Guriguri amo Dirava Dekenai Ena Hemami Ibounai Ia Gwauraia

1, 2. (a) Hana be laolao ta totona ia hegaegae neganai, dahaka dainai ia moale lasi? (b) Hana ena sivarai amo dahaka ita dibaia?

HANA be ena laolao totona gaudia ia hegaegaelaia dainai ia bisi, bona unai amo ena hekwakwanai ia laloa momo lasi. Unai be moale negana; iena adavana Elikana be lagani ta ta ai tomadiho totona Silo ai dubu helaga dekenai ena famili ibounai ia hakaua lao. Unai bamona negadia ai Iehova ia ura taunimanima idia moale. (Deuteronomi 16:15 duahia.) Hana be ia maragi negana amo, unai bamona aria ia moalelaia. To lagani haida lalonai iena mauri lalonai gau haida idia vara.

² Hana be ia adavaia tauna Elikana ese ia lalokau henia. To, ia be mai ena adavana ma ta danu. Iena ladana be Penina, bona ia ura lasi Hana do ia moale. Aria negadia ta ta ai, Penina ese Hana ena lalona ia hahisia. Edena dala ai? Bona Hana be ena abidadama karana dainai edena dala ai Iehova ese ia durua ena hekwakwanai ia haheaukalaia totona? Bema emu mauri ai oi davaria hekwakwanai ese emu moale ia hadikaia, Hana ena sivarai ese oi do ia hagoadaia.

“Dahaka Dainai Oi Lalohisihisi Bada?”

3, 4. Hana be dahaka hahetoho badadia rua ia davaria, bona dahaka dainai unai hahetoho ta ta lalonai ia lalohisihisi?

³ Baibel ese Hana ena mauri ai idia vara hekwakwanai badadia rua ia herevalaia. Hekwakwanai ginigunana ia haheaukalaia, to iharuana be ia auka. Ginigunana, ena tau be mai ena hahine ma ta bona unai hahine ese ia ura henia lasi. Iharuana, ia be gabani. Natudia idia ura havaraia hahinedia dekenai unai be auka, bona Hana ena nega bona kastom ai, unai be lalohisihisi bada gauna. Famili ta ta be idia havaraia natudia amo, edia famili ladana do ia boio lasi. Bema hahine ta be gabani, unai be lalohisihisi bona hemarai gauna.

⁴ Reana Hana be ena hekwakwanai ia haheaukalaia diba bema Penina ese ia kara auka henia lasi. Tau tamona mai ena hahine rua be mauri aukana. Unai headava lalonai nega momo, mama karana, hepapahuahu, bona lalohisihisi idia vara. Unai bamona headava be maoro lasi, badina Dirava ese Eden umana ai headava taudia totona ia atoa taravatu be—tau tamona bona hahine tamona sibona totona. (Gen. 2:24) Baibel ai ita itaia adavana momo adavaia karana be mauri aukana, bona Elikana ena ruma bese lalonai ia vara gauna ese unai ia hahedinaraia.

5. Dahaka dainai, bona edena dala ai Penina ese Hana ia hahisia?

⁵ Elikana ese Hana ia lalokau henia bada. Iuda taudia edia sivarai gunadia idia gwau, ia ese Hana ia adavaia guna bena lagani haida murinai Penina ia adavaia. Herevana unai be momokani eiava lasi, to Penina be Hana ia mama henia bada, bona dala idauidau ia tahua Hana ia hahisia totona. Toana be Penina be Hana ia hereaia badina ia be natudia momo ia havaraia. Bona natuna ta ta ia havaraia neganai, ia heagi bada. Penina ese Hana ia hebogahisi henia bona hagoadaia lasi. Baibel ia gwau, Penina ese Hana ia kirikirilaia momo “ena lalona ia hahisia totona.” (1 Sam. 1:6) Penina ena kara ese ia hahedinaraia ia ura Hana ia hahisia. Oibe, Hana be ia lalohisihisi bada.

6, 7. (a) Elikana ia ura Hana ia hagoadaia, to reana dahaka dainai Hana be sivarai ibounai ia gwauraia lasi? (b) Hana be ia gabani dainai unai ese ia hahedinaraia Iehova be ia dekenai ia moale lasi, a? Herevalaia. (Futnout itaia.)

⁶ Lagani ta ta ai, Silo dekenai tomadiho totona idia lao neganai, nega momo Penina ese Hana ena hemami ia hadikaia. Elikana ese Penina ena natudia ta ta, “memero bona kekeni ibounai dekenai” boubou gauna ena kahana haida ia henia. To, Hana be iena lalokau adavana dainai, ia dekenai kahana namona ia henia. Penina be ia mama dainai Hana ia kara auka henia bona ia hamaoroa ia be gabani. Unai dainai Hana be ia taitai bona ia aniani lasi. Elikana ia itaia iena lalokau adavana be ia lalohisihisi bada bona ia aniani lasi, unai dainai ia ura ia hagoadaia. Ia nanadaia: “Hana e, dahaka dainai oi taitai, bona dahaka dainai oi aniani lasi, bona dahaka dainai oi lalohisihisi bada? Oi dekenai lau be mai anina bada tauna, unai ese natudia memero 10 ia hereaia, ani?”​—1 Sam. 1:4-8.

⁷ Elikana ia laloparara Hana be gabani dainai ia lalohisihisi. Bona Hana ese Elikana ena lalokau herevadia ia laloa bada.a To Elikana ese Penina ena kara auka ia herevalaia lasi, bona Baibel ia gwau lasi Hana ese Elikana dekenai Penina ena kara ia herevalaia. Reana Hana ia laloa Penina ena kara ia gwauraia hedinarai neganai hekwakwanai do ia habadaia. Elikana ese kara haida do ia karaia diba, a? Reana unai ese Penina ena badu do ia habadaia, bona ena natudia bona hesiai kekenidia ese ia do idia tohotohoa bona Hana ena noho namo do idia hadikaia, a? Hana ia mamia iena ruma bese taudia ese ia idia inai henia.

8. Bema ta be oi dekenai ia kara auka o kara gageva, to oi diba Iehova be kota maoromaoro Diravana dainai, edena dala ai unai ese oi ia hagoadaia?

⁸ Herevana Elikana be Penina ena kara auka sivarai ia diba o lasi, to Iehova ese unai ibounai ia itaia. Baibel ia hahedinaraia Dirava ese gau ibounai ia itaia, unai amo ma haida dekenai idia mama o dagedage taudia ia hadibaia Dirava be edia kara ia itaia noho. To, Hana bamona, kerere idia karaia lasi bona maino ai idia noho taudia be lalogoada idia abia, badina idia diba kota maoromaoro Diravana be ena nega bona dala maorona ai hekwakwanai do ia hamaoromaoroa. (Deuteronomi 32:4 duahia.) Reana Hana be unai ia diba danu, badina heduru totona Iehova dekenai ia noinoi.

“Lalohisihisi Toana Ia Hahedinaraia Lou Lasi”

9. Ena be Hana be Penina ena kara ia diba, to mai ura ida Silo dekenai ia lao karana amo dahaka ita dibaia?

⁹ Daba momokani ai, ruma bese be idia bisi. Ibounai be edia laolao totona idia hegaegae noho, natudia danu. Elikana bona ena ruma bese be Rama siti dekenai idia noho. Silo idia lao totona unai ruma bese badana be Eparaima ena ororo gabudia ai kilomita 30 mai kahana do idia raka.b Dina ta o rua bamona. Hana be Penina ena kara ia diba. To, unai ese Hana ia koua lasi ia lao totona. Dirava idia tomadiho henia taudia dekenai ia be haheitalai namona. Ma haida edia kara kerere dainai Dirava ita tomadiho henia karana ita rakatania be aonega karana lasi. Bema unai bamona ita karaia, iseda hekwakwanai ita haheaukalaia ena hagoadaia herevadia do ita reaia.

10, 11. (a) Dahaka dainai Hana be palai dubu dekenai ia lao haraga? (b) Hana be guriguri amo edena dala ai ena guba Tamana dekenai ena kudouna ai idia noho gaudia ia gwauraia?

¹⁰ Ororo ena dala be mai ena hekwarahi to idia raka ela bona adorahi, bena Silo dekenai idia ginidae. Silo be ororo ataiai ia noho bona ororo latadia momo ese idia hagegea. Kahirakahira idia ginidae neganai, Hana be Iehova dekenai do ia gwauraia guriguri ia lalohadailaia noho. Idia ginidae neganai, ibounai be idia aniani hebou. Hana be idia ia rakatania bona Iehova ena palai dubu dekenai ia lao haraga. Unuseniai, Hahelaga Tauna Badana Eli be vareai gabuna ena du badinai ia helai. To, Hana be Eli ia itaia lasi badina ia be ena guriguri ia laloa noho. Ia abia dae momokani palai dubu ai Dirava ese ia do ia kamonai henia. Ena be ta ese ena lalohisihisi ia lalopararalaia lasi, to ena guba Tamana be do ia laloparara. Ena lalona ia hisihisi bada, bona ia taitai matamaia.

¹¹ Hana be mai taitai bada ida Iehova dekenai ia hereva. Ia ura gwauraia herevadia ia laloa neganai, ena uduna bibina sibona ia marere. Nega daudau ia guriguri, bona ena Tamana dekenai ena kudouna ai idia noho gaudia ibounai ia gwauraia. Dirava ia noia natuna ta do ia henia sibona lasi, to gau ma ta ia gwauraia danu. Hana be Dirava amo do ia abia hahenamo sibona ia laloa lasi, to ia dekenai do ia henia gauna ia laloa danu. Unai dainai gwauhamata ta ia karaia, ia gwau bema natuna mero ta do ia havaraia, unai mero be Iehova dekenai do ia henia, iena mauri ibounai lalonai ena hesiai gaukara do ia karaia.​—1 Sam. 1:9-11.

12. Hana ena haheitalai hegeregerena, guriguri karana dekenai dahaka ita laloatao be namo?

¹² Hana ese Dirava ena hesiai taudia dekenai guriguri karana dekenai haheitalai namona ia hahedinaraia. Iehova be iena taunimanima ia hamaoroa, ia dekenai edia lalohekwarahi gaudia ibounai do idia gwauraia hedinarai, natuna ta ese ena lalokau tama sina ia hereva henia hegeregerena. (Salamo 62:8; 1 Tesalonika 5:17 duahia.) Aposetolo Petero be Iehova guriguri henia karana ia herevalaia neganai, inai hagoadaia herevana ia gwauraia: “Emui lalohekwarahi ibounai be ia dekenai umui negea lao, badina ia be umui ia laloa bada.”​—1 Pet. 5:7.

13, 14. (a) Dahaka dainai Eli be Hana dekenai lalohadai kererena ia abia? (b) Hana ese Eli ia haere henia karana amo edena dala ai abidadama bada karana ia hahedinaraia?

¹³ To, taunimanima edia laloparara bona hebogahisi karana be Iehova ena bamona lasi. Hana be mai taitai ida ia guriguri noho lalonai, gadona ta ia kamonai dainai ia hoa. Unai be hahelaga tauna badana Eli, bona ia be Hana ia itaia noho. Ia gwau: “Dahaka dainai oi kekero? Emu inuinu oi hadokoa.” Eli ese Hana ena udu bibina ia marere, ia taitai bona ia lalohisihisi bada karana ia itaia. Ia nanadaia lasi dahaka ia vara noho, to maoromaoro ia gwau ia be ia kekero.​—1 Sam. 1:12-14.

¹⁴ Unai lalohisihisi negana ai, mai ena maduna badana tauna be unai hereva ia gwauraia neganai, Hana ena hemami ia hadikaia! To ia ese abidadama bada karana ia hahedinaraia. Tau ta ena kara kerere ese Hana ia koua diba lasi Iehova ia tomadiho henia totona. Mai hemataurai ida Eli ia haere henia bona ena hekwakwanai ia gwauraia hedinarai. Eli ia laloparara ia kerere dainai mai hebogahisi ida, ia gwau: “Mai maino ida oi lao bona namona be Israela ena Dirava ese oi noinoi gauna be oi dekenai do ia henia.”​—1 Sam. 1:15-17.

15, 16. (a) Hana be palai dubu ai Iehova tomadiho henia bona guriguri henia karana ese edena dala ai ia durua? (b) Ita lalohisihisi neganai, edena dala ai Hana ena haheitalai ita tohotohoa diba?

¹⁵ Hana be palai dubu ai Iehova ia tomadiho henia bona ena kudouna ai ia noho gaudia ibounai ia gwauraia murinai, ena hemami be edena bamona? Baibel ia gwau: “Hana ia lao bona ia aniani, bona lalohisihisi toana ia hahedinaraia lou lasi.” (1 Sam. 1:18) Hana ena lalona ia namo. Unai be hegeregere ia ese ena lalohisihisi ena metau ibounai be ena guba Tamana, siahu ibounai Diravana, ena pagana ai ia atoa. (Salamo 55:22 duahia.) Iehova be hekwakwanai ibounai ia hamaoromaoroa diba.

¹⁶ Bema hekwakwanai ita davaria, ita lalometau bona lalohisihisi, Hana ena haheitalai ita tohotohoa bona “Guriguri kamonai Diravana” dekenai iseda lalohekwarahi gaudia ita gwauraia hedinarai be namo. (Sal. 65:2) Bema mai abidadama ida ita guriguri, iseda lalohisihisi do ia ore bona “Dirava ena maino, laloparara ibounai ia hereaia gauna” do ita mamia.”​—Fili. 4:6, 7.

“Dirava Idauidau be Iseda Dirava, Nadi Badana Unai, Bamona Lasi”

17, 18. (a) Edena dala ai Elikana ese Hana ia karaia gwauhamata ia durua? (b) Edena dala ai Penina ese Hana ia hahisia lou lasi?

¹⁷ Daba ai, Hana be Elikana ida palai dubu dekenai ia giroa lou. Reana Hana ese Dirava ia noia bona gwauhamatalaia gauna be ena adavana dekenai ia gwauraia, badina Mose ena Taravatu ia gwau bema hahine ese gwauhamata ta ia karaia to ena tau amo gwaumaoro ia abia lasi, tau be mai ena maoro unai gwauhamata ia koua totona. (Num. 30:10-15) To, unai abidadama tauna be unai gwauhamata ia koua lasi. Ia bona Hana be palai dubu dekenai Iehova idia tomadiho henia hebou, bena edia gabu dekenai idia giroa.

¹⁸ Penina be edena nega ai ia laloparara Hana be iena kara auka dainai ia lalohisihisi lou lasi? Baibel be unai ia herevalaia lasi, to ia gwau “lalohisihisi toana ia hahedinaraia lou lasi” unai nega amo Hana be ia moale bona ia lalohekwarahi lasi. Oibe, Penina ia itaia iena kara auka ese Hana ia hahisia lou lasi. Bona Baibel ese Penina ena ladana ia gwauraia lou lasi.

19. Hana be dahaka hahenamo ia abia, bona edena dala ai ia hahedinaraia unai harihari gauna ia abia dalana ia lalopararalaia?

¹⁹ Hua haida idia hanaia murinai, Hana ia moale bada herea. Ia be ia rogorogo! Ia moale bona unai hahenamo ia abia dalana ia laloatao. Mero ia vara neganai, ena ladana ia hatoa Samuela, anina be “Dirava Ena Ladana” bona unai be Dirava ena ladana boiboi henia karana ia herevalaia, Hana ese ia karaia hegeregerena. Unai lagani ai, Silo dekenai idia lao totona, Hana be Elikana, Penina bona edia natudia ia bamoa lasi. Lagani toi lalonai, Hana be beibi ida ruma ai ia noho ela bona mero be rata ia rakatania. Bena palai dubu ai ena natuna lalokauna do ia abia lao dinana totona ena lalona ia hagoadaia.

20. Hana bona Elikana ese edena dala ai Iehova dekenai idia karaia gwauhamata idia badinaia?

²⁰ Hana ese ena natuna mero ia rakatania be auka. Oibe, Hana ia diba Samuela be palai dubu ai idia gaukara hahine ese do idia naria namonamo. To, ia be mero maragina dainai, Hana ia lalohekwarahi. Ena be ena hemami be unai bamona, Hana bona Elikana ese mai moale ida mero idia abia lao bona idia maumau lasi. Dirava ena ruma ai boubou gaudia idia henia, bena Samuela be Eli dekenai idia hahedinaraia bona lagani haida gunanai Hana ese ia karaia gwauhamatana be ia dekenai idia herevalaia.

21. Edena dala ai Hana ena guriguri ese ena abidadama ena goada ia hahedinaraia? (Maua ladana “Guriguri Idau Herea Rua” itaia danu.)

²¹ Dirava ia itaia Hana ena guriguri be namo herea dainai, Baibel lalonai ia atoa. Samuela Ginigunana 2:1-10 oi duahia neganai, siri ta ta lalonai Hana ena abidadama ena goada do oi itaia. Hana be Iehova ese ena siahu ia gaukaralaia dalana ia hanamoa—hekokoroku tauna ia hamanaua, ogogami taudia ia hanamoa, ta ia hamauria bona ta ia hamasea diba. Ia ese ena Tamana ena helaga, kara maoromaoro bona ena badinaia karana ia hanamoa. Unai dainai, Hana ia gwau diba: “Dirava idauidau be iseda Dirava, Nadi Badana unai, bamona lasi.” Iehova be ia idau diba lasi bona ia ita tabekau henia diba, bona heduru totona ia dekenai idia heau lao ogogami bona lalohisihisi taudia ia hamauria.

22, 23. (a) Dahaka dainai ita abia dae Samuela ia tubu daekau neganai, ia diba iena tama sina ese idia lalokau henia? (b) Edena dala ma haida ai Iehova ese Hana ia hanamoa?

²² Mero maragina Samuela ena sinana be Iehova ia abidadama henia bada bona unai be hahenamo ta. Ia tubu daekau neganai, sinana ida ia noho lasi, to ia diba sinana ese ia laloa bada. Lagani ta ta ai, Hana be Silo dekenai ia giroa lou neganai, Samuela totona imana lasi dabua maragina ta ia abia mai, unai amo palai dubu ai ena gaukara totona ia hahedokilaia diba. Unai dabua be ia sibona ese ena natuna totona ia turia bona unai ese ia hahedinaraia ena natuna ia lalokau henia bada. (1 Samuela 2:19 duahia.) Ita piksaia diba, ia ese natuna dekenai unai dabua ia atoa bona ia hamaoromaoroa neganai, mai moale ida ia itaia bona hereva namodia amo natuna ia hagoadaia. Samuela dekenai ena sinana be harihari gauna ta bamona bona Samuela danu be harihari gauna ta bamona, ena tama sina bona Israela besena dekenai.

²³ Iehova ese Hana ia laloaboio lasi. Unai dainai Iehova ese ia hanamoa bona Elikana totona natudia 5 ia havaraia. (1 Sam. 2:21) To, Hana ena hahenamo badana be ia bona ena Tamana, Iehova, huanai ia noho hetura karana. Lagani momo idia hanaia lalonai edia hetura karana be ia goada ia lao. Oibe, Hana ena abidadama karana oi tohotohoa neganai, oi dekenai unai do ia vara danu.