Duahia Taudia Edia Henanadai
Iesu ese ena kamonai taudia ia hamaorodia: “Namona be do umui goevadae, emui guba Tamana ia goevadae bamona.” To hari, edena dala ai taunimanima idia “goevadae” diba?—Mat. 5:48, NW.
Unai henanadai ita haerelaia totona, namona be Baibel ai idia gaukaralaia herevana “goevadae” ena anina ita tahua. Momokani, Iehova sibona be goevadae. Ena be taunimanima be goevadae lasi to kara maoromaoro idia karaia diba. Heberu bona Grik Herevadia idia hahanaia “goevadae” anina be taravatu hegeregerena gau ta be ia ‘goevadae momokani’ bona ‘kerere ta be lasi.’
Dirava ese Adamu bona Heva ia karaia neganai idia be kara maoromaoro idia badinaia, edia tauanina ia goeva bona Dirava momokanina sibona idia tomadiho henia. Iehova ese ia atoa taravatu hegeregerena idia be goevadae taudia. To, idia gwau-edeede dainai, mauri goevadaena idia haboioa bona edia natudia danu be goevadae lasi taudia ai idia lao. Unai amo Adamu ese kara dika bona mase be taunimanima ibounai dekenai ia henia hanai.—Roma 5:12.
To, Iesu ena Ororo Harorona ai, ia hahedinaraia ena be taunimanima be goevadae lasi to kara maoromaoro idia badinaia diba. Iena haroro herevana lalonai lalokau korikori hahedinaraia daladia ia herevalaia. Unai bamona lalokau be Iehova ese taunimanima ibounai dekenai ia hahedinaraia. Iesu ia gwau: “Umui dekenai idia badu henia taudia do umui lalokau henia, bona umui dekenai idia dagedage henia taudia dainai do umui guriguri. Unai dekena amo emui Tamana guba dekenai ia noho ese iena natuna do ia halaoa umui. Badina be ia ese kara dika taudia bona kara namo taudia edia latanai dina ena diari ia henia noho. Medu danu kara maoro taudia bona kara kerere taudia edia latanai ia siaia diho.” (Mat. 5:44, 45) Iesu ena hahediba taudia be unai bamona lalokau idia hahedinaraia neganai, idia be Dirava ena haheitalai goevadaena idia tohotohoa unai.
Hari inai negai, tanobada hegegemadai Iehova ena Witnes taudia ese ma haida dekenai unai bamona lalokau idia hahedinaraia. Idia ese bese, kopina idauidau bona tomadiho idauidau taudia idia durua Baibel ena hereva momokani idia diba totona. Hari inai negai Iehova ena Witnes taudia be tano 236 ai kamonai taudia 7,000,000 mai kahana ida Baibel stadi idia karaia.
Iesu ia gwau: “Bema umui idia lalokau henia taudia sibona dekenai do umui lalokau henia, dahaka dainai umui laloa Dirava be umui do ia hanamoa? Kara dika taudia ese danu unai bamona idia karaia noho. Bema emui turana sibona do umui hanamoa, emui namo be edena bamona do ia bada? Dika taudia danu unai bamona idia karaia noho.” (Mat. 5:46, 47) Keristani taudia be sikuli bada taudia sibona, tano tamona taudia sibona, eiava idia lalokau henia taudia sibona dekenai lalokau idia hahedinaraia lasi. To, idia ese ogogami, gorere, matamata bona buruka taudia idia durua. Unai dala ai Keristani taudia ese Iehova ena lalokau idia tohotohoa, bona ena be idia goevadae lasi to kara maoromaoro idia karaia.
Adamu ese ia haboioa mauri goevadaena ita abia lou diba, a? Oibe, Keriso ena Lagani 1,000 Lohia Negana ai “Dirava ena Natuna . . . ese Satani ena kara dika do ia haorea momokani” bona Iesu ena boubou gauna idia abidadama henia taudia be unai nega ai do idia goevadae lou.—1 Ioa. 3:8.