“Oi Goada Bona Boga Auka”
“Oi goada bona boga auka. . . . Badina be lau, oiemu Dirava, ese oi loaloa gabudia ibounai dekenai oi do lau bamoa.”—IOS. 1:7-9.
EDENA BAMONA DO OI HAERE?
Edena dala ai Enoka bona Noa be gari lasi karana idia hahedinaraia?
Edena dala ai hahine haida be abidadama bona gari lasi karana idia hahedinaraia?
Daika ena haheitalai oi moalelaia?
1, 2. (a) Dina ta ta ai kara maoromaoro ita badinaia totona, edena kara be mai anina bada? (b) Inai stadi ai dahaka do ita herevalaia?
BOGA AUKA tauna be ia gari lasi bona ia lalogoada. Unai dainai, dina ta ta ai kara maoromaoro ita badinaia totona ita boga auka bona gari lasi be mai anina bada.
2 Baibel ese ia herevalaia taudia haida be hekwakwanai badadia idia vara neganai, boga auka karana idia hahedinaraia. Unai bamona kara be Iehova ena hesiai taudia ma haida ese nega idauidau ai idia hahedinaraia danu. Baibel ese ia herevalaia taudia edia kara amo dahaka ita dibaia? Edena dala ai ita boga auka diba?
GWAU-EDEEDE TAUDIA HUANAI IDIA GARI LASI
3. Enoka be dahaka ia perovetalaia?
3 Abata be do lasi neganai, kara dika be bada dainai Iehova ena hesiai taudia idia boga auka be mai anina bada. To, Enoka “Adamu murinai ia vara tauna namba 7,” be mai gari lasi ida ia haroro ia gwau: “Iehova be ena aneru helagadia tausen momo danu ia mai, taunimanima ibounai hahemaoro henia totona, bona Dirava idia matauraia lasi taudia ia kota henia totona, idia ese idia karaia kara dika ibounai dainai, bona kara dika taudia ese ia dekenai idia gwauraia hereva dika rohorohodia ibounai dainai.” (Iuda 14, 15) Unai gaudia ia herevalaia dalana be idia vara vadaeni bamona, badina ia diba unai peroveta herevana be do ia guguru. Oibe, abata ia mai neganai kara dika taudia ibounai idia mase.
4. Noa ena nega ai dahaka ia vara?
4 Enoka ia mase bona lagani 650 murinai, (lagani 2370 B.C.E. ai) Abata ia vara. To, abata be do lasi neganai, Noa ia vara, ruma bese ia havaraia, bona iena natudia ida lagatoi idia haginia. To, gwau-edeede aneru be taunimanima ai idia lao, hahine hairaidia idia adavaia, bona natudia badadia, Nepili idia havaraia. Bona tanobada be dagedage bona kara dika amo ia honu. (Gen. 6:1-5, 9, 11) Ena be Noa be kara dika taudia huanai ia noho to “Dirava danu ia noho, turana hegeregere” bona mai gari lasi ida “kara maoromaoro ia harorolaia.” (2 Petero 2:4, 5 duahia.) Inai nega dokona ai, Noa bamona ita boga auka be namo.
GARI LASI ABIDADAMA TAUDIA
5. Edena dala ai Mose be abidadama bona gari lasi tauna?
5 Mose be abidadama bona gari lasi tauna. (Heb. 11:24-27) Lagani 1513 B.C.E. ia lao 1473 B.C.E., Dirava ese Mose ia gaukaralaia Israela taudia be Aigupito amo ia hakaudia bona tano gagaena dekenai ia abidia lao. Ena be Mose ia laloa ia be hegeregere lasi unai maduna ia huaia, to ia abia dae. (Eso. 6:12) Ia bona Arona be mai gari lasi ida Farao idia vadivadi henia loulou. Idia be Iehova ese Israela taudia ruhaia totona ia gaukaralaia Hisihisi Ten idia herevalaia, bona idia hahedinaraia Aigupito taudia edia dirava be siahu lasi. (Eso., karoa 7-12) Mose be Dirava ese hanaihanai ia durua dainai, ena abidadama ia goada bona ia gari lasi; ita danu unai bamona ita karaia be namo.—Deu. 33:27.
6. Dahaka ese ita do ia durua mai gari lasi ida eda abidadama ita gwauraia hedinarai totona?
6 Mose bamona ita gari lasi be namo, badina Iesu ia gwau: “Gavana bona king taudia vairanai umui do idia hakaua lao, idia bona idau bese taudia dekenai umui haroro totona. To umui idia hakaua lao neganai, edena bamona do umui hereva bona dahaka do umui herevalaia be umui lalohekwarahilaia lasi, badina do umui herevalaia gauna be unai nega dekenai do umui diba, badina umui sibona do umui hereva lasi, to emui Tamana ena lauma ena heduru amo do umui hereva.” (Mat. 10:18-20) Bema iseda hesiai gaukara dainai gavamani taudia ese ita idia nanadaia, lauma helaga ena heduru amo mai hemataurai ida eda abidadama do ita gwauraia hedinarai.—Luka 12:11, 12 duahia.
7. Dahaka dainai Iosua ia gari lasi bona ia kwalimu?
7 Mose ena gabu ia abia tauna Iosua, be hanaihanai Dirava ena Taravatu ia stadilaia dainai iena abidadama ia goada bona ia gari lasi. Lagani 1473 B.C.E. ai, Israela taudia be kahirakahira Gwauhamata Tanona ai idia vareai neganai, Dirava ese Iosua ia hamaoroa: “Do oi goada bona boga auka.” Danu ia hamaoroa bema Taravatu ia badinaia, do ia aonega bona ena gaukara do ia karaia namonamo. Dirava ia gwau: “Do oi gari lasi, bona oiemu lalona do ia manoka lasi, badina be lau Lohiabada, oiemu Dirava, ese oi loaloa gabudia ibounai dekenai oi do lau bamoa.” (Ios. 1:7-9) Momokani, unai ese Iosua ia hagoadaia! Ita diba Dirava ese ia durua, badina lagani 6 murinai, (lagani 1467 B.C.E. ai) Gwauhamata Tanona ena kahana badana idia abia.
GARI LASI HAHINEDIA
8. Dahaka dainai Rahaba be haheitalai namona?
8 Guna, hahine momo be mai gari lasi ida Iehova idia hesiai henia. Hegeregere, Ieriko ariara hahinena, Rahaba ia diba Iehova ese ia do ia gimaia dainai, mai gari lasi ida Iosua ese ia siaia spai taudia rua ia hunia. Tatau haida be unai spai taudia tahua totona idia mai neganai, ia ese gabu ma ta dekenai ia siaidia. Israela taudia ese Ieriko hanuana idia hadikaia neganai, Rahaba bona ena ruma bese idia hamasedia lasi. Rahaba ese ena mauri ia haidaua, Iehova ia tomadiho henia, bona Mesia ena tubuna ai ia lao! (Ios. 2:1-6; 6:22, 23; Mat. 1:1, 5) Iena abidadama bona gari lasi karana dainai Dirava ese ia hanamoa.
9. Edena dala ai Debora, Baraki, bona Iaele be boga auka karana idia hahedinaraia?
9 Lagani 1450 B.C.E. ai Iosua ia mase murinai, Dirava ese tatau haida ia abia hidi Israela ai diadi gaukara idia karaia totona. Lagani 20 lalonai Kanana taudia edia King Iabina ese Israela taudia ia dagedage henidia. Dirava ese peroveta hahinena Debora amo Diadi tauna Baraki ia hamaoroa, unai king do ia tuari henia. Taboro Ororona ai, Baraki ese tuari taudia 10,000 ia haboua, king ena tuari biaguna, Sisera ia tuari henia totona. Kisona Sinavai be ia kaukau dainai, Sisera bona ena tuari kariota 900 be unuseniai idia lao. To, Israela tuari taudia be unuseni idia ginidae neganai, Dirava ese abata ia havaraia bona kopukopu be bada dainai, Sisera bona ena tuari kariota be idia heau diba lasi. Baraki ena tuari taudia ese Sisera ena tuari taudia ibounai idia hamasedia bona idia kwalimu. To, Sisera ia heau bona hahine ta ladana Iaele ena palai ruma lalonai ia komu. Ia mahuta lalonai Iaele ese ia hamasea. Debora ia peroveta hegeregerena, Kanana taudia idia lusi neganai, hahine ta ese hanamoa ia abia; Iaele unai. Debora, Baraki, bona Iaele edia boga auka karana dainai, lagani 40 lalonai Kanana taudia ese idia tuari henidia lasi. (Gun. 4:1-9, 14-22; 5:20, 21, 31) Tatau bona hahine momo be unai bamona abidadama bona boga auka karana idia hahedinaraia danu.
EDA HEREVA AMO HAIDA HAGOADAIA
10. Edena dala ai eda tadikaka taihu ita hagoadaia diba?
10 Iseda hereva amo tadikaka taihu ita hagoadaia diba. Lagani 1000 B.C.E. ai, King Davida be ena natuna Solomona dekenai ia gwau: “Do oi goada, do oi boga auka. Inai gaukara do oi hamatamaia, bona do oi gari lasi, o laloa manoka lasi. Badina be Dirava Lohiabada, egu Dirava, be oi danu ia noho. Ia ese oi do ia laloaboio lasi, bona ia ese oi do ia rakatania lasi. To oi dekenai do ia noho, ela bona Lohiabada ena Dubu Helaga ena gaukara ibounai do idia ore.” (1 Siv. 28:20) Solomona be mai boga auka ida Iehova ena dubu helaga hairaina ia haginia.
11. Edena dala ai Israela kekenina ta ena hereva ese tau ta ia durua?
11 Lagani 900 B.C.E. ai, Israela kekenina ta ena hereva ese lepera tauna ia durua. Unai kekeni be Suria taudia ese idia abia mauri bona tuari biaguna, Namana, ena hesiai kekenina ai ia lao. Unai kekeni ia diba Iehova be ena peroveta tauna Elisaia amo hoa karadia momo ia karaia. Unai dainai, mai gari lasi ida Namana ena adavana ia hamaoroa, bema Namana be Israela dekenai ia lao, Elisaia ese ena gorere do ia hanamoa. Namana be Elisaia dekenai ia lao, ena gorere ia hanamoa, bona Iehova tomadiho henia tauna ai ia lao. (2 Kin. 5:1-3, 10-17) Bema oi be Dirava oi lalokau henia mero o kekeni matamata ta, Dirava ese oi dekenai goada ia henia diba emu tisa, sikuli turadia, bona ma haida oi haroro henidia totona.
12. Edena dala ai King Hesekaia ena hereva ese Israela taudia ia durua?
12 Ita gwauraia hagoadaia herevadia ese ta ia durua diba ena hekwakwanai ia haheaukalaia totona. Lagani 700 B.C.E. ai, Asuria taudia be Ierusalema idia tuari henia neganai, King Hesekaia ese ena taunimanima ia hamaorodia: “Do umui goada, do umui boga auka. Asuria king bona iena tuari taudia totona do umui gari lasi, bona idia dainai emui kudoudia do idia manoka lasi. Badina ita dekenai ia noho siahu ese idia edia siahu ia hereaia noho momokani. Asuria taudia edia siahu be taunimanima edia siahu sibona, to iseda siahu be Lohiabada iseda Dirava. Ia ese iseda tuari lalonai ita ia durua noho.” Israela taudia edia hemami be edena bamona? Baibel ia gwau: “Taunimanima edia lalodia idia goada.” (2 Siv. 32:7, 8) Unai bamona hagoadaia herevadia ese ita bona Keristani taudia ma haida ia durua dagedage ita haheaukalaia totona.
13. Edena dala ai Obadaia be haheitalai namona?
13 Nega haida gari lasi karana ita hahedinaraia diba, ena be hereva ta ita gwauraia lasi. Lagani 900 B.C.E. ai, King Ahaba ena hesiai tauna Obadaia be mai gari lasi ida nadi matuna lalonai peroveta taudia 100 ia hunia bona ia haridia, “orea ta 50, bona orea ta 50,” unai amo kwini dikana Iesebele ese do ia hamasedia lasi. (1 Kin. 18:4) Obadaia bamona, hari Iehova ena hesiai taudia momo, be mai gari lasi ida edia tadikaka idia gimaia, bona dagedage taudia dekenai edia ladana idia henia lasi.
ESETA—GARI LASI KWINI
14, 15. Kwini Eseta ena abidadama bona gari lasi karana dainai dahaka ia vara?
14 Kwini Eseta be gari lasi hahinena. Lagani 500 B.C.E. ai, kara dika tauna Hamana be palani ia karaia Iuda taudia ia hamasedia totona. Iuda taudia be unai idia kamonai neganai, idia taitai, idia anivaga, bona Dirava idia guriguri henia. (Est. 4:1-3) Kwini Eseta be ia lalohekwarahi bada. Badina Iuda taudia do idia hamasea ena oda pepana be iena kasin Morodekai ese ia dekenai ia siaia. Iena kasin ia ura Eseta ese king do ia noia iena varavara do ia hamasedia lasi. To, bema ta be king itaia totona ia vareai kava, unai tauna be idia hamasea.—Est. 4:4-11.
15 Morodekai ese Eseta ia hamaoroa bema king dekenai ia lao lasi, Iehova be dala ma ta ai Iuda taudia do ia hamauria. Morodekai ia gwau reana ia be kwini ai ia lao badina ia amo Iehova ese ena taunimanima do ia durua. Eseta ese Morodekai ia hamaoroa Iuda taudia be Susa dekenai do ia haboua bona do idia anivaga. Ia gwau: Lau “danu do [lau] aniani lasi, umui hegeregerena. Unai murinai lau be king dekenai do lau raka vareai, iena taravatu do lau utua. Bema unai dainai lau mase, vadaeni lau mase.” (Est. 4:12-17) Eseta bukana amo ita diba Eseta be mai gari lasi ida unai ia karaia, bona Dirava ese ena taunimanima ia hamauria. Hari danu, horoa Keristani taudia bona mamoe ma haida be dagedage negadiai, gari lasi karana idia hahedinaraia. Bona Iehova, ‘guriguri ia kamonai’ Diravana, be hanaihanai idia ia durua.—Salamo 65:2; 118:6 duahia.
“OI GARI LASI!”
16. Matamata taudia be Iesu amo dahaka idia dibaia?
16 Nega ta, Iesu ena mauri lagani be 12 neganai, iena tama sina ese dubu helaga ai ia idia davaria. Unuseniai “ia be hadibaia taudia huanai ia helai bona edia hereva ia kamonai bona idia dekenai henanadai ia henia.” Bona “ia idia kamonai henia taudia be iena laloparara karana bona haere dekenai idia hoa.” (Luka 2:41-50) Ena be Iesu be mero matamata, to mai abidadama bona gari lasi ida dubu helaga ena hadibaia taudia dekenai henanadai ia henia. Matamata taudia ese Iesu ena haheitalai idia tohotohoa diba, bona ma haida dekenai edia abidadama idia gwauraia hedinarai.—1 Pet. 3:15.
17. Dahaka dainai Iesu ia gwau ena hahediba taudia idia “gari lasi” be namo? Dahaka dainai ita “gari lasi” be namo?
17 Iesu ese ma haida ia hagoadaia do idia “gari lasi!” (Mat. 9:2, 22) Ena hahediba taudia dekenai ia gwau: “Nega be ia mai noho, bona ia ginidae vadaeni, unai negai umui ta ta be emui ruma dekenai do umui heau lao bona lau do umui rakatania, to lau be sibona lasi, badina Tamana be lau ida. Unai gaudia be umui dekenai lau herevalaia vadaeni, unai amo lau dainai maino do umui abia. Tanobada dekenai umui hisihisi noho, to umui goada! Lau ese tanobada lau halusia vadaeni.” (Ioa. 16:32, 33) Tanobada taudia ese Iesu ena hahediba taudia idia inai henia hegeregerena, ita danu do idia inai henia. To, Iesu ena gari lasi karana ita laloa dobu neganai, goada ita abia tanobada amo ita gini siri totona. Ia ese tanobada ia halusia, bona ita danu be unai ita karaia diba.—Ioa. 17:16; Iam. 1:27.
18, 19. Edena dala ai Paulo be abidadama bona gari lasi karana ia hahedinaraia?
18 Aposetolo Paulo be hahetoho momo ia haheaukalaia. Nega ta, Ierusalema ai Iuda taudia idia ura ia do idia hamasea, to Roma tuari taudia ese idia hamauria. Unai hanuaboi ai, “Lohiabada be ia badinai ia gini bona ia gwau: ‘Oi gari lasi! Ierusalema ai lau oi gwauraia hedinarai hegeregerena, namona be Roma dekenai danu lau oi gwauraia hedinarai.’” (Kara 23:11) Paulo be Iesu ena hereva ia badinaia.
19 Paulo be mai gari lasi ida sibodia idia gwauraia “aposetolo namo hereadia” edia kara ia gwauraia dika, badina idia ura Korinto kongrigeisen idia hakaua kerere. Idia be aposetolo koikoidia. (2 Kor. 11:5; 12:11) To, Paulo ese ia haheaukalaia hisihisi ese ia hamomokania ia be Iesu ese ia abia hidi hesiai tauna. Hegeregere, dibura ruma ai idia atoa, idia kwadia, ena laolao lalonai dika ia davaria, ia hitolo, ia ranu mase, hanuaboi momo ia mahuta lasi, bona kongrigeisen iboudiai dainai ia lalohekwarahi. (2 Korinto 11:23-28 duahia.) Paulo ena abidadama bona gari lasi karana ese ia hamomokania ia abia goada be Dirava amo!
20, 21. (a) Tadikaka ta be edena dala ai boga auka bona gari lasi karana ia hahedinaraia? (b) Edena bamona negadiai gari lasi karana ita hahedinaraia be namo? Bona Dirava be dahaka ia karaia diba?
20 Reana Keristani taudia ibounai be dagedage do idia davaria lasi. To, iseda mauri lalonai ita davaria hekwakwanai ita hanaia totona, ita boga auka bona gari lasi be namo. Hegeregere, Brazil ai mero matamata ta be guna raskol oreana ta ia bamoa. Baibel ia stadilaia murinai, ia laloparara ena mauri ia haidaua be namo. To ia diba bema ta be unai raskol oreana ia rakatania, do idia hamasea. Unai dainai, ia guriguri bona orea ia gunalaia tauna ia hereva henia, bona idia do ia rakatania ena badina be Baibel amo ia hahedinaraia. Ena abia hidi dainai ia idia panisia lasi. Unai orea ia rakatania murinai pablisa ai ia lao.
21 Nega idauidau ai gari lasi karana ita hahedinaraia be mai anina bada. Sivarai namona ita harorolaia totona ita gari lasi be namo. Keristani matamata taudia be sikuli gabunai Dirava idia badinaia noho totona idia gari lasi be namo. Danu, hebouhebou ita reaia lasi totona, namona be bosi ita noia unai dinadia ai ita laga-ani. Bona unai ita karaia totona ita gari lasi be namo. Herevana dahaka koua gaudia ita davaria, to mai abidadama ida ita gwauraia guriguridia be Iehova ese do ia kamonai. (Iam. 5:15) Bona ita diba ena lauma helaga amo ita do ia hagoadaia bona do ita gari lasi.
[Picture on page 11]
Gwau-edeede taudia huanai Enoka be mai gari lasi ida ia haroro
[Picture on page 12]
Iaele be goada bona gari lasi hahinena