Edena Dala ai Dirava Ena Matana ai Ita Goeva Diba?

Sina lalokauna ta ena natuna mero be sikuli ia lao totona, ia hadigua bona ia dekenai dabua namona ia hahedokilaia. Unai amo natuna ena toana ia namo bona taunimanima do idia diba tama sina ese idia naria namonamo. Unai hegeregerena, iseda Tamana, Iehova, ia ura iseda tauanina bona iseda lalohadai, hereva bona kara danu idia goeva. Ita goeva neganai, namo ita davaria bona unai ese Dirava ia hanamoa.

1. Edena bamona tauanina dalanai ita goeva diba?

Iehova ese ita ia hamaoroa, ia gwau: “Do umui helaga.” (1 Petero 1:16) Helaga karana ena anina be iseda tauanina bona kara idia goeva be namo. Tauanina dalana ai ita goeva diba bema hanaihanai ita digu, iseda dabua, ruma bona motuka ena toana ia namo bona idia goeva. Danu iseda Kingdom Hall hagoevaia gaukarana ita durua diba. Tauanina dalana ai ita goeva noho neganai, Iehova dekenai hanamoa do ita henia.—2 Korinto 6:​3, 4.

2. Ita goeva totona, edena bamona karadia ita dadaraia be namo?

Baibel ese ita ia hagoadaia “tauanina bona lalona hamiroa gaudia ibounai amo ita goeva.” (2 Korinto 7:1) Unai ena anina be ita gaukara goada iseda tauanina bona lalohadai idia hadikaia diba gaudia ita dadaraia totona. Ita laloa gaudia ese Iehova ia hamoalea be namo, unai dainai ita gaukara goada lalohadai kereredia ita dadaraia totona. (Salamo 104:34) Danu, namona be hereva namodia ita gaukaralaia.—Kolose 3:8 duahia.

Dahaka gaudia ese iseda tauanina o lalohadai bona kara ia hamiroa diba? Gau haida ese iseda tauanina ia hadikaia diba. Unai dainai kuku bona buatau ita ania lasi bona idia taravatua drag o muramura ita gaukaralaia lasi. Unai gaudia ita dadaraia neganai, iseda helt ia namo bona ita hahedinaraia harihari gauna mauri ita matauraia. Danu iseda tauanina bona lalohadai ia goeva totona, namona be tauanina gadaralaia karana bona ponografi laulau itaia karana ita tuari henia. (Salamo 119:37; Efeso 5:5) Unai bamona kara mirodia ita dadaraia be mai ena hekwarahi, to Iehova ena heduru amo ita karaia diba.—Isaia 41:13 duahia.

DIBA MA HAIDA ABIA

3. Tauanina dalanai goeva karana ese Iehova ia hanamoa

Iehova ese Israela besena dekenai ia henia taravatu ita duahia neganai, ita laloparara ia dekenai iena taunimanima edia goeva karana be mai anina bada. Esodo 19:10 bona 30:​17-19 duahia, bena inai henanadai herevalaia:

• Unai siridia ese Iehova ena lalohadai goeva karana dekenai dahaka ia hahedinaraia?

• Dahaka kara namodia ese oi do ia durua oi goeva noho totona?

Tauanina dalana ai ita goeva noho totona, iseda nega bona goada do ita gaukaralaia. Herevana edeseniai ita noho eiava ita be taga o ogogami, to unai ita karaia diba. VIDIO itaia, bona henanadai herevalaia.

VIDIO: Dirava ese Goeva Taudia Ia Lalokau Henia (4:​10)

• Edena bamona iseda kohu ena toana ia namo bona ia goeva noho karana ese iseda haroro gaukara ia hanamoa?

4. Kara dikadia hadokoa momokani

Bema kuku anina karana eiava drag gaukaralaia karana oi moalelaia, reana do oi mamia unai kara oi hadokoa be auka. To, dahaka ese oi ia durua diba? Unai kara ese oi dekenai do ia havaraia dika oi laloa. Mataio 22:​37-39 duahia, bena kuku o drag gaukaralaia karana ese ia havaraia dika herevalaia, hegeregere . . .

• ta ena hetura karana Iehova ida ia hadikaia.

• ta ena hetura karana ena famili bona ma haida ida ia hadikaia.

Palani oi karaia oi manadalaia kara dikana ta dadaraia totona.a VIDIO itaia.

VIDIO: Sibona Oi Biagua (2:​47)

Filipi 4:13 duahia, bena inai henanadai herevalaia:

• Edena dala ai guriguri, Baibel stadilaia bona hebou lao henia karana ese ta dekenai goada ia henia kara dikana ta ia hadokoa totona?

5. Lalohadai bona kara mirodia tuari henia

Kolose 3:5 duahia, bena inai henanadai herevalaia:

• Edena dala ai ita diba Iehova ena matana ai, ponografi, mobael fon amo matabodaga laulau dikadia o hereva mirodia siaia karana (sexting), bona kopina ena hehuni kahadia gadaralaia karana (masturbation) be kara mirodia?

• Oi laloa ita goeva diba, Iehova ena ura hegeregerena, a? Dahaka dainai?

Lalohadai dikadia ita tuari henia daladia oi itaia. VIDIO itaia.

VIDIO: Oi Goeva Totona Kara Ta Oi Karaia (1:​51)

Iesu ese haheitalai ta amo ia hahedinaraia ita goeva noho totona kara ta ita karaia be namo. Mataio 5:​29, 30 duahia, bena inai henanadai herevalaia:

• Iesu ia gwau lasi sibona iseda tauanina do ita hahisia, to iena hereva anina be ita ese kara ta do ita karaia. Ta ese lalohadai mirodia ia dadaraia totona dahaka ia karaia diba?b

Bema lalohadai mirodia tuari henia totona oi hekwarahi noho, Iehova ese emu hekwarahi ia laloa bada. Salamo 103:​13, 14 duahia, bena inai henanadai herevalaia:

• Bema kara mirona ta dadaraia totona oi hekwarahi noho, edena dala ai inai siri ese oi ia hagoadaia diba unai kara oi tuari henia totona?

Oi hesiku lasi!

Reana inai lalohadai oi abia diba, ‘Lau kwalimu lasi dainai, lau hesiku.’ To mani inai oi laloa: Ta be heau helulu lalonai ia moru neganai, unai ese ia hahedinaraia lasi ia be unai heau helulu lalonai ia lusi, eiava do ia giroa lou lasi ia hamatamaia gabuna ai ia heau lou totona. Unai hegeregerena, kara dikana oi karaia ese ia hahedinaraia lasi oi be unai kara dikana tuari henia totona oi kwalimu lasi. Danu, unai ese ia hahedinaraia lasi oi be oi hekwarahi kava. Kara dikana ta oi karaia neganai, oi lalomanoka lasi. Oi gaukara goada noho be namo! Iehova ena heduru amo oi kwalimu diba.

POINT BADANA

Iehova do ita hamoalea, bema iseda tauanina, iseda lalohadai, bona iseda kara ia goeva.

Riviu

• Dahaka dainai ita goeva noho be mai anina bada?

• Edena bamona tauanina dalana ai oi goeva diba?

• Edena dala ai emu lalohadai bona kara idia goeva noho diba?

REFERENS ITAIA

Dahaka oi karaia diba tauanina dalana ai oi goeva totona, ena be oi ogogami?

Helt Bona Goeva Karana—Imana Huria (3:​01)

Kuku ania karana oi hadokoa totona oi badinaia diba daladia.

“Kuku Ania Karana Dadaraia Dalana” (Noga!, May 2010)

Ponografi ese ia havaraia dika idauidau oi laloa.

“Ponografi be mai Ena Dika Eiava?” (Gima Kohorona, August 1, 2013)

Tau ta ese ponografi itaia karana ia hadokoa dalana oi itaia.

“Nega Momo Lau Moru, to Gabeai Lau Kwalimu” (Gima Kohorona No. 4 2016)