Mai Momokani ida Gau Ibounai Karaia

Taunimanima ibounai idia ura edia turadia be kara momokani taudia. Danu, Iehova ia ura ena turadia ese kara momokani do idia karaia. To unai be mai ena hekwarahi badina tanobada ai taunimanima momo be idia kara koikoi. Dahaka gau namodia do idia vara bema gau ibounai lalonai ita kara momokani?

1. Dahaka dainai ita kara momokani be mai anina bada?

Haida dekenai ita kara momokani neganai, Iehova lalokau henia bona matauraia karana ita hahedinaraia. Mani inai oi laloa: Iehova ese ita laloa bona karaia gaudia ibounai ia diba. (Heberu 4:13) Kara momokani karaia totona abia hidi ita karaia neganai, unai ia itaia bona ia moale. Iena Hereva ia gwau: “Iehova ese koikoi tauna ia inai henia, to kara maoromaoro tauna be Dirava ena turana namona.”—Aonega Herevadia 3:32.

2. Dina ta ta maurina ai ita kara momokani ena dala haida be dahaka?

Iehova ia ura “ta ta dekenai hereva momokani [ita] gwauraia.” (Sekaraia 8:​16, 17) Unai ena anina be dahaka? Herevana iseda famili, gaukara turadia, Keristani tadikaka bona taihu, o gavamani ena gaukara taudia ita hereva henidia, namo lasi hereva koikoi ita gwauraia o infomeisen kererena ita henia. Kara momokani taudia be haida dekenai idia henaohenao lasi eiava idia koidia lasi. (Aonega Herevadia 24:28 bona Efeso 4:28 duahia.) Bona idia dekenai ia noho takisi ena davana ibounai idia henia. (Roma 13:​5-7) Unai dala idauidau amo, ita ese ‘mai momokani ida gau ibounai ita karaia.’—Heberu 13:18.

3. Ita kara momokani ena namo haida be dahaka?

Bema ita be kara momokani taudia, haida do idia abia dae ita karaia o gwauraia gaudia be momokani. Bona ita ese kongrigeisen lalonai ibounai do ita durua idia noho namonamo, lalokau ruma besena ta hegeregerena. Bona ita ese lalomamina namona do ita moalelaia. Danu kara momokani ese iseda “Hamauria Tauna, Dirava, ena hahediba herevadia do idia hahairaia,” bona unai ese haida do ia veria mai Iehova idia dibaia bona hesiai henia totona.—Tito 2:10.

DIBA MA HAIDA ABIA

4. Iehova ese kara momokani ia ura henia

Salamo 44:21 bona Malaki 3:16 duahia, bena inai henanadai herevalaia:

• Dahaka dainai hereva momokani hunia lalohadaina ita abia be aonega karana lasi?

• Ena be ia auka to bema hereva momokani ita gwauraia hedinarai, oi laloa Iehova ena hemami be edena bamona?

5. Nega ibounai kara momokani karaia

VIDIO: Dahaka ese Moale ia Havaraia?—Lalomamina Goevana (2:​32)

Heberu 13:18 duahia, bena do ita kara momokani diba daladia do ita herevalaia, hegeregere . . .

• iseda famili ida.

• gaukara o sikuli gabuna ai.

• bona nega ma haida ai.

6. Kara momokani ese ita dekenai namo ia havaraia

Ita kara momokani dainai reana hekwakwanai haida do idia vara. To nega ibounai kara momokani ita karaia be kara namona. Salamo 34:​12-16 duahia, bena inai henanadai herevalaia:

• Edena dala ai kara momokani ese emu mauri ia hanamoa?

1. Idia kara momokani headava tatau bona hahine ese edia headava idia hagoadaia

2. Mai momokani ida moni gaukara idia karaia taudia be edia bosi ese idia ura henia

3. Kara momokani idia badinaia taudia be gavamani ena gaukara taudia dekenai mai edia ladana namona

POINT BADANA

Iehova ia ura ena turadia be edia hereva bona kara ibounai lalonai do idia kara momokani.

Riviu

• Kara momokani badinaia daladia haida be dahaka?

• Dahaka dainai hereva momokani ita hunia lalohadaina ita abia be aonega karana lasi?

• Dahaka dainai oi ura nega ibounai oi kara momokani?

REFERENS ITAIA

Tama sina ese edena dala ai natudia idia hadibaia idia kara momokani totona?

Hereva Momokani Gwauraia (1:​44)

Iseda gwauhamata ita hamomokania karana ese dahaka namo ia havaraia?

Gwauhamata Badinaia, Bona Hahenamo Abia (9:​09)

Ena be takisi moni idia gaukaralaia kerere, to takisi do ita henia eiava lasi karana dekenai diba ma haida oi abia.

“Takisi Moni Oi Henia be Namo, A?” (Gima Kohorona, September 1, 2011)

Dahaka ese kara koikoi tauna ta ia durua dainai ena mauri ia haidaua bona mai momokani ida ena gaukara ia karaia?

“Iehova Ena Hebogahisi Bona Dika Gwauatao Karana Lau Dibaia” (Gima Kohorona, May 1, 2015)