“Emu Dekena Tauna Oi Lalokau Henia, Oi Sibona Oi Lalokau Henia Hegeregerena”

1, 2. (a) Iesu ia gwau taravatu hereadaena iharuana be dahaka? (b) Inai stadi ai edena henanadai do ita herevalaidia?

FARISEA tauna ta be Iesu dekenai taravatu hereadaena ia henanadailaia neganai, Iesu ia gwau: “Namona be Iehova emu Dirava oi lalokau henia mai emu kudouna ibounai, mai emu mauri ibounai, bona mai emu darana ibounai ida.” Vanegai stadi ai unai ena anina ita herevalaia. To, Iesu ma ia gwau: “Iharuana be inai: ‘Namona be emu dekena tauna oi lalokau henia, oi sibona oi lalokau henia hegeregerena.’”—Mat. 22:34-39.

² Iesu ia gwau namona be eda dekena tauna do ita lalokau henia, ita sibona ita lalokau henia hegeregerena. To, eda dekena tauna be daika? Edena dala ai eda dekena tauna ita lalokau henia diba?

EDA DEKENA TAUNA BE DAIKA?

3, 4. (a) Iesu ese inai henanadai, “Daika be egu dekena tauna?” ia haerelaia totona, edena parabole ia gaukaralaia? (b) Edena dala ai Samaria tauna ese bero ia abia Iuda tauna ia durua? (Laulau ginigunana itaia.)

³ Reana do ita laloa iseda dekena tauna be ita badinai ia noho bona ita ia durua turana ta. (Aon. 27:10) To, tau ta ese Iesu ia nanadaia: “Daika be egu dekena tauna?” neganai, Iesu be unai tauna dekenai Samaria tauna ena parabole ia herevalaia, bena ma haida do ita lalokau henia ena anina ia herevalaia. (Luka 10:29-37 duahia.) Unai sivarai lalonai Iuda tauna ta be henaohenao taudia ese ena kohu idia henaoa, idia dadabaia bona dala ai idia rakatania ia mase totona. Israela ena hahelaga tauna bona Levi tauna be unai Iuda tauna ena dekena taudia namodia lasi, badina ia idia durua lasi. To, Samaria tauna ta ese unai Iuda tauna ia durua, ena be unai negai Iuda bona Samaria taudia idia inai heheni.—Ioa. 4:9.

⁴ Samaria tauna ese Iuda tauna ena bero latanai dehoro bona wain ia bubua, unai amo iena bero do idia namo haraga. Bena ia ese unai Iuda tauna be laolao taudia edia noho rumana ta dekenai ia abia lao, bona ruma naria tauna dekenai denario rua ia henia. Unai denario rua be tau ta ese dina rua ai ia karaia gaukara ena davana hegeregerena. (Mat. 20:2) Oibe, ita laloparara daika be dekena tauna namona. Iesu ena parabole ese ita ia hadibaia, eda dekena tauna do ita hebogahisi bona lalokau henia.

5. Hurricane Sandy ia vara neganai, edena dala ai Iehova ena Witnes taudia ese idia hahedinaraia edia dekena taudia idia lalokau henia?

⁵ Hari, Samaria tauna bamona hebogahisi idia hahedinaraia taudia be momo lasi. Ita be “dina gabediai” ita noho dainai, taunimanima momo be idia dagedage, kara namodia idia ura henia lasi bona edia dekena taudia idia lalokau henia lasi. (2 Tim. 3:1-3) Hegeregere, disasta negadiai hekwakwanai badadia idia vara danu. October 2012 ai, New York City be Hurricane Sandy ese ia hadikaia neganai, ia vara gauna mani ita laloa. Gabu ta dekenai paoa be lasi, gabu ia paraka bona taunimanima be gau momo dekenai idia dabu. To, henaohenao taudia ese unai lalohisihisi taudia edia kohu idia henaoa. Unai gabu ai, Iehova ena Witnes taudia ese dala idia hegaegaelaia idia ta ta bona ma haida idia durua totona. Keristani taudia be unai bamona idia karaia badina edia dekena taudia idia lalokau henia. Edena dala ma haida ai eda dekena taudia ita lalokau henia diba?

DEKENA TAUNA ITA LALOKAU HENIA DALADIA

6. Edena dala ai Baibel amo eda dekena taudia ita durua diba?

⁶ Baibel amo idia ita durua. Unai ita karaia totona, eda haroro gaukara ai Baibel amo idia ita hagoadaia be namo. (Roma 15:4) Oibe, bema ma haida dekenai Baibel ena hereva momokani ita harorolaia, ita be dekena taudia namodia. (Mat. 24:14) Iehova, “helaro ia henia Diravana,” ena Basileia sivarai namona ita harorolaia be hahenamo badana!—Roma 15:13.

7. Hakaua Herevana Hereadaena be dahaka, bona ita badinaia neganai dahaka namo do ita abia?

⁷ Hakaua Herevana Hereadaena ita badinaia. Unai be Iesu ese ena Ororo Harorona ai ia herevalaia. Ia gwau: “Gau ibounai umui ura taunimanima ese umui dekenai idia karaia hegeregerena, idia dekenai danu unai bamona do umui karaia. Unai be Taravatu bona Peroveta Taudia edia hereva edia anina.” (Mat. 7:12) Inai hereva “Taravatu” be Genese ia lao Deuteronomi ia herevalaia, bona “Peroveta Taudia” be Heberu Toretoredia ia herevalaia. Unai toretore ese idia hahedinaraia, Dirava ese ma haida idia lalokau henia taudia do ia hanamodia. Hegeregere, Iehova be peroveta tauna Isaia amo ia gwau: “Kota maoromaoro bona kara maoromaoro umui karaia. . . . Unai bamona ia karaia tauna be ia moale.” (Isa. 56:1, 2, NW) Momokani, Dirava ese ita ia hanamoa badina iseda dekena taudia ita lalokau bona kara namo henidia.

8. Dahaka dainai eda inai taudia ita lalokau henia be namo, bona bema unai bamona ita karaia dahaka do ia vara?

⁸ Ita idia inai henia taudia ita lalokau henia. Iesu ia gwau: “Umui kamonai vadaeni idaunegai idia gwau: ‘Namona be emu dekena tauna do oi lalokau henia bona emu inai tauna do oi inai henia.’ To umui lau hamaoroa, emui inai taudia do umui lalokau henia noho bona umui idia dagedage henia taudia totona do umui guriguri noho. Unai amo emui Tamana guba ai ia noho ena natudia ai do umui lao.” (Mat. 5:43-45) Aposetolo Paulo danu be unai bamona hereva ia gwauraia. Ia gwau: “Bema emu inai tauna ia hitolo, aniani oi henia, bema ia ranu mase, ranu oi henia.” (Roma 12:20; Aon. 25:21) Mose ena Taravatu ia gwau, bema tau ta ia itaia ena inai tauna ena animal be kohu metauna ia huaia dainai ia moru, ia durua be namo. (Eso. 23:5) Unai bamona idia gaukara hebou neganai, idia inai heheni taudia be tura namodia ai do idia lao. Ita Keristani taudia ese lalokau ita hahedinaraia dainai, iseda inai taudia momo be ita idia badu henia lou lasi. Bema eda inai taudia o dagedage taudia dekenai lalokau ita hahedinaraia, gabeai do ita moale bema idia be Keristani taudia ai idia lao!

9. Eda tadikaka ida maino ita karaia totona, Iesu be dahaka ia gwau?

⁹ “Taunimanima ibounai ida maino ai umui noho.” (Heb. 12:14) Unai siri be iseda tadikaka taihu ia herevalaia danu, badina Iesu ia gwau: “Bema emu harihari gauna oi abia lao pata helagana dekenai bona oi laloatao emu tadikaka be oi dekenai ia lalohisihisi, namona be emu harihari gauna be pata helagana vairanai oi rakatania bona oi lao. Emu tadikaka ida maino oi karaia guna, bena oi giroa lou neganai, emu harihari gauna oi bouboulaia.” (Mat. 5:23, 24) Bema eda tadikaka ita lalokau henia bona ita ese dala ita tahua haraga maino ita karaia totona, Dirava ese ita do ia hanamoa.

10. Dahaka dainai ma haida edia kerere ita tahua be maoro lasi?

¹⁰ Ma haida edia kerere ita tahua lasi. Iesu ia gwau: “Ma haida umui hahemaoro henia lasi, vadaeni Dirava ese umui do ia hahemaoro henia lasi, badina ma haida umui hahemaoro henia hegeregerena, umui do idia hahemaoro henia. Bona ma haida dekenai umui henia sikele hegeregerena, umui dekenai unai bamona sikele do idia henia. Vadaeni dahaka dainai, emu tadikaka ena matana dekenai ia noho au ena momoru oi itaia, to emu matana dekenai ia noho au badana oi laloa lasi? Eiava dahaka dainai emu tadikaka dekenai oi gwau, ‘Mani emu matana dekenai ia noho au ena momoru lau kokia,’ to emu matana dekenai au badana ia noho? Koikoi tauna e, emu matana amo au badana oi kokia guna, bena emu tadikaka ena matana amo, au ena momoru kokia dalana do oi itaia namonamo.” (Mat. 7:1-5) Ita dibaia gauna be inai: Namo lasi ma haida edia kerere dainai idia ita gwauraia dika, badina ita danu be kerere ita karaia!

LALOKAU ITA HAHEDINARAIA DALA HEREADAENA

11, 12. Edena dala hereadaena ai eda dekena taudia dekenai lalokau ita hahedinaraia?

¹¹ Dala idauidau ai eda dekena taudia dekenai lalokau ita hahedinaraia diba. To, Iesu ese ita ia hadibaia, dala hereadaena be Basileia sivarai namona do ita harorolaia. (Luka 8:1) Iesu ese iena murinai idia raka taudia ia haganidia, ia gwau: “Bese ibounai taudia be hahediba taudia ai umui halaoa.” (Mat. 28:19, 20) Unai hegeregerena, eda dekena taudia ita durua mase ia lao henia dala badana do idia rakatania, bona mauri ia lao henia dala maragina do idia badinaia. (Mat. 7:13, 14) Ita diba momokani, Iehova ese iseda hekwarahi do ia hanamoa.

¹² Iesu bamona, ita ese taunimanima ita durua idia laloparara, Iehova idia dibaia be mai anina bada. (Mat. 5:3) Kamonai taudia dekenai “Dirava ena sivarai namona” ita harorolaia. (Roma 1:1) Basileia sivaraina idia abia dae taudia be Iesu Keriso amo Dirava ida maino idia karaia. (2 Kor. 5:18, 19) Oibe, sivarai namona harorolaia karana be eda dekena taudia dekenai lalokau ita hahedinaraia dala hereadaena ta.

13. Basileia harorolaia gaukarana oi durua dainai, emu hemami be edena bamona?

¹³ Bema lou henia bona Baibel stadi ita karaia namonamo, do ita moale badina ita ese ma haida ita durua Dirava ena kara maoromaoro taravatudia idia badinaia totona. Unai ese ita stadi henia tauna ena mauri ia haidaua diba. (1 Kor. 6:9-11) Ita moale badina ita itaia Dirava ese “mauri hanaihanai idia ura kudou-maoro taudia” ia durua, unai dainai edia mauri idia haidaua bona Ia idia tura henia. (Kara 13:48) Idia momo be guna idia lalohisihisi, to hari idia moale, bona guna idia lalometau, to hari iseda guba Tamana dekenai idia tabekau. Danu, ita moale badina momo be hereva momokani lalonai idia goada idia lao! Oibe, inai gaukara badana amo eda dekena taudia dekenai lalokau ita hahedinaraia be hahenamo badana.

PAULO ESE LALOKAU IA HEREVALAIA

14. Mani 1 Korinto 13:4-8 ese ia herevalaia lalokau ena kara idauidau oi gwauraia.

¹⁴ Eda dekena taudia dekenai Paulo ese ia herevalaia lalokauna ita hahedinaraia neganai, hekwakwanai momo do idia vara lasi, moale bada do ia havaraia bona Dirava ese ita do ia hanamoa. (1 Korinto 13:4-8 duahia.) Mani Paulo ese lalokau ia herevalaia dalana ita itaia, bona ita tahua edena dala ai eda dekena taudia dekenai Paulo ena sisiba ita badinaia diba.

15. (a) Dahaka dainai boga-auka bona hebogahisi ita hahedinaraia be namo? (b) Dahaka dainai mama bona heagi karana ita dadaraia be namo?

¹⁵ “Lalokau be ia boga-auka, bona ia hebogahisi.” Dirava ese goevadae lasi taudia dekenai boga-auka bona hebogahisi ia hahedinaraia hegeregerena, ita danu be ma haida ese kerere idia karaia o ita idia kara auka henia neganai, ita boga-auka bona hebogahisi ita hahedinaraia. “Lalokau be ia mama lasi,” unai dainai lalokau korikori ese ita ia durua ma haida edia kohu o kongrigeisen lalonai idia abia hahenamo dainai do ita mama lasi. Danu, bema ita be mai eda lalokau, do ita heagi o hekokoroku lasi. Baibel ia gwau, Iehova be “hekokoroku taudia edia matana” bona “heagi taudia edia kudouna” ia inai henia.—Aon. 21:4, NW.

16, 17. Edena dala ai 1 Korinto 13:5, 6 ena sisiba ita badinaia diba?

¹⁶ Lalokau dainai ita ese dala maorona ai eda dekena taudia do ita kara henia. Idia dekenai do ita koikoi lasi, edia kohu do ita henaoa lasi, bona Iehova ena taravatu bona hakaua herevadia do ita makohia lasi. Danu, lalokau ese ita do ia durua unai amo ita sibona eda namo do ita laloa lasi, to ma haida edia namo danu do ita laloa.—Fili. 2:4.

¹⁷ Lalokau korikori ia hahedinaraia tauna be ia badu haraga lasi bona “ta ena kerere ia laloatao noho lasi”—hegeregere ma haida ese ia idia kara dika henia neganai, edia kerere be lista ta ai ia torea lasi. (1 Tes. 5:15) Bema ta ita badu henia noho, ita be Dirava do ita hamoalea lasi, bona iseda badu be lahi bamona do ia hururuhururu ela bona ita bona ma haida do ia araia bamona. (Lev. 19:18) Lalokau be hereva momokani ia moalelaia, to “kara maoromaoro lasi karana ia moalelaia lasi.” Hegeregere, bema haida ese ita ia inai henia tauna idia dagedage o kara auka henia, unai do ita moalelaia lasi.—Aonega Herevadia 24:17, 18 duahia.

18. Korinto Ginigunana 13:7, 8 ese lalokau ia herevalaia dalana amo dahaka ita dibaia?

¹⁸ Paulo ma ia gwau, “lalokau be gau ibounai dekenai ia gini goada.” Bema ita ia kara dika henia tauna ese ita ia noia iena dika ita gwauatao, lalokau ese ita do ia doria iena dika ita gwauatao totona. Lalokau ese ita ia durua Dirava ena Hereva lalonai idia noho gaudia ibounai ita “abidadama henia,” bona orea ese ia halasia gaudia ibounai ita laloa bada totona. ‘Gau ibounai lalonai lalokau be mai ena helaro.’ Unai dainai, Baibel lalonai idia torea gaudia ibounai ia abia dae, bona ita ia hagoadaia ma haida dekenai eda helaro ita gwauraia totona. (1 Pet. 3:15) Danu, hekwakwanai ita davaria neganai, ita guriguri bona ita ura unai hekwakwanai do ia ore. Lalokau be “gau ibounai ia haheaukalaia.” Hegeregere, ena be ma haida ese ita idia kara dika henia, dagedage o hahetoho ma haida ita davaria, to ita haheauka. Danu, lalokau be “ia ore diba lasi.” Iehova idia badinaia taudia ese lalokau do idia hahedinaraia ela bona hanaihanai.

DEKENA TAUNA LALOKAU HENIA NOHO, SIBONA OI LALOKAU HENIA HEGEREGERENA

19, 20. Edena Baibel siri ese idia hahedinaraia, eda dekena taudia ita lalokau henidia noho be gau badana?

¹⁹ Bema Baibel ena hakaua herevadia ita badinaia, ita ese eda dekena taudia dekenai lalokau do ita hahedinaraia noho. Unai bamona lalokau ese taunimanima ibounai ia hatamonaia, herevana edia tano o kastom be idauidau. Danu, namona be ita laloatao Iesu ia gwau: “Namona be emu dekena tauna oi lalokau henia, oi sibona oi lalokau henia hegeregerena.” (Mat. 22:39) Dirava bona Keriso idia ura ita ese eda dekena taudia do ita lalokau henidia. Bema ita diba lasi edena dala ai eda dekena taudia dekenai lalokau ita hahedinaraia, namona be Dirava ita noia ena lauma helaga amo ita ia durua totona. Unai ita karaia neganai, Iehova ese ita do ia hanamoa bona ita do ia durua lalokau ita hahedinaraia totona.—Roma 8:26, 27.

²⁰ Dekena tauna do ita lalokau henia, sibona ita lalokau henia hegeregerena ena hakaua hereva be “taravatu badana.” (Iam. 2:8) Paulo be Mose ena Taravatu henunai idia noho hahegani haida ia herevalaia murinai, ia gwau: “Unai ibounai bona taravatu oredia ma haida be inai hereva tamona lalonai: ‘Namona be emu dekena tauna oi lalokau henia, oi sibona oi lalokau henia hegeregerena.’ Mai ena lalokau tauna ese ena dekena tauna ia kara dika henia lasi. Unai dainai lalokau ese taravatu ia hagugurua.” (Roma 13:8-10) Oibe, eda dekena taudia ita lalokau henidia noho be gau badana.

21, 22. Dahaka dainai Dirava bona eda dekena taudia ita lalokau henia be namo?

²¹ Eda dekena taudia lalokau henia karana ita laloa dobu neganai, Iesu ena hereva ma ta ita laloa danu be namo. Ia gwau iena Tamana ese “kara dika taudia bona kara namo taudia latanai dina ena diari ia henia noho. Bona medu danu be kara maoromaoro bona kara maoromaoro lasi taudia latanai ia siaia diho.” (Mat. 5:43-45) Namona be eda dekena taudia dekenai lalokau ita hahedinaraia, herevana idia be kara maoromaoro o kara maoromaoro lasi taudia. Matamanai ita herevalaia bamona, lalokau ita hahedinaraia diba dala hereadaena ta be, eda dekena taudia dekenai Basileia ena sivarai namona ita harorolaia. Bema sivarai namona idia abia dae, hahenamo momo do idia moalelaia!

²² Badina momo dainai Iehova ita lalokau henia diba. Danu, ita ese dala idauidau ai eda dekena taudia ita lalokau henia diba. Bema Dirava bona eda dekena taudia ita lalokau henia, ita be Iesu ese ia gwauraia taravatu hereadaedia rua ita badinaia. To, gau badana be iseda lalokau guba Tamana, Iehova ita hamoalea.