Kopina Gadaralaia Karana Oi Hanaia Diba

Dirava ese kopina gadaralaia karana ia inai henia. Unai kara ia karaia tauna be sibona ena tauanina ena ura ia laloa bada bona lalohadai dikadia ia laloa momo. Ena kopina ia gadaralaia tauna ese ma haida ia matauraia lasi; ena lalohadai tamona be, ma ta do ia sihari henia kava, sibona ena tauanina ena ura ia hagugurua totona. Mahuta hebou karana be lalokau dainai ia karaia lasi, to ia be tauanina ena ura ia hagugurua sibona, bona moale korikorina ia davaria lasi. Kopina gadaralaia karana ese tauanina ena ura ia koua lasi, to “matabodaga karadia, kara mirodia, matabodaga urana, ura dikadia” ia habadaia sibona.​—Kolose 3:​5, NW.

Paulo ia gwau: “Lauegu turana lalokau e, . . . tauanina bona lauma hamiroa karadia ibounai do ita hadokoa, bona iseda mauri ita hagoevaia be namo. Vadaeni Dirava ena vairanai do ita noho namonamo, mai goeva bona mai gari danu.” (2 Korinto 7:1) Bema oi hekwarahi bada unai sisiba oi badinaia totona, oi lalomanoka lasi. Iehova be ia noho hegaegae emu “kara dika ia gwauatao” bona oi ia durua totona. (Salamo 86:5; Luka 11:​9-​13) Momokani, ena be nega haida oi karaia lou, to emu lalomamina ese oi ia kota henia bona oi hekwarahi noho unai kara oi hadokoa totona, unai be toa namona. Danu laloatao, “Dirava ese gau ibounai ia diba, bona iena diba ese iseda kudouna ena diba ia hereaia momokani.” (1 Ioane 3:​20) Dirava be iseda kara dika sibona ia itaia lasi; to iseda kudouna ia itaia danu. Iehova be unai ia diba dainai, kara dika gwauatao totona ita noia neganai, mai hebogahisi ida iseda guriguri ia kamonai. Unai dainai, natuna ta be kerere ta ia davaria neganai, ena tamana dekenai heduru totona ia lao bamona, namona be mai manau ida Dirava oi guriguri henia goadagoada bona oi hesiku lasi. Iehova ese oi do ia durua bona lalomamina goevana do ia henia. (Salamo 51:​1-​12, 17; Isaia 1:​18) Gau badana be emu guriguri hegeregerena kara haida oi karaia kopina gadaralaia karana oi hadokoa totona. Hegeregere, oi hekwarahi ponografi laulau o buka bona hebamo dikadia oi dadaraia be namo.

Bema kopina gadaralaia karana oi do karaia noho, mani emu kara emu Keristani tama sina o lo tadikaka ta oi hereva henia.a​​—Aonega Herevadia 1:​8, 9; 1 Tesalonika 5:​14; Tito 2:​3-5.