Baibel Ena Lalohadai Headava Hadokoa Bona Parara Karana Dekenai

Iehova ia ura headava taudia be edia headava gwauhamatana do idia badinaia. Iehova ese tau bona hahine ginigunadia be headava lalonai ia hakapua neganai, ia gwau: “Tau ese tamana sinana do ia rakatania, iena adavana dekenai do ia noho, ruaosi be tauanina tamona do idia lao.” Gabeai, Iesu Keriso be unai hereva ia gwauraia lou: “Dirava ese ia hakapua taudia, be taunimanima ese do idia hapararaia lasi.” (Genese 2:24; Mataio 19:3-6) Unai hegeregerena, Iehova bona Iesu edia lalohadai be headava taudia rua be do idia noho hebou ela bona ta ia mase. (1 Korinto 7:39) Headava be helaga dainai headava hadokoa karana be gau maragina lasi. Oibe, Baibel ese ia hahedinaraia bema ta ia heudahanai lasi to headava ia hadokoa kava, Iehova be unai kara ia inai henia.—Malaki 2:15, 16.

Baibel ese ia gwauraia headava hadokoa ena badina tamona be dahaka? Oibe, Iehova be heudahanai bona matabodaga karadia ia inai henia. (Genese 39:9; 2 Samuela 11:26, 27; Salamo 51:4) Momokani, Iehova dekenai matabodaga be kara dika rohorohona, bona ia gwau unai kara dainai ta be ena headava ia hadokoa diba. (Matabodaga karana dekenai hereva ma haida oi diba totona, Karoa 9, paragraf 7 itaia, matabodaga karana ia herevalaia.) Iehova ese kerere lasi adavana dekenai maoro ia henia abia hidi ia karaia totona: Ena adavana ida do ia noho hebou o edia headava do ia hadokoa. (Mataio 19:9) Unai dainai, bema ia kerere lasi adavana ia ura headava ia hadokoa, Iehova be iena kara ia inai henia lasi. To, Keristani kongrigeisen lalonai elda taudia ese ta do idia hamaoroa lasi ena headava ia hadokoa totona. To, bema kerere ia karaia tauna be ia helalo-kerehai momokani, reana ena adavana do ia ura ia ida ia noho. Oibe, Baibel ena taravatu hegeregerena edia headava idia hadokoa diba taudia ese abia hidi do idia karaia bona gabeai do idia vara hekwakwanai do idia abia dae danu.—Galatia 6:5.

Ena be headava haida lalonai ta be ia heudahanai lasi, to hekwakwanai badadia haida dainai, Keristani taudia haida be abia hidi idia karaia edia adavana idia rakatania eiava headava idia hadokoa totona. Bema unai bamona ia vara, Baibel ia gwau adavana ia rakatania tauna be “headava lasi do ia noho, o do ia giroa lou iena adavana dekenai.” (1 Korinto 7:11) Unai Keristani hahine o tau be tau o hahine ma ta do ia tura henia lasi, ia adavaia totona. (Mataio 5:32) Mani hekwakwanai badadia haida ita herevalaia, haida idia laloa unai ese headava idia hapararaia diba.

Ia ura lasi ena adavana bona natudia ia naria. Reana tau be moni gaukara ia karaia, to iena ruma bese idia ogogami badina tauanina durua gaudia ia henia lasi. Baibel ia gwau: “Bema tau ta ese . . . iena ruma taudia ia ubua lasi neganai, ia ese iena abidadama Keriso dekenai ia negea vadaeni.” (1 Timoteo 5:8) Bema iena kara ia haidaua lasi, reana hahine be ia bona ena natudia edia namo totona abia hidi do ia karaia, taravatu hegeregerena idia parara totona. Oibe, bema ta be elda taudia ia hadibaia iena Keristani adavana ese edia ruma bese ia naria lasi, namona be unai idia tahua namonamo. Ta be ena ruma bese ia naria lasi neganai, kongrigeisen amo idia atoa siri diba.

Ia dagedage bada. Tau be ena adavana ia dagedage henia bada bona ia dadabaia dikadika, iena tauanina ia haberoa o kahirakahira ia hamasea. Bema ia dagedage bada tauna be tadikaka ta, elda taudia ese unai do idia tahua namonamo, unai sivarai be momokani eiava lasi. Ia badu momo, ia heai bona adavana ia dadabaia loulou tauna be kongrigeisen amo idia atoa siri diba.—Galatia 5:19-21.

Mai dagedage ida adavana ena tomadiho karana ia koua. Tau ese ena adavana ia koua Iehova tomadiho henia karadia haida ia karaia lasi totona, o ena adavana ia doria Dirava ena taravatu ia utua totona. Bema unai bamona ia vara, hahine be abia hidi ia karaia diba bona inai hahegani, “Dirava ai kamonai henia be namo, taunimanima ai kamonai henia be dika” do ia badinaia. Anina be taravatu hegeregerena gwaumaoro ia abia diba adavana amo ia parara totona.—Kara 5:29.

Ita herevalaia vadaeni gaudia idia vara neganai, ta be maoro lasi kerere lasi adavana ia doria ena adavana amo ia parara totona eiava ia doria idia noho hebou totona. Lo turadia bona elda taudia ese heduru idia henia bona Baibel ena sisiba amo idia durua diba, to tau bona hahine huanai idia vara gaudia ibounai idia diba lasi. Iehova sibona ese unai ia itaia diba. Oibe, Keristani hahine ta be Dirava o headava ia matauraia lasi, bema ia koikoi bona ia gwau hekwakwanai badadia idia davaria dainai ia ura ena adavana amo ia parara. Ena be ta ena kara ia hunia bona mai koikoi ida palani ia karaia ena adavana amo ia parara totona, to Iehova be unai ia itaia diba. Oibe, “Dirava ese ia havaraia gaudia ibounai amo gau ta be ia hehuni lasi, to gau ibounai be idia hedinarai bona ia itaia diba. Bona ia dekenai iseda kara ena anina do ita gwauraia hedinarai.” (Heberu 4:13, NW) To, bema tau ena dagedage bada karana ia hadokoa lasi bona taihu ia ura ia amo ia parara, ta ese ena abia hidi do ia gwauraia dika lasi. Badina “ita ibounai Dirava ena Kota henia gabuna ena vairana dekenai do ita gini.”—Roma 14:10-12.