Keriso Be Mai Hairai Ida Ia Hedinarai

Iesu be Kaisarea Filipi ai hutuma ia hadibaia noho lalonai, unai hanua be kilomita 25 bamona Heremona Ororo amo, iena aposetolo taudia dekenai inai hadibaia herevana ia gwauraia: “Umui lau hamaoroa momokani, iniseniai idia gini taudia haida be do idia mase lasi ela bona taunimanima ena Natuna be ena Basileia lalonai do ia mai idia itaia guna.”​—Mataio 16:28.

Reana hahediba taudia be Iesu ena hereva ena anina idia laloa momo. Wiki ta bamona murinai, aposetolo toi ia abidia—Petero, Iamesi, bona Ioane—bona ororo badana ta dekenai idia daekau. Reana unai be hanuaboi dainai, unai tatau toi edia matana idia mahuta. Iesu ia guriguri noho lalonai, edia vairanai iena toana ia idau. Aposetolo taudia idia itaia ena vairana be dina bamona ia diaridiari, bona ena dabua be idia kurokuro momokani.

Bena taunimanima rua, “Mose bona Elia” idia hedinarai. Bena Iesu dekenai “tanobada do ia rakatania dalana idia herevalaia, unai be kahirakahira Ierusalema dekenai do ia vara.” (Luka 9:30, 31) Anina be Iesu do ia mase bona toreisi lou, guna idia dekenai ia herevalaia gauna unai. (Mataio 16:21) Edia herevahereva ese ia hamomokania, Iesu be kara dika tauna bamona do idia hamasea bona ta ese unai do ia koua lasi, Petero ia laloa bamona.

Aposetolo taudia toi be ia vara gauna dekenai idia hoa, bona idia noga bona edia hereva idia kamonai. Unai be matahanai ta, to toana be ia vara momokani dainai, Petero be Iesu dekenai ia gwau: “Rabi e, ai moale iniseni ai noho! Mani palai ruma toi ai haginia, ta be oiemu, ma ta be Mose ena, bona ma ta be Elia ena.” (Mareko 9:5) Petero ia ura palai rumadia ia haginia, unai amo unai matahanai be do ia doko lasi, a?

Petero ia do hereva noho lalonai, ori diarina ta ese idia ia koua, bona ori amo gado ta ia mai, ia gwau: “Inai be egu Natuna, egu lalokau, ia lau lalonamo henia. Ia umui kamonai henia.” Aposetolo taudia be unai idia kamonai neganai, idia goru diho mai gari ida, to Iesu ese ia hamaorodia: “Umui toreisi. Umui gari lasi.” (Mataio 17:5-7) Idia toreisi neganai, ta idia itaia lasi, to Iesu sibona. Matahanai ia ore. Daba ia rere bona ororo amo idia diho neganai, Iesu ese ia haganidia: “Inai matahanai be tau ta dekenai do umui gwauraia lasi ela bona taunimanima ena Natuna be mase amo ia toreisi lou.”​—Mataio 17:9.

Matahanai lalonai aposetolo taudia ese Elia idia itaia dainai, idia henanadai: “Dahaka dainai taravatu hadibaia taudia idia gwau Elia be do ia mai guna?” Iesu ia haere: “Elia be ia mai vadaeni, bona ia idia diba lasi.” (Mataio 17:10-12) Iesu be Ioane Bapatiso ia herevalaia, badina ia bona Elia edia gaukara be tamona. Elia ese Elisaia ena dala ia hegaegaelaia, bona Ioane be Keriso ena dala ia hegaegaelaia.

Unai matahanai ese Iesu bona aposetolo taudia ia hagoadaia! Basileia lalonai Keriso be mai hairai ida unai bamona do ia hedinarai. Hahediba taudia ese “taunimanima ena Natuna be ena Basileia lalonai do ia mai” dalana idia itaia, Iesu ia gwauhamata hegeregerena. (Mataio 16:28) Ororo ai idia noho neganai, idia be ‘iena hairai idia itaia.’ Ena be Farisea taudia idia ura Iesu ese toa ta amo ia hamomokania ia be Dirava ese ia abia hidi King, to ia karaia lasi. To Iesu ena hahediba taudia korikoridia be Iesu ena toana ia idau matahanaina idia itaia, bona unai ese idia dekenai ia hamomokania Basileia ena peroveta herevadia be do idia guguru. Unai dainai gabeai Petero ia gwau: “Emai abidadama peroveta herevadia dekenai ia hagoadaia momokani.”​—2 Petero 1:16-19.