Lalona Hagoadaia

ITA abia gaukarana be sivarai namona harorolaia gaukarana. Iesu ia gwau: “Sivarai Namona bese ibounai dekenai be do idia haroro henia guna.” (Mar. 13:10) Iesu ese “Basileia ena Sivarai Namona” harorolaia gaukarana ia haheitalaia. (Luka 4:43) Aposetolo taudia ese idia harorolaia herevana danu idia gwauraia “Sivarai Namona, Dirava dekena amo ia mai gauna” bona “Keriso ena sivarai namona.” (1 Tes. 2:2; 2 Kor. 2:​12, NW) Unai bamona sivarai ese lalona ia hagoadaia.

‘Guba ena ataiai ia roho aneruna’ ese ia harorolaia “noho hanaihanai Sivarai Namona” hegeregerena, taunimanima ita hagoadaia: “Dirava do umui gari henia, ia do umui hanamoa bada.” (Apok. 14:​6, 7) Gabu ibounai dekenai Dirava, ena ladana, ena kara namodia, ia karaia gaudia namodia, ena lalokau urana, ia dekenai sibona eda kara ena badina ita gwauraia karana, bona ia ura dahaka ita karaia gaudia be taunimanima dekenai ita harorolaia. Sivarai namona ita harorolaia lalonai taunimanima ita hadibaia Iehova Dirava ese kara dika taudia, ia idia matauraia lasi bona taunimanima ma haida edia mauri idia hadikaia taudia, do ia hadikaia ore. To ita ese ita haroro henia taudia ita hahemaoro henia lasi. Ita ura taunimanima momo ese Baibel ena sivarai idia abia dae bona unai amo idia dekenai unai be sivarai namona momokani.​—Aon. 2:​20-22; Ioa. 5:22.

Dika Gaudia Oi Herevalaia Daudau Lasi. To momokani, mauri lalonai dika gaudia idia vara danu. Idia ita reaia diba lasi. Herevahereva oi hamatamaia neganai, reana emu teritori dekenai idia laloa bada hekwakwanai ta oi gwauraia bona oi herevalaia sisina. To unai oi herevalaia daudau be namo lasi. Hanaihanai taunimanima ese niusi dikadia idia kamonai, unai dainai dika gaudia ita herevalaia neganai reana iduara eiava taiana idia koua. Emu hereva ena matamana kahanai, Dirava ena Hereva lalonai idia noho lalona hagoadaia hereva momokanidia oi hahedinaraia. (Apok. 22:17) Unai dala ai, ena be ruma tauna ia ura lasi umui herevahereva noho, to lalona hagoadaia herevana ta oi gwauraia vadaeni, ia laloa totona. Reana unai dainai gabeai do ia ura kamonai.

Unai hegeregerena, bema hereva henia totona oi idia boiria, namo lasi dika idauidau edia sivarai be momo dainai unai oi herevalaia daudau. Bema hereva henia tauna ese lohia taudia edia kerere, taravatu utua karadia bona kara dika, bona ia bada ia lao matabodaga karadia ia herevalaia daudau, reana kamonai taudia idia lalo-metau. Dika gaudia be badina namona sibona dainai oi herevalaia. Unai gaudia oi gwauraia sisina karana amo idia hahedinaraia oi herevalaia gauna be mai anina bada hari. Reana idia ese gau ta ia vara ena badina idia hahedinaraia bona unai dainai Baibel ese ia gwauraia hamaoromaoroa dalana ena namo ia hedinarai. Bema hegeregere, hekwakwanai oi gwauraia namonamo to oi herevalaia daudau lasi.

Nega momo emu hereva amo dika sivaraidia ibounai oi kokia diba lasi bona oi ura lasi oi kokia. To namona be unai namo bona dika gaudia oi herevalaia hebou dalana amo, hereva ibounai ese lalona ia hagoadaia. Unai totona, namona be oi abia hidi namonamo dahaka oi herevalaia, dahaka oi kokia, bona dahaka oi hahedinaraia namonamo. Iesu be ena Haroro Herevana Badana lalonai, kamonai taudia ia hagoadaia taravatu hadibaia taudia bona Farisea taudia ese sibona edia namo idia tahua karadia idia tohotohoa lasi, bona haheitalai haida ia hahedinaraia. (Mat. 6:​1, 2, 5, 16) To, Iesu ese unai tomadiho gunalaia taudia edia haheitalai dikana ia herevalaia daudau lasi, ia ese Dirava ena dala momokani lalo-pararalaia bona badinaia karadia ia hahedinaraia namonamo. (Mat. 6:​3, 4, 6-15, 17-34) Unai ese kamonai taudia ia durua momokani.

Lalona Hagoadaia Dalana ai Oi Hereva. Bema emu kongregesen dekenai Keristani gaukara ta do oi herevalaia, kamonai taudia oi hagoadaia to idia oi maumauraia lasi. Idia be kara ta idia karaia totona idia oi hagoadaia neganai, namona be oi sibona ese unai kara oi karaia. (Roma 2:​21, 22; Heb. 13:7) Namona be badu lasi to lalokau dainai gau ta oi herevalaia. (2 Kor. 2:4) Bema oi diba momokani emu Keristani tadikaka idia ura Iehova idia hamoalea, emu hereva ese unai ia hahedinaraia, bona unai ese idia do ia durua. Aposetolo Paulo ese 1 Tesalonika 4:​1-12; 2 Tesalonika 3:​4, 5; bona Filemona 4, 8-14, 21 lalonai unai bamona lalohadai ia hahedinaraia dalana mani oi itaia.

Nega haida elda taudia ese aonega lasi karana ta idia sisibalaia. To manau karana ese idia do ia durua, mai lalo-manau ida edia tadikaka idia kara henidia. (Gal. 6:1) Namona be idia hereva dalana amo ia hedinarai kongregesen taudia idia matauraia. (1 Pet. 5:​2, 3) Baibel ese tau matamatadia ia hagoadaia unai do idia laloa namonamo. (1 Tim. 4:12; 5:​1, 2; 1 Pet. 5:5) Sisiba bona matahakani idia henia bona gau idauidau idia hamaoromaoroa be namo neganai, namona be Baibel ena hereva hegeregerena idia karaia. (2 Tim. 3:16) Namo lasi hereva henia tauna ese Baibel siri ena anina ia haidaua, sibona ena lalohadai goadana ia durua totona. Ena be sisiba aukana idia henia be mai badina, hereva dalana ia namo bema kara dika dadaraia, hekwakwanai hanaia, dala kererena hamaoromaoroa, bona Iehova ia ura gaudia ese ita idia gimaia daladia ia hahedinaraia namonamo.​—Sal. 119:​1, 9-16.

Emu hereva oi hegaegaelaia neganai, hereva badadia ta ta edia hereva dokodia bona emu hereva ibounai ena hereva dokona oi laloa namonamo. Nega momo, dokonai oi gwauraia herevadia idia laloatao daudau. Kamonai taudia edia lalona do ia hagoadaia, a?

Keristani Tadikaka ida Oi Herevahereva Neganai. Iehova ena hesiai taudia ese Keristani heboudia ai edia tadikaka edia hebamo idia laloa bada. Unai negadia ai lauma dalanai goada idia abia. Baibel ese ita ia hagoadaia tomadiho gabudia dekenai ita hebou neganai, ita ta ta do ita “hagoadaia.” (Heb. 10:25) Unai be hebou lalonai ita henia hereva bona haere amo sibona lasi, to hebou vairanai bona murinai ita herevahereva lalonai ita karaia diba.

Ena be dina ta ta gaudia ita herevalaia be dika lasi, to lauma gaudia ita herevalaia neganai, ita ia hagoadaia bada. Unai gaudia haida be hesiai gaukara helagana lalonai ita abia ekspiriens. Dala namona ai ma haida edia namo ita laloa be lalona ia hagoadaia danu.

Ita noholaia tanobadana ena kara dainai, ita naria namonamo be namo. Paulo ese Efeso Keristani taudia ia tore henia neganai, ia gwau: “Hereva koikoi do umui hadokoa momokani. Umui ibounai ta ta dekenai hereva momokani do umui gwauraia.” (Efe. 4:25) Koikoi lasi to hereva momokani ita herevalaia ena anina ta be tanobada ai idia laloa bada gaudia bona taudia ita abia isi lasi. Unai hegeregerena, Iesu ese “kohu ura henia dikadika” karana ena siahu dainai ita ia sisiba henia. (Mat. 13:22) Unai dainai ita herevahereva neganai, ita naria namonamo, kohu herevalaia badabada karana amo unai siahu ita habadaia garina.​—1 Tim. 6:​9, 10.

Aposetolo Paulo ese lalona hagoadaia karana ia herevalaia neganai, ia gwau iseda tadikaka ta be reana ena “abidadama ia manoka” dainai, anina be, Keristani dala ena ura kwalimu ia do lalo-pararalaia namonamo lasi dainai gau ta ia dadaraia neganai, ita hahemaoro henia lasi bona ia ita laloa maragi lasi. Momokani, iseda herevahereva ese ma haida edia lalona ia hagoadaia totona, namona be edia bese bona lauma dalanai edia goada ita laloa. Bema iseda tadikaka eiava taihu “ena dala dekenai hadikaia gauna ta do ita atoa,” madi, unai be dika!​—Roma 14:​1-4, 13, 19.

Edia mauri lalonai hekwakwanai badana ta​—hegeregere, gorere badana ta​—idia haheaukalaia taudia ese lalona hagoadaia herevahereva idia ura henia. Reana unai bamona tauna ia hekwarahi hebou dekenai ia mai totona. Reana iena hekwakwanai idia diba taudia idia henanadai: “Emu hemami be edena bamona?” Ita diba iena noho idia laloa dainai ia moale. To, reana ena gorere herevalaia karana ese ena lalona ia hagoadaia lasi. Ena kara laloa bada bona hanamoa karadia ese iena kudouna idia hamoalea bada diba. Oi itaia Iehova ia lalokau henia bona mauri aukana lalonai ia haheauka noho, a? Ia haere neganai, unai ese oi ia hagoadaia, a? Reana ena gorere oi herevalaia lasi to ena goada gaudia bona kongregesen ia durua karadia oi herevalaia karana amo ena lalona oi hagoadaia be namo, ani?​—1 Tes. 5:11.

Iseda herevahereva ese ma haida edia lalona ia hagoadaia totona, Iehova ese ita herevalaia gaudia ia laloa dalana ita laloa be namo. Idaunegai Israela dekenai, Iehova ese ia abia hidi taudia bona mana idia maumauraia taudia be Dirava ese ia lalo-namo henia lasi. (Num. 12:​1-16; 21:​5, 6) Ita hahedinaraia diba unai haheitalai ese ita idia durua bema elda taudia ita matauraia bona hesiai tauna mai ena kamonai bona mai ena kara maoromaoro oreana amo ita abia lauma aniani ita laloa bada.​—1 Tim. 5:17.

Eda Keristani tadikaka ida ita noho neganai, ita idia durua gaudia momo herea ita herevalaia diba. To, bema ta ia maumau momo, namona be oi hekwarahi lalona hagoadaia gaudia umui herevalaia totona.

Herevana ma haida ita haroro henia, platfom amo ita hereva, eiava eda Keristani tadikaka ida ita herevahereva, namona be mai laloa kehoa ida ita hereva, bena iseda kudouna ai idia noho gau namodia amo “kamonai taudia ese durua bona namo do idia davaria, bona [iseda] hereva dekena amo manoka taudia do [ita] hagoadaia.”​—Efe. 4:29.