Inai Tau ese Tanobada Ia Haidaua

Inai tanobada ai taunimanima bilioni momo idia noho bona idia mase vadaeni. Momo be gau badadia idia karaia lasi dainai, idia ita laloaboio. To, ma haida be taunimanima edia mauri dalana idia haidaua, reana dina ta ta ai oi karaia gaudia danu.

DABAI, mahuta amo oi noga, oi toreisi bona lamepa oi haonia. Oi laloatao, namona be doketa idia henia muramura ladana antibiotic oi inua, badina oi ura emu gorere ia ore. Bena buka o magasin ta oi abia oi duahia totona, bona bedi ai oi hekure lou. Toana be emu dina oi matamaia negana amo, ladana bada taudia haida ese idia karaia gaudia oi gaukaralaia vadaeni.

Michael Faraday Inai England ena diba bada tauna be lagani 1971 ai ia vara, bona ia ese paua gaudia (electric motor bona dynamo) ia karaia. Ia karaia gaudia dainai, taunimanima be paoa idia gaukaralaia diba.

Ts’ai Lun Ia be China ena king ena ruma dekenai ia gaukara tauna, bona momo ese ena ladana idia hanamoa badina lagani 105 C.E. ai, ia be pepa karaia dalana ia davaria, bona hari pepa momo herea ita gaukaralaia diba.

Johannes Gutenberg Inai Germany tauna be lagani 1450 ai printa masini ginigunana ia karaia. Unai printa masini amo idia printaia gaudia edia davana be ia maragi dainai, buka momo idia printaia diba, bona unai buka amo taunimanima be gau idauidau idia dibaia diba.

Alexander Fleming Inai Scotland tauna be lagani 1928 ai tahua gaukara ta ia karaia neganai, muramura ta ladana antibiotic ia davaria, bona iena ladana ia gwauraia penicillin. Hari, tanobada hegegemadai, momo be antibiotic idauidau idia gaukaralaia gorere idia hanamoa totona.

Momokani, taunimanima haida ese idia davaria eiava karaia gaudia dainai, hari taunimanima bilioni momo be hahenamo haida o mauri namona idia moalelaia.

To, tau ta be idia ibounai ia hereaia. Ia be saiens gaudia haida ia davaria lasi eiava muramura matamatadia ia karaia tauna lasi. Ia be taga tauna lasi bona lagani 2,000 bamona gunanai ia mase vadaeni. To, iena hereva ese taunimanima dekenai helaro bona goada ia henia. Ena hereva ese taunimanima ibounai ia durua dainai, momo idia gwau ia be tanobada ia haidaua tauna.

Inai tau ena ladana be Iesu Keriso. Ia be dahaka hereva ia harorolaia? Iena hereva ese emu mauri be edena bamona ia haidaua diba?