Iesu Be Demoni Ese Ia Biagua Merona Ia Hanamoa

Iesu, Petero, Iamesi, bona Ioane be ororo amo idia diho neganai, hutuma idia davaria. Reana hekwakwanai ta ia vara. Taravatu hadibaia taudia be hahediba taudia idia hagegea bona idia hepapahuahu. Taunimanima be Iesu idia itaia neganai idia hoa, bona idia heau lao ia idia hedavari henia totona. Ia nanadaidia: “Idia ida dahaka umui hepapahuahulaia noho?”​—Mareko 9:16.

Hutuma huana amo tau ta be Iesu vairanai ia tui diho bona ia gwau: “Hadibaia Tauna e, oi dekenai egu natuna mero lau mailaia, badina ia be hereva diba lasi lauma dikana ese ia biagua. Ia lalonai ia vareai neganai, mero be tano dekenai ia negea, bona ena uduna amo ranu ia diho, ena isena ia koria bona ena goada ia ore. Emu hahediba taudia lau nanadaia unai lauma dikana idia lulua totona, to idia hegeregere lasi.”​—Mareko 9:17, 18.

Taravatu hadibaia taudia be hahediba taudia idia hevasehalaia, badina unai mero idia hanamoa diba lasi. Unai dainai Iesu be mero ena lalohisihisi tamana ia hereva henia lasi, to hutuma dekenai ia gwau: “Abidadama lasi bona kara gageva uruna e, umui ida do lau noho ela bona edena nega? Umui emui kara do lau haheaukalaia ela bona edena nega?” Unai hereva aukadia be taravatu hadibaia taudia totona, badina ia noho lasi neganai, idia be hahediba taudia ida idia hepapahuahu. Bena ia lalohisihisi tamana ia itaia bona ia gwau: “Lau dekenai mero umui mailaia.”​—Mataio 17:17.

Mero be Iesu kahirakahira ia lao neganai, demoni ese mero be tano dekenai ia negea bona ia hamarerea bada. Tano ai ia giroagiroa bona ena uduna amo kanudi ia diho. Iesu ese ena tamana ia nanadaia: “Inai gauna be edena negai ia vara matamaia?” Tamana ia haere: “Ia maragi negana amo, nega momo mero be lahi bona ranu lalonai ia negea, ia hamasea totona.” Tamana ia noinoi: “Bema ia oi hanamoa diba, mani ai oi hebogahisi henia bona ai oi durua.”​—Mareko 9:21, 22.

Mero ena tamana ia ura dikadika Iesu ese ia durua, badina ena hahediba taudia be idia hegeregere lasi. Iesu ese ia hagoadaia ia gwau: “Dahaka dainai oi gwau, ‘Bema oi hanamoa diba’! Oibe, mai ena abidadama tauna dekenai gau ibounai idia vara diba.” Maoromaoro mero ena tamana ia boiboi, ia gwau: “Lau be mai egu abidadama! Lau oi durua egu abidadama lau hagoadaia totona!”​—Mareko 9:23, 24.

Iesu ia itaia hutuma be ia dekenai idia heau mai. Hutuma vairanai Iesu ese demoni ia gwau henia, ia gwau: “Hereva diba lasi bona taia kudima laumana, oi lau oda henia mero amo oi raka-lasi bona ia lalonai do oi vareai lou lasi!” Demoni ia raka-lasi neganai, mero be ia boiboi bada bona ia heudeheude bada. Bena mero ia hekure, marere lasi. Momo be unai idia itaia neganai, idia gwau: “Ia mase vadaeni!” (Mareko 9:25, 26) To Iesu ese mero ena imana ia dogoatao neganai, ia gini bona ‘unai hora ai ia namo.’ (Mataio 17:18) Iesu ia karaia karana dainai taunimanima idia hoa.

Guna, Iesu ese hahediba taudia be haroro totona ia siaia neganai, lauma dikadia idia lulua diba. Unai dainai ruma ta lalonai sibodia idia noho neganai, idia henanadai: “Dahaka dainai lauma dikana ai lulua diba lasi?” Iesu ese ia hamaorodia badina edia abidadama ia manoka, ia gwau: “Guriguri sibona amo unai bamona lauma dikana ia raka-lasi diba.” (Mareko 9:28, 29) Bema edia abidadama ia goada bona Dirava ena heduru totona idia guriguri, unai demoni idia lulua diba.

Iesu ia gwau: “Umui lau hamaoroa momokani, bema emui abidadama be mastadi uhe maragina bamona, inai ororo dekenai do umui gwau, ‘Inai gabu amo oi lao unuseniai,’ bona do ia lao, bona do umui hegeregere gau ibounai umui karaia totona.” (Mataio 17:20) Oibe, abidadama be mai ena siahu!

Nega haida ita davaria hekwakwanai be ororo badadia bamona, bona ita mamia ita hegeregere lasi Iehova ita hesiai henia totona. To bema iseda abidadama ia goada, unai ororo bamona hekwakwanai ita hanaidia diba.