Pepe Saluti, Vouti Karana, Bona Gavamani ese Ia Henia Gaukara Ma Haida

Pepe saluti karana. Iehova ena Witnes taudia idia abia dae pepe dekenai igo diho o saluti henia karana be tomadiho karana bona bese ena ane abia karana be Dirava idia tomadiho henia lasi, to edia tano o lohia taudia abia isi karana. (Isaia 43:11; 1 Korinto 10:14; 1 Ioane 5:21) Unai bamona lohia tauna ta be Babulonia ena King Nebukanesa. Unai siahu bada king ia ura taunimanima be ena siahu idia itaia bona ia idia tomadiho henia dainai, kaivakuku badana ta ia haginia bona iena taunimanima ia hadibaia bema miusiki, bese abia isi anena bamona, idia gadaralaia neganai, ibounai be unai kaivakuku dekenai do idia tui diho. To, Heberu memero toi—Sataraka, Misaka, bona Abetenigo—be unai kaivakuku idia tomadiho henia lasi, ena be unai kara dainai King Nebukanesa ese ia hamasedia diba.—Daniela, karoa 3.

Histori torea tauna Carlton Hayes ia gwau: Iseda nega ai, “bese abia isi karana lalonai taunimanima be pepe idia abidadama henia bona idia tomadiho henia gauna badana.” “Haida be pepe idia itaia neganai, edia hati idia kokia; tatau haida be pepe hanamoa anedia idia torea bona natudia be guriguri anedia idia abia.” Ma ia gwau, bese abia isi karana be mai ena “helaga dinadia,” hegeregere America dekenai ena deit be July 4, bona mai ena “helaga taudia, spot o tuari ai idia kwalimu o gavamani taudia badadia” bona mai edia “dubu helagadia” danu. Brazil ai, taunimanima edia vairanai ami ena minista ia gwau: “Pepe ita matauraia bada bona ita tomadiho henia . . . sibona eda tano ita tomadiho henia hegeregerena.” Oibe, buka ta (The Encyclopedia Americana) ia gwau: “Satauro be helaga gauna hegeregerena, pepe danu be ia helaga.”

Vanegai sibona unai buka ma ia gwau: “Bese anedia be bese badinaia goada urana ia havaraia bona nega momo unai ane lalonai Dirava idia noia idia do ia hakaua bona edia lohia taudia do ia naria.” Unai dainai, Iehova ena hesiai taudia idia gwau pepe saluti henia karana bona bese anedia abia karana be tomadiho karana neganai, unai be maoro. Buka ta (The American Character) ese U.S. ena sikuli dekenai Witnes natudia be pepe saluti henia o gwauhamata herevana idia gwauraia lasi karana ia herevalaia neganai, ia gwau: “Kota Badana ia hamomokania vadaeni, dina ta ta iboudiai sikuli ai unai kara idia karaia be tomadiho karana.”

Ena be Iehova ena taunimanima be Baibel ese ia gwauraia lasi aria idia dadaraia, to unai aria idia moalelaia taudia idia matauraia. Idia ese tano ena pepe idia matauraia bona idia laloparara taunimanima edia “gavamani” be “Dirava ena hesiai tauna.” (Roma 13:1-4) Unai dainai, Iehova ena Witnes taudia be unai hahegani idia badinaia bona “king taudia totona, bona lohia taudia ibounai totona” idia guriguri. To, unai ita karaia ena badina be “Dirava ita badinaia bona matauraia” bona “mai maino danu do ita noho namonamo.”—1 Timoteo 2:2.

Politikol eleksen ai vouti karana. Keristani taudia korikoridia be ma haida edia vouti karana idia matauraia. Idia be eleksen karana idia gwauraia dika lasi, bona eleksen ai idia kwalimu taudia idia kamonai henia. To, idia be inai tanobada besedia edia politikol karadia lalonai idia vareai lasi. (Mataio 22:21; 1 Petero 3:16) To, tano haida dekenai taravatu ia gwau taunimanima ibounai do idia vouti bona vouti gabuna dekenai idia lao lasi taudia idia dagedage henia karana be bada, unai bamona tanodia ai Keristani tauna be dahaka do ia karaia? Sataraka, Misaka, bona Abetenigo be Dura ena taora dekenai idia lao hegeregerena, reana Keristani tauna ta be ena lalomamina hegeregerena vouti gabuna dekenai ia lao totona. To, namona be ia naria namonamo, do ia vouti lasi. Ia ese inai hakaua herevadia siks ia laloa be namo:

1. Iesu ena hahediba taudia be “tanobada ena lasi.”—Ioane 15:19.

2. Keristani taudia be Keriso bona Basileia ena gwaukau taudia.—Ioane 18:36; 2 Korinto 5:20, NW.

3. Keristani kongrigeisen taudia ibounai edia tomadiho lalonai idia abia dae gaudia be tamona, bona Keriso ena lalokau ese idia ibounai ia hatamonaia.—1 Korinto 1:10; Kolose 3:14.

4. Taunimanima ese tau ta idia vouti bona ia be minista ai ia lao, to kerere ta ia karaia neganai idia vouti taudia be ena kerere lalonai idia vareai danu.—1 Samuela 8:5, 10-18 bona 1 Timoteo 5:22 ai idia noho hakaua herevadia oi itaia.

5. Israela taudia ese king ta idia ura abia hidi neganai, unai ese ia hahedinaraia idia be Iehova idia dadaraia.—1 Samuela 8:7.

6. Keristani taudia be mai gari lasi ida politikol lalohadai idauidau idia badinaia taudia dekenai Dirava ena gavamani ena sivarai idia herevalaia.—Mataio 24:14; 28:19, 20; Heberu 10:35.

Gavamani ese ia henia gaukara ma haida. Tano haida dekenai, gavamani ena taravatu be ami lalonai idia vareai lasi taudia be lagani haida lalonai gaukara ma haida do idia karaia. Unai gauna dekenai abia hidi ita karaia neganai, namona be ita guriguri, reana lo tadikaka ta ida ita herevalaia, bona eda lalomamina hegeregerena abia hidi ita karaia be namo.—Aonega Herevadia 2:1-5; Filipi 4:5.

Baibel be ita ia hamaoroa: ‘Gavana bona gavamani ena siahu taudia do ita kamonai henia. Edia oda hereva do ita badinaia, bona do ita naria hegaegae kara namodia ibounai do ita karaia totona, bona do ita manau.’ (Tito 3:1, 2) Unai dainai, namona be inai henanadai haida do ita laloa: ‘Unai gaukara lau abia dae neganai, lau be politikol gaukaradia o tomadiho koikoi ena kahana ta lau durua, a?’ (Mika 4:3, 5; 2 Korinto 6:16, 17) ‘Unai gaukara ese lau ia koua egu Keristani maduna idauidau lau hagugurua totona, a?’ (Mataio 28:19, 20; Efeso 6:4; Heberu 10:24, 25) ‘Eiava, unai gaukara lau karaia neganai, dala ia kehoa egu hesiai gaukara do lau habadaia, bona reana ful-taim hesiai gaukara lau karaia diba, a?’—Heberu 6:11, 12.

Bema Keristani tauna ta be ena lalomamina hegeregerena, abia hidi ia karaia gavamani ese ia henia gaukara ma ta do ia karaia, bona dibura ruma ai ia lao lasi, namona be tadikaka taihu ese ena abia hidi idia matauraia be namo. (Roma 14:10) To, bema ia gwau unai gaukara do ia karaia lasi, ma haida ese ena abia hidi danu idia matauraia be namo.—1 Korinto 10:29; 2 Korinto 1:24.