Alkahol Dekenai Dirava Ena Lalohadai be Dahaka?

ALKAHOL be eda Havaraia Tauna, eda namo ia laloa bada Diravana ese ia henia gauna ta.a Momokani, Baibel ia gwau Dirava ese wain ia henia taunimanima edia lalona do idia hamoalea, dehoro ia henia edia vairana do idia hadiaria, bona beredi ia henia, taunimanima edia tauanina do ia goada totona. (Salamo 104:15) Nega ta ai, Iesu be headava aria ta ia lao neganai, ia ese ranu be wain namo herea ai ia halaoa.​​—⁠Ioane 2:​3-​10.

Unai ese ia hahedinaraia, iseda Havaraia Tauna ia diba alkahol be edena dala ai tauanina bona kwarana harana ena heau dalana do ia durua o hadikaia. Baibel dekenai, iseda guba Tamana ese ‘eda namo habadaia dalana, be ita dekenai ia hadibaia noho,’ bona muramura aukadia inua momo karana ia taravatua. (Isaia 48:17) Iena hadibaia hereva haida mani ita laloa:

“Inuinu dekena amo do umui kekero lasi, inai be emui mauri do ia hadikaia.” (Efeso 5:​18) “Kekero taudia . . . ta lasi be Dirava ena Basileia do ia davaria diba.” (1 Korinto 6:​9-​11) Baibel ese “kekero, regerege bada pati karadia, bona unai bamona karadia” ia taravatua.​​—⁠Galatia 5:​19-​21, NW.

Alkahol momo inua karana ena dika haida mani ita itaia.

Kekero Ena Dika

Alkahol lalonai idia noho muramura be dala haida amo eda tauanina bona harana ia durua diba. To, alkahol momo inua karana ese hekwakwanai haida ia havaraia diba, hegeregere:

Alkahol momo inua karana ese kekero tauna ena laloa namonamo karana ia hakererea, unai dainai ‘ena laloa be do ia gagevagageva.’ (Aonega Herevadia 23:33) Rau 3 dekenai ai kikilaia kekero tauna, Allen, ia gwau: “Kekero karana be tauanina ena gorere ta sibona lasi; ia be ta ena lalona bona kara ia biagua gorerena ta bamona. Bema oi kekero, oi be ma haida dekenai oi havaraia hisihisina do oi laloa bada lasi.”

Alkahol momo inua karana ese ta ia hakavakavaia diba. Baibel ia gwau: “Inua kekero idauidau, uaina matamata, bona uaina gunana danu ese egu bese taudia edia laloa idia hadikaia noho!” (Hosea 4:​11) Edena dala ai? Alkahol momo ia inua tauna ese guna ia dadaraia laloa dikadia bona ura dikadia do ia abia dae​​—⁠do ia laloa ura dikadia bona laloa dikadia ia hagugurua be kerere lasi. Alkahol momo inua karana ese kara maorona karaia urana ia hamanokaia diba. Eiava ita do ia doria kara dika ita karaia o Dirava ena taravatu utua karana ita karaia.

Haheitalai be inai: John be ena adavana ida idia heai murinai, John be mai badu ida ruma ia rakatania, bona ba dekenai ia lao. Bia haida ia inua ena badu ia hamaragia totona. Daudau lasi murinai, hahine ta be ia dekenai ia lao. John be unai hahine ida bia ma haida idia inua murinai, unai hahine ida idia lao bona idia heudahanai. Gabeai, John ia lalohisihisi bada, badina ena be guna ia laloa ia ese heudahanai karana do ia karaia diba lasi, to alkahol momo ese ena laloa maoromaoro karana ia hadikaia dainai, unai kara dikana ia karaia.

Alkahol momo inua karana ese ta ena kara bona hereva dalana ia hakererea diba. Baibel ia henanadai: “Daika be lalohisihisi noho? Daika be ia heai kava noho? . . . Kekero muramura idia inua daudau taudia, bona uaina idauidau idia mikisi, vadaeni idia inua toho taudia.” (Aonega Herevadia 23:​29, 30) Oi kekero neganai, “oi be davara bada ena latanai oi mahuta tauna bamona, lagatoi ena au tubua ataiai palai, dekenai oi hekure bamona.” (Aonega Herevadia 23:34) Kekero tauna be mahuta amo ia noga neganai, ia gwau: “Idia ese lau idia botaia, to mamina lau abia lasi.”​​—⁠Aonega Herevadia 23:⁠35.

Alkahol momo inua karana be ta ena tauanina ia hadikaia diba. Dokonai “uaina [o alkahol] ese gaigai bamona oi do ia koria, bona gaigai korema hegeregerena, oiemu kopina be poisini dekenai do ia kodoa.” (Aonega Herevadia 23:32) Doketa momo idia gwau unai siri ena hereva be momokani. Alkahol lalonai be poisini muramura bamona gaudia idia noho dainai, alkahol momo inua karana ese gorere dikadia idia havaraia diba, hegeregere kensa gorere idauidau, hepataitis, asena ia hadikaia, bogana lalonai aniani ia makohia gauna ia hadikaia (pancreatitis), diabetiks tauna ena suga ia hadihoa, bogana lalonai beibi ena mauri ia hadikaia (fetal alcohol syndrome o FAS), strouk, kudouna gorere bona ma haida. Danu, dina tamona lalonai alkahol momo ia inua kekero tauna ia maserea (coma) o mase diba. To alkahol momo inua karana ese dika ma ta ia havaraia diba, unai be doketa taudia edia buka ese idia herevalaia lasi gauna.

Dika rohoroho gauna. Herevana tau ta ia kekero lasi, to sikele ia hanaia tauna ese Dirava tomadiho henia karana ia hadikaia diba. Baibel ia gwau: “Momokani, do umui dika! Umui ese daba maragi neganai umui toreisi noho, uaina bona bia do umui inua totona. Bona umui helai noho, bona inua noho ela bona hanuaboi momokani, ela bona umui kekero momokani. Umui be dika!” Dahaka dainai? Isaia ese alkahol momo inua karana ena dika be inai bamona ia herevalaia: “Lohiabada ena kara umui diba lasi, bona Lohiabada ena imana gaukara umui matauraia lasi.”​​—⁠Isaia 5:​11, 12.

Baibel ese ita ia sisiba henia, ‘kekero muramura momo idia inua taudia, danu do ita inua hebou lasi.’ (Aonega Herevadia 23:20) Baibel ese hahine badadia ia sisiba henia, “wain momo inua karana ese ia biagudia lasi.” (Tito 2:​3, NW ) Dahaka dainai? Badina haida be metairametaira​​—⁠nega momo unai idia itaia lasi​​—⁠​matamanai alkahol sisina idia inua ela bona gabeai momo idia inua. Nega momo inuinu tauna be reana ia “mahuta lasi bona do ia henanadai, ‘Edena negai daba do ia mai, unai amo inuinu gaudia ma haida lau inua diba?’ ” (Aonega Herevadia 23:​35, CEV ) Inuinu momo taudia edia hekwakwanai ta be inai: Ena be hanuaboi ai idia inuinu, to dabai idia ura ma haida idia inua, edia hemami hanamoa totona.

Baibel ena sisiba be inai: “Wain momo inua karadia, regerege bada pati, inuinu helulu, . . . umui karaia. To unai taudia ese edia kara ena anina be hahemaoro tauna vairanai do idia gwauraia hedinarai. Ia be ia noho hegaegae, idia mauri bona idia mase taudia ia hahemaoro henia totona.” (1 Petero 4:​3, 5, NW ) Danu, metau dikadia negana lalonai ita noho dainai, Iesu ena sisiba be inai: “Do umui naria namonamo, aniani momo, inuinu momo bona mauri ena lalohekwarahi amo emui lalohadai maorona umui hadikaia garina, bona karaharaga unai dina be umui latanai do ia ginidae tarapu ta bamona.”​​—⁠Luka 21:​34, 35, NW.

To, kekero taudia be dahaka idia karaia diba ‘inuinu momo amo edia lalohadai maorona idia hadikaia’ lasi totona?

[Footnote]

[Pictures on page 4, 5]

Alkahol momo inua karana ese hekwakwanai momo ia havaraia diba