Inai Oi Diba, A?
Baibel bukana Eseta ese ia herevalaia Parasa ena King Ahasuero be daika?
▪ Eseta bukana ai, King Ahasuero ese Iuda kekenina Eseta ia abia hidi iena kwini ai ia lao totona, bona Eseta ese ena bese taudia ia hamauria. Nega daudau lalonai, diba bada taudia haida idia daradara Baibel ai edena Parasa ena king idia gwauraia Ahasuero. To gabeai, Parasa ena nadi haida ai gado toi dekenai idia torea herevadia idia duahia neganai, unai king idia dibaia. Unai toretore ese idia hahedinaraia King Ahasuero be Xerxes Ginigunana, bona ia be Dariuse Badana (Histapis) ena natuna. Parasa edia toretore ai inai ladana, Xerxes, idia torea dalana be Heberu toretoredia Eseta bukana ai hegeregerena.
Eseta bukana ai Ahasuero ia sivarailaia herevadia ibounai be unai nadi ai idia torea herevadia ida idia hegeregere. Parasa ena king ese ena hanua badana Susa (Shushan), Elama ai, bona Media bona India ela bona Meditereinien motumotu ibounai ia lohiaia. (Eseta 1:2, 3; 8:9; 10:1) Diba bada tauna Lewis Bayles Paton, ia gwau: “Unai ibounai ese Xerxes ia karaia gaudia ia herevalaia, to Parasa ena king ma ta ia herevalaia lasi. Eseta bukana ai Ahasuero ena kara sivaraina be Herodotus bona Grik ena diba bada taudia haida ese idia torea sivaraidia ida idia hegeregere momokani.”
Dahaka ese ia hahedinaraia idaunegai Aigupito ai biriki idia karaia?
▪ Baibel bukana Esodo ia gwau, Aigupito taudia ese Heberu igui hesiai taudia dekenai biriki karaia gaukarana idia henia. Dina ta ta ai, igui hesiai taudia be Aigupito taudia ese idia gwauraia namba hegeregerena, raro bona witi momoru amo biriki idia karaia.—Esodo 1:14; 5:10-14.
Baibel negadiai, Naila Kourana ai dina dekenai biriki hakaukaua gaukarana be gaukara badana. Idaunegai Aigupito ai biriki amo idia karaia ruma bona magu be idia do noho. Lagani 1500 ia lao 1401 B.C.E. lalonai, Thebes dekenai, Rekhmire ena guria gabuna ena haba ai idia torea laulau ese biriki karaia dalana ia hahedinaraia. Unai laulau idia torea negana be Esodo bukana ese ia sivarailaia gaudia idia vara negana ida ia hegeregere.
Buka ta (The International Standard Bible Encyclopedia) ese unai laulau be inai bamona ia herevalaia: “Ranu be gohu ta amo idia abia mai bona auri ta amo kopukopu ida idia mikisi, bona biriki karaia gabuna dekenai idia abia lao. Au amo idia karaia boksi ta lalonai unai kopukopu idia udaia bona idia doria diho. Unai boksi idia kokia bona biriki idia rakatania dina ese ia hakaukaua totona. Biriki momo idia karaia bona laini ai idia atoa, bona idia kaukau neganai idia haboua, gabeai idia gaukaralaia totona. Middle East ai, unai dala idia badinaia noho.”
Lagani 1,000 bona 2,000 B.C.E. huanai idia noho papyrus revarevadia danu ese idia hahedinaraia, igui hesiai taudia ese raro bona witi momoru amo biriki idia karaia, bona dina ta ta ai idia gwauraia namba hegeregerena idia karaia.
[Picture on page 18]
Xerxes (ia gini) bona dariuse badana (ia helai)
[Credit Line]
Werner Forman/Art Resource, NY
[Picture on page 18]
Rekhmire ena guria gabuna ena haba ai idia torea laulau
[Credit Line]
Erich Lessing/Art Resource, NY