lalo-maino be ena tauanina ena toana ai ia hedinarai. Ia gini dalana ia idau lasi bona ia maoro. Mai badina dainai ena imana ia hamarerea. Ena gado regena ia biagua namonamo bona ia ese anina ia hahedinaraia.

Reana oi mamia unai gari lasi toana oi hahedinaraia lasi, to emu kara oi hanamoa diba. Edena bamona? Namona be hereva henia tauna ia gari bona unai ena toana ia hahedinaraia ena badina ita laloa. Reana ena tauanina ese unai mamina ia havaraia.

Bema gau ta oi ura karaia namonamo to oi diba lasi do oi kwalimu eiava, do oi lalo-hekwarahi. Unai dainai, harana ese tauanina ia hadibaia adrenalin do ia havaraia bada. Adrenalin ia bada dainai reana emu kudouna ia gaukara haraga, oi hahodi haraga, varahu ia diho, bona reana emu imana, tuina, bona gado regena idia marere danu. Emu tauanina ese emu goada ia habadaia dalana amo oi ia durua toho, oi ura karaia gauna dekenai oi kwalimu totona. Namona be unai goada ibounai ese oi ia durua, do oi laloa namonamo bona mai ura bada ida do oi hereva.

Lalo-Hekwarahi Hamaragia Daladia. Oi laloatao taunimanima ibounai be lalo-hekwarahi mamina idia abia diba. To, gari lasi toana oi hahedinaraia totona emu lalo-hekwarahi oi hamaragia bona mai lalo-maino ida oi kara be namo. Edena bamona unai oi karaia diba?

Oi hegaegae namonamo. Emu hereva hegaegaelaia totona nega oi atoa. Oi hamomokania do oi herevalaia gauna oi lalo-pararalaia namonamo. Bema do oi herevalaia gaudia be oi ese do oi abia hidi, unai gaudia dekenai kamonai taudia edia diba bona emu tahua gauna oi laloa. Unai ese oi ia durua, mai anina bada gaudia oi abia hidi totona. Bema matamanai unai oi karaia be auka, ia manada hereva henia tauna ida oi herevalaia. Ia ese oi ia durua diba, do oi herevalaia gauna bona kamonai taudia oi laloa namonamo totona. Bema do oi herevalaia gauna oi lalo-pararalaia namonamo bona oi diba kamonai taudia do ia durua bada, oi ura bada unai gauna do oi herevalaia bona unai ura ese emu lalo-hekwarahi mamina do ia hanaia.

Emu hamatamaia herevadia oi laloa namonamo. Do oi gwauraia dalana oi diba namonamo. Emu hereva oi hamatamaia murinai, emu gari be do ia maragi ia lao.

Haroro gaukara totona oi hegaegae be unai bamona danu. Do oi herevalaia gauna sibona lasi, to do oi haroro henia taudia idauidau oi laloa danu. Emu hamatamaia herevadia oi palanilaia namonamo. Idia manada pablisa taudia edia diba amo heduru oi abia.

Reana oi laloa taunimanima vairanai hereva oi henia neganai bema maniuskrip oi gaukaralaia, gari lasi toana do oi hahedinaraia diba. To, reana unai ese hereva oi henia negadia ibounai emu lalo-hekwarahi ia habadaia. Momokani, hereva henia taudia haida be hereva momo bona haida be hereva haida sibona idia torea. To oi laloa gauna do ia hamaoromaoroa bona emu lalo-hekwarahi do ia hamaragia gauna be pepa dekenai idia noho herevadia lasi to emu kudouna ai oi abia dae lalohadai, anina be oi diba momokani kamonai taudia totona oi hegaegaelaia herevadia be mai anina bada.

Emu hereva oi tohoa neganai, gwauraia badabada. Unai bamona oi karaia dainai do oi diba emu lalohadai be hereva amo oi hahedinaraia diba. Oi karaia loulou neganai, emu harana ai lalohadai edia dala idauidau idia vara bona emu hereva do oi henia neganai idia oi davaria lou. Oi karaia loulou neganai, hereva oi henia momokani bamona oi karaia. Emu lalona ai kamonai taudia oi itaia. Teibolo kahirakahira oi helai eiava oi gini, emu hereva oi henia momokani neganai do oi karaia bamona.

Iehova oi guriguri henia oi ia durua totona. Unai bamona guriguri do ia haere henia, a? “Dirava ita abidadama henia dainai, ita diba momokani, bema gau ta iena ura hegeregerena ita noia neganai, ia ese ita dekenai do ia kamonai.” (1 Ioa. 5:14) Bema oi ura Dirava oi hanamoa bona taunimanima oi durua, iena Hereva amo heduru idia abia totona, oiemu guriguri do ia haere henia momokani. Unai oi diba dainai, goada oi abia emu hereva oi henia totona. Danu, lauma helaga ena huahua​—lalokau, moale, maino, manau, bona tauanina ena ura koua karana—oi habadaia neganai, emu lalona do ia hegeregere gari lasi toana oi hahedinaraia totona.​—Gal. 5:​22, 23.

Oi manada. Bema haroro gaukara oi karaia goadagoada, emu gari do ia maragi. Bema kongregesen ena hebou dekenai haere momo oi henia, ma haida vairanai oi hereva be do ia auka lasi. Kongregesen ai oi henia herevadia idia momo idia lao lalonai, reana hereva ta ta oi henia gwauraia neganai oi mamia lalo-hekwarahi do ia maragi ia lao. Oi ura nega momo hereva oi henia, a? Sikuli dekenai ma haida ese edia hereva idia henia diba lasi neganai, edia kahana oi karaia.

Ataiai idia noho sisiba oi badinaia murinai, heduru do oi abia bema lalo-maino lasi ena toana idauidau oi diba. Bema unai toana bona koua daladia oi diba, oi hereva neganai gari lasi toana do oi hahedinaraia diba. Unai toana be tauanina eiava gado regena amo idia hedinarai.

Tauanina. Gari lasi toana, eiava gari toana, be tauanina amo bona imana oi gaukaralaia dalana amo idia hedinarai. Emu imana oi laloa guna. Bema imana be doruna kahanai oi dogoatao, kahana kahana ai oi atoa auka, eiava podium oi dogoatao auka; bema poketi lalonai oi atoa vareai bona oi kokia loulou, kouti ena pitopito oi atoa bona kokia loulou, bona vairana, udu baubau, eiava emu pepa oi dogoatao kava; bema hora gauna, pensolo, rini, eiava pepa oi hamarerea loulou; bema imana oi gaukaralaia namonamo lasi​—unai ibounai be gari toana idia hahedinaraia.

Lalo-maino lasi ena toana ma ta be emu aena oi hamarerea loulou, emu tauanina be kahana kahana dekenai oi hamarerea loulou, oi gini auka momokani, oi gini namonamo lasi, malana amo udu bibinadia oi haparia loulou, gau ta oi hadonoa loulou bamona, bona oi hahodi haragaharaga bona sisina sisina.

Unai gari ena toana idauidau oi biagua diba bema mai emu lalona ibounai ida oi hekwarahi. Idia ta ta do oi hanaia toho. Hekwarahi gauna ta oi abia hidi, bona koua dalana oi laloa guna. Bema unai bamona oi hekwarahi, emu tauanina ese gari lasi toana do ia hahedinaraia.

Gado Regena. Emu gado regena ena tiuni be ataiai momokani eiava ia mareremarere neganai, gari toana ia hahedinaraia. Reana gadona hanamoa loulou totona oi huahua eiava oi hereva haragaharaga. Unai hekwakwanai bona oi karaia loulou karadia oi koua diba bema oi gaukara goada emu gado regena oi biagua totona.

Bema oi gari, platfom dekenai oi do lao lasi neganai, nega rua eiava toi oi hahodi vareai badabada. Tauanina ena masolo ibounai idia manoka be namo. Emu gari oi laloa lasi, to oi hegaegaelaia gaudia be kamonai taudia dekenai oi ura hahedinaraia ena badina oi laloa. Oi hereva gwauraia neganai, nega sisina kamonai taudia oi itaia, lalo-namo toana ia hahedinaraia tauna ta oi abia hidi, bona oi kiri. Hamatamaia herevadia oi gwauraia metaira, bena emu hereva sibona oi laloa.

Do Idia Vara Gaudia. Laloa lasi emu gari ibounai be do ia ore. Lagani momo lalonai platfom ai hereva henia karana idia manadalaia taudia momo be kamonai taudia vairanai idia lao gwauraia neganai idia gari. To, edia gari biagua daladia idia dibaia.

Bema oi hekwarahi gari idia hahedinaraia toana oi koua totona, kamonai taudia do idia laloa oi gari lasi. Reana gari oi do mamia noho, to idia be unai idia diba lasi.

Mani oi laloatao, gari ena toana ia havaraia adrenalin ese goada ia havaraia danu. Unai oi gaukaralaia, emu hereva lalonai hemami oi hahedinaraia totona.

Unai gaudia oi tohoa totona oi naria lasi ela bona platfom dekenai oi gini. Dina ta ta ai emu mauri lalonai, emu kara amo gari lasi toana bona emu hereva amo hemami maorodia hahedinaraia daladia oi dibaia. Unai oi dibaia neganai oi ia durua bada platfom dekenai bona haroro gaukara lalonai gari lasi toana oi hahedinaraia totona, bona unuseniai unai be mai anina bada.