Ma Ta Laloa Bada

MA HAIDA dekenai Baibel ena hereva momokani ita harorolaia neganai, edia lalona ai diba ita atoa sibona be hegeregere lasi. Edia kudouna ita hamarerea be namo. Unai ita karaia dalana ta be kamonai taudia ita laloa bada. Unai bamona laloa bada karana ita hahedinaraia daladia be idauidau.

Kamonai Taudia Edia Lalohadai Oi Laloa. Aposetolo Paulo ese kamonai taudia edia mauri bona lalohadai ia laloa. Ia gwau: “Iuda taudia danu lau noho neganai, Iuda edia kara bamona lau karaia, Iuda taudia do lau veria mauri totona. Mose ena Taravatu henunai lau noho lasi, to Taravatu henunai idia noho taudia danu lau noho neganai, lau danu Taravatu henunai tauna lau lao, unai taudia do lau veria mauri totona. Unai bamona danu, Dirava ena Taravatu lau utua lasi, badina be Keriso ena Taravatu lau badinaia noho. To Iuda lasi taudia danu lau noho neganai, lau be Taravatu laloa lasi tauna bamona lau lao, unai Iuda lasi taudia do lau veria mauri totona. . . . Lau ese taunimanima idauidau ibounai edia mauri dalana lau abia dae, dala idauidau ibounai dekena amo, haida do lau veria mauri totona. Iesu ena Sivarai Namona dainai, inai kara ibounai lau karaia noho. Bona lau diba, bema inai gaukara lau karaia noho, lau danu ese Sivarai Namona ena mauri hanamoa gaudia do lau abia.” (1 Kor. 9:​20-23) Edena dala ai ita ese ‘taunimanima idauidau ibounai edia mauri dalana ita abia dae’ diba?

Bema ma haida oi do hereva henia lasi neganai idia oi itaia, nega kwadogi lalonai danu, reana idia ura gaudia bona edia noho dalana oi diba sisina. Edia gaukara oi gwauraia diba, a? Edia tomadiho idia hahedinaraia gaudia oi itaia, a? Edia ruma bese ena mauri dalana idia hahedinaraia gaudia idia noho, a? Oi itaia gaudia dainai emu haroro herevana oi haidaua diba, kamonai taudia ese emu hereva idia ura henia totona, a?

Taunimanima ese emu haroro herevana idia ura henia totona emu teritori dekenai idia noho taudia oi hereva henia dalana oi laloa guna be namo. Gabu haida ai, anina be idau tanodia amo idia mai taudia oi laloa danu. Bema unai bamona taudia be emu gabu dekenai idia noho, idia oi haroro henia dalana namona oi davaria vadaeni, a? Dirava ena ura be “taunimanima ibounai ese mauri do idia davaria, bona hereva momokani do idia diba,” unai dainai namona be Basileia ena sivarai oi herevalaia dalana be oi davaria taudia ibounai ese idia ura henia.​—1 Tim. 2:4.

Oi Kamonai Namonamo. Ena be Iehova ese gau ibounai ia diba, to ma haida edia lalohadai ia kamonai. Peroveta tauna Mikaia ese ia abia matahanai lalonai Iehova ese aneru ia hagoadadia gau ta dekenai edia lalohadai idia hahedinaraia. Bena Dirava ese aneru ta dekenai gwaumaoro ia henia ia gwauraia karana do ia karaia. (1 Kin. 22:​19-22) Aberahamo be Sodoma ese do ia abia hahemaoro dainai ia laloa momo neganai, Iehova ese ena lalohadai ia kamonai. (Gen. 18:​23-33) Iseda haroro gaukara lalonai, edena dala ai Iehova ese ma haida edia lalohadai ia kamonai karana ita tohotohoa diba?

Ma haida oi hagoadaia edia lalohadai idia gwauraia. Henanadai namona oi henia, bona idia haere totona nega oi henia. Oi kamonai namonamo. Edia hereva oi kamonai namonamo dainai, mai gari lasi ida do idia hereva. Bema edia haere ese idia ura henia gauna ta ia hahedinaraia, dala namona ai oi henanadai noho. Gau iboudiai diba totona oi henanadai kava lasi, to idia oi dibaia toho. Edia lalohadai dainai idia oi hanamoa bema unai oi karaia diba. Ena be edia lalohadai oi abia dae diba lasi, to dala namona ai oi herevalaia.​—Kol. 4:6.

Namona be dala maorona ai ita hahedinaraia taunimanima ita laloa bada. Ma haida ita laloa bada to ita be maoro lasi idia sibona edia mauri gaudia ita herevalaia kava. (1 Pet. 4:15) Namona be ita naria namonamo, hahine ta eiava tau ta ese eda laloa bada karana ia laloa kerere garina. Bese idauidau bona taunimanima idauidau edia lalohadai ma haida laloa bada dalana maorona dekenai be idau, unai dainai ita laloa namonamo be namo.​—Luka 6:31.

Kamonai namonamo taudia ai ita lao totona, ita hegaegae be gau badana. Ita harorolaia sivaraina ita diba namonamo neganai, ita lalo-maino bona dala namona ai ma haida edia namo ita tahua diba. Unai dainai edia hemami ia namo bona idia ura ita danu idia herevahereva.

Ma haida edia hereva ita kamonai neganai ita hahedinaraia idia ita matauraia. (Roma 12:10) Unai ese ia hahedinaraia edia lalohadai bona hemami ita laloa bada. Reana unai dainai eda hereva do idia kamonai namonamo. Unai dainai, Dirava ena Hereva ese ita ia hagoadaia ‘hereva dekenai do ita kamonai haraga, to hereva do ita gwauraia haraga lasi’ be mai ena badina namona.​—Iam. 1:19.

Ma Haida Oi Durua Idia Goada Totona. Ma haida ita laloa bada dainai, ita ese kamonai taudia ita laloa bona edia mauri idia durua bada Baibel hereva momokanidia ita hahedinaraia totona idia ita lou henia. Lou henia oi laloa neganai, guna idia oi itaia neganai idia dekenai oi dibaia gaudia oi laloa. Idia laloa bada gauna oi herevalaia totona oi hegaegae. Idia oi durua, idia dibaia gaudia amo heduru namona idia abia diba do idia itaia totona.​—Isa. 48:17.

Bema kamonai tauna ese ia lalo-hekwarahilaia gauna ta eiava hekwakwanai ta ia hahedinaraia, namona be oi laloa unai be nega namona ia dekenai sivarai namona oi harorolaia. Iesu ena haheitalai oi tohotohoa, nega ibounai lalohisihisi taudia ia hagoadaia. (Mar. 6:​31-34) Hanaia dalana eiava sisiba ta oi gwauraia haraga lasi. Bema unai bamona oi karaia, reana kamonai tauna ia laloa ia oi laloa bada momokani lasi. To, namona be hebogahisi oi hahedinaraia. (1 Pet. 3:8) Baibel idia herevalaia bukadia amo diba oi tahua, bona unai tauna dekenai diba namona oi henia ia lalo-hekwarahilaia gauna ia hanaia eiava haheaukalaia totona. Momokani, kamonai tauna oi laloa bada dainai oi dekenai ia gwauraia hunia herevadia be ma haida dekenai oi hamaoroa lasi, bema badina namona ia noho lasi.​—Aon. 25:9.

Iseda Baibel stiuden taudia ita laloa bada be gau badana. Stiuden taudia ta ta durua bada gaudia be mai guriguri ida oi laloa, bona stadi totona oi hegaegae neganai unai gaudia oi laloa. Oi sibona oi nanadaia, ‘Lauma dalanai ia goada ia lao totona dahaka ia karaia be namo?’ Mai lalokau ida stiuden tauna oi durua, Baibel bona “hesiai tauna mai ena kamonai, bona mai ena kara maoromaoro” ese ia karaia bukadia edia hereva unai gauna dekenai ia laloa bada totona. (Mat. 24:45) Nega haida, unai gauna oi herevalaia sibona be hegeregere lasi. Reana stiuden tauna dekenai Baibel ena hakaua herevana badinaia dalana oi hahedinaraia be namo, reana unai badinaia dalana ia itaia namonamo totona gau ta umui karaia hebou.​—Ioa. 13:​1-15.

Iehova ena taravatu idia badinaia totona ma haida ita durua neganai, ita laloa maoromaoro be gau badana. Taunimanima edia mauri bona diba be idauidau, bona idia goada idia lao dalana be idauidau. Idia karaia diba gaudia oi laloa. (Fili. 4:5) Idia oi doria lasi edia mauri gaudia idia haidaua totona. Namona be Dirava ena Hereva bona Iena lauma ese stiuden taudia edia ura idia hagoadaia. Iehova ia ura taunimanima be mai edia kudouna ibounai ida idia ura dainai ia idia hesiai henia, ta ese ia doria dainai lasi. (Sal. 110:3) Edia mauri lalonai idia abia hidi gaudia dekenai emu lalohadai oi gwauraia lasi, bona ena be reana haida ese oi idia noia to oi naria namonamo, idia totona dala ta oi abia hidi lasi.​—Gal. 6:5.

Idia Oi Durua. Ena be Iesu ese kamonai taudia edia namo lauma dalanai ia laloa bada, to edia dabu gaudia ma haida ia laloa danu. (Mat. 15:32) Ena be eda kohu be bada lasi, to dala momo ai heduru ita henia diba.

Ma haida ita laloa bada dainai edia namo ita laloa. Hegeregere, bema medu eiava keru dainai kamonai tauna ena hemami be namo lasi, gabu ma ta dekenai umui lao, eiava dala oi karaia ma nega ta do umui hereva totona. Bema ta oi vadivadi henia to unai be nega namona lasi, oi gwau ma nega ta ai do oi giroa diba. Bema dekena tauna ta eiava kamonai tauna ta ia gorere eiava hospital dekenai ia noho, oi hahedinaraia ena namo oi laloa bona ia dekenai kadi eiava revareva kwadogina oi siaia eiava ia oi vadivadi henia. Bema namo, aniani sisina oi nadua eiava kara namona ma ta oi karaia.

Baibel stiuden taudia idia goada idia lao neganai, reana edia hemami ia namo momokani lasi, badina edia turadia gunadia idia bamoa noho lasi. Idia oi tura henia. Baibel stadi murinai bona nega ma haida ai idia ida oi herevahereva. Idia oi hagoadaia turadia namodia idia bamoa totona. (Aon. 13:20) Idia oi durua Keristani heboudia dekenai idia lao. Hebou dekenai idia ida oi helai, bona edia natudia naria karana lalonai idia oi durua, umui ibounai ese program amo namo umui abia totona.

Mai Emu Kudouna Ibounai ida Idia Oi Laloa Bada. Taunimanima laloa bada karana be ita dibaia bona karaia kava karana ta lasi, to eda kudouna amo ia vara karana ta. Ma haida ita laloa bada be dala idauidau momo ai ia hedinarai. Ita kamonai bona ita hereva karana amo ia hedinarai. Ma haida ita hebogahisi henia bona edia namo ita laloa karana amo ia hedinarai. Gau ta ita gwauraia lasi bona ita karaia lasi neganai danu, eda lalohadai bona vairana ena toana amo ia hedinarai. Bema ma haida ita laloa bada momokani, unai do idia itaia diba.

Ma haida ita laloa bada ena badina badana be, unai amo iseda guba Tamana ena lalokau bona hebogahisi ita tohotohoa. Unai ese kamonai taudia ia durua, Iehova kahirakahira idia lao bona ita harorolaia totona ia henia sivaraina idia abia dae totona. Unai dainai, sivarai namona oi harorolaia neganai, namona be ‘oi ese emu namo sibona do oi tahua lasi, to haida edia namo do oi tahua’ danu.​—Fili. 2:4.