“Taunimanima Edia Kudouna Lau Hamarerea”

BRAZIL ena saut kahana ena siti ta, Porto Alegre dekenai hebou badana ta idia karaia, tanobada ai idia vara hekwakwanai badadia idia herevalaia totona. Tano 135 amo taunimanima tausen momo be unai hebou dekenai idia lao. Laga-ani negana ai, Porto Alegre ai ia noho kongrigeisen ta amo Witnes taudia be unai vadivadi taudia haida dekenai Basileia sivaraina idia harorolaia. Edena dala ai idia herevahereva?

Painia taihu ta, Elizabete, ia gwau: “Ai ese buklet ladana, Good News for People of All Nations ai gaukaralaia. Unai hebou badana idia mai taudia momo be guna Basileia ena sivarai namona idia kamonai lasi, to hari mai edia ura ida ai harorolaia sivaraina idia kamonai. Ai be Bolivia, China, France, India, Israel, bona Nigeria taudia momo ai hereva henia. Ma haida be edia gado korikori ai Baibel buka bona magasin ai henidia, bona mai moale ida idia abia dae.”

Mexico ai painia tadikaka ta, Raúl, be unai buklet ia gaukaralaia bona anina namona ia vara. Nega ta, Raúl ese mauri lagani 80 Arab tauna ta ia davaria, unai tauna ena adavana be vanegai sibona ia mase. Unai tauna be buklet ai Basileia sivaraina be ena gado korikori ai ia duahia murinai, ia tai. Dahaka dainai? Apokalupo 21:​3, 4 ai, Dirava ia gwauhamata mase be do ia ore be unai buklet ai ia duahia neganai, iena kudouna ia hamarerea. Ma nega ta ai, Raúl be nega bona gabu idauidau ai ia haroro lalonai, Portuguese tauna ta ia davaria. Unai tauna ena natuna mero be ia mase. Raúl be unai tau ia noia Portuguese gado ai buklet ena hereva ia duahia totona. Ia duahia murinai, unai tau ia ura Baibel amo diba ma haida ia abia, bona Baibel stadi ia abia dae.

Raúl be Good News for People of All Nations buklet ia gaukaralaia Armenia, China, English, French, German, Hindi, Korea, Mixe, Persia, Russia bona Zapotec taudia ia haroro henia totona. Ia gwau: “Lau davaria egu haroro gaukara lalonai inai buklet lau gaukaralaia be mai anina bada. Badina unai ese lau ia durua taunimanima edia kudouna lau hamarerea, ena be edia gado lau herevalaia diba lasi.”

Taunimanima be tano idauidau amo idia mai dainai, ita dekenai dala ia noho gado ma ta idia herevalaia taudia ita hedavari henia totona. Ita be Good News for People of All Nations buklet ita gaukaralaia diba, Basileia ena sivarai namona be idia dekenai ita harorolaia totona. Unai buklet oi abia loaloa, a?

[Pictures on page 32]

Raúl be buklet amo taunimanima edia kudouna ia hamarerea