Sivarai Namona be Gado 500 ai Idia Hahanaia

RWANDA ai bese rua huanai tuari ia vara neganai, gado hahanaia orea maragina ta be edia ruma bona kohu idia rakatania bona idia heau. To, edia kompiuta (laptop) be refiuji kamepa dekenai idia abia lao danu. Dahaka dainai? Badina unai amo Kinyarwanda gado ai buka bona magasin hahanaia gaukarana idia karaia noho diba.

Sautist Asia ai ia noho hahine matamata ta be ena kompiuta vairanai ia helai bona ia gaukara ela bona hanuaboi momokani. Ena be ia hesiku, gabu ia siahu bada, bona paua ia bodo kava dainai ena hahanaia gaukarana ia hadikaia, to ia haheauka. Dahaka dainai unai bamona ia karaia? Badina unai amo ia hahanaia gaudia be nega korikori ai do idia printaia.

Unai be gado hahanaia taudia haida sibona ita herevalaia, to tano 190 mai kahana lalonai gado hahanaia taudia 2,300 bamona idia noho. Edia mauri lagani be 20 amo ia lao kahirakahira 90, bona idia gaukara goadagoada, unai amo gado 500 ai Baibel ena sivarai namona ese taunimanima ia hagoadaia diba.​—Apokalupo 7:9.

Gado Idauidau Dekenai Hahanaia Gaukara Idia Karaia

Lagani haida idia hanaia vadaeni, Iehova ena Witnes taudia ese idia karaia gado hahanaia gaukarana be ia bada ia lao. Hegeregere, lagani 1985 ai, Watchtower be gado 23 ai idia halasia​—unai nega ai unai be namba badana. Hari, Watchtower be gado 176 ai idia hahanaia vadaeni, bona nega korikori ai idia halasia dainai, tanobada hegegemadai Witnes taudia ibounai be nega tamona ai Watchtower idia stadilaia.

Gado 50 bamona ai, Watchtower sibona be hanaihanai idia halasia. Dahaka dainai? Printa kampani momo be idia ura lasi edia gado ma haida ai buka idia printaia. To, tanobada hegegemadai Iehova ena Witnes taudia be edia moni bona kohu idia henia inai gaukara durua totona, unai amo Baibel bona Baibel ia herevalaia bukadia be taunimanima ibounai ese idia duahia diba.​—2 Korinto 8:14.

Taunimanima be idia ura edia gado ai Baibel ena sivarai idia kamonai. Hegeregere, Nicaragua dekenai, taunimanima 200,000 bamona be Miskito gado idia gaukaralaia, bona vanegai unai gado dekenai Baibel ia herevalaia bukadia idia halasia. Hahine ta be ia ura Miskito gado ai Lauegu Baibel Sivarai Bukanaa ia abia. Witnes taudia ese unai buka be unai hahine dekenai idia abia lao neganai, pasto ta ia noho danu. Unai pasto ese unai buka namo hereana ia itaia neganai, ia ura unai hahine amo ia abia ia sibona totona. Unai dainai pasto be unai hahine ia hamaoroa bema unai buka ia henia, kofi bini 20 kilogram do ia henia, to unai hahine ia ura lasi ia henia!

Idia hanaia lagani 10 lalonai, Baibel ia herevalaia bukadia be Mexico ena gado haida, hegeregere Maya, Nahuatl, bona Tzotzil dekenai idia hahanaia. Lagani 10 ia do hanaia lasi neganai, unai tano ena gado bona sain gado kongrigeisen be 72 amo ia bada daekau 1,200. Iehova ena Witnes taudia ese Baibel ena sivarai ena uhe be taunimanima edia kudouna dekenai idia hadoa, bona Dirava ese ia hatubua.​—1 Korinto 3:5-7.

Gado 80 Dekenai Idia Hahanaia Baibel

Lagani haida idia hanaia vadaeni, Iehova ena Witnes taudia be idia gaukara goada New World Translation of the Holy Scriptures Baibel ibounai o ena kahana ta be gado 80 ai idia halasia totona. Dahaka ia vara? South Africa ai Witnes tauna ta be Tswana gado Baibel ia herevalaia neganai, ia gwau: “Inai be buka namo hereana. Lau do ia durua Dirava ena Hereva lau lalopararalaia bona laloa bada totona. Gado idia torea dalana be namo herea dainai ia auka lasi duahia totona.” Mozambique ai ia noho tauna ta be Tsonga gado ia duahia diba, ia gwau: “Ena be Baibel ia herevalaia buka idauidau ai abia be hegeregere guba ena boiboi bona kevaru edia regena ai kamonai, to Baibel ai abia lasi be hegeregere medu ia diho lasi! To, Tsonga gado ai New World Translation Baibel idia halasia neganai, unai be hegeregere medu ia diho.”

Baibel ena sivarai namodia idia hahanaia bona hariharilaia taudia be dala badana ai idaunegai peroveta herevana ta idia hagugurua noho. Unai be Iesu Keriso ese ia gwauraia: “Basileia ena Sivarai Namona be tanobada ibounai dekenai do idia harorolaia. Vadaeni unai murinai, dokona be do ia ginidae.”​—Mataio 24:14.

[Futnout]

[Graph on page 25]

(For fully formatted text, see publication)

NEW WORLD TRANSLATION

Baibel ibounai o ena kahana idia hahanaia

1950 1*

1970 7*

1990 13*

2000 36*

2010 80*

BUKA BONA MAGASIN

1950 88*

1960 125*

1970 165*

1980 190*

1990 200*

2010 500*

*GADO IDAUIDAU EDIA NAMBA

[Foto rau 24, 25 ai]

Gado hahanaia taudia 2,300 bamona be gado 500 ai Baibel bukadia idia hahanaia

BENIN

SLOVENIA

ETHIOPIA

BRITAIN