Kara Gageva Bona Dagedage Lau Koua Toho

EGU MAURI GUNANA:

Lau be Israel bona Lebanon edia boda hanuana, Rmaysh, dekenai lau tubu, unai negai tuari ia vara. Lau laloatao, tano lalonai bomu idia pou bona momo be edia aena o imana idia haboioa. Mauri be auka, raskol karadia bona dagedage be bada herea.

Emai famili be Maronite dubu taudia, unai be Katolik dubuna ta. Egu tamana be ia hekwarahi ai ibounai 12 ia naria totona, to egu sinana be ia ura ai be hanaihanai dubu dekenai ai lao. Unai negai, lau itaia dubu taudia be taunimanima idia durua lasi.

Lau tubu lalonai, kung fu lau ura henia. Lau treinini goadagoada bona kung fu heatu daladia bona kohudia gaukaralaia daladia lau diba. Sibona lau laloa, ‘tuari lau koua diba lasi, to dagedage taudia lau koua diba.’ Bema taunimanima rua idia heatu, karaharaga lau koudia. Lau be badu haraga tauna bona gau maragidia ese lau idia habadua. Saut Lebanon taudia be lau dekenai idia gari, badina kara gageva bona dagedage lau koua toho.

Lagani 1980 Beirut ai, kung fu klab ta dekenai lau vareai. Hanaihanai treinini lau lao, herevana dina ta ta ai tuari ia vara. Egu mauri dalana ibounai lalonai, lau be kung fu tauna, Bruce Lee lau tohotohoa. Ena huina sitaelo, ena raka dalana, bona ena boiboi dalana lau tohotohoa. Lau kiri diba lasi.

BAIBEL ESE EGU MAURI IA HAIDAUA DALANA:

Egu tahua gauna be China ai kung fu diba momo tauna ai lau lao. Adorahi ta, lau treinini lalonai, ta be iduara dekenai ia pidipidi. Egu turana ta be Iehova ena Witnes taudia rua ida ia mai. Kung fu dabua lau hahedokilaia, bona mai varahu danu iduara lau kehoa, bena idia lau hamaoroa, “Lau be Baibel lau diba lasi.” To lau diba lasi unai nega amo egu mauri do ia idau.

Witnes taudia ese Baibel amo idia hahedinaraia dahaka dainai taunimanima be hegeregere lasi kara gageva bona dagedage idia haorea totona. Idia gwau Satani Diabolo ese unai hekwakwanai ia havaraia. (Apokalupo 12:12) Lau hoa badina idia be mai maino bona gari lasi ida lau idia hereva henia. Bona lau dekenai Dirava ena ladana idia hadibaia dainai lau moale. (Salamo 83:18) Danu, 1 Timoteo 4:8 ena hereva idia hahedinaraia, ia gwau: “Tauanina treinia karana be mai ena namo sisina, to Dirava badinaia karana ese gau ibounai dekenai oi do ia durua, hari inai nega bona vaira nega maurina ai, oi dekenai hahenamo do ia henia.” Unai ese egu mauri ia haidaua momokani.

Madi, Witnes taudia lau itadia lou lasi, badina egu famili ese idia hamaoroa do idia mai lasi. To, egu lalona lau hadaia kung fu lau hadokoa bona Baibel lau stadilaia matamaia. Egu tadikaka idia moale lasi, to egu lalona lau hadaia Iehova ena Witnes taudia do lau tahua bona Baibel do ai stadilaia.

Witnes taudia lau tahudia to lau davaridia lasi. Daudau lasi murinai, egu tamana ia mase, bona hekwakwanai ma haida dainai lau lalohisihisi bada. Konstraksen kampani ta dekenai lau gaukara matamaia, bona dina ta egu gaukara turana ta ladana, Adel be lau ia nanadaia dahaka dainai lau moale lasi. Ia ese Baibel amo toreisi lou helarona ia herevalaia. Hua nain lalodiai, unai lalokau bona kara namo Witnes tauna ese lau ia stadi henia.

Lau stadi lalonai, lau itaia egu kara haida lau haidaua be namo. Unai lau karaia be mai ena hekwarahi. Kerere idia vara neganai, lau badu haraga. Baibel amo badu biagua dalana lau dibaia bona egu kara lau naria. Hegeregere Mataio 5:44 ai, Iesu ia gwau: “Emui inai taudia do umui lalokau henia noho bona umui idia dagedage henia taudia totona do umui guriguri noho.” Bona Roma 12:19 ia gwau: “Ta ena dika davana do umui haloua lasi, . . . badina Toretore Helagadia ia gwau: ‘Iehova ia gwau, dika ena davana be egu, lau ese davana do lau haloua.’” Unai siri bona ma haida ese lau idia durua metairametaira lalomaino lau abia.

NAMO LAU DAVARIA DALANA:

Ena be matamanai egu famili idia moale lasi badina Iehova ena Witnes taudia ida lau stadi, to gabeai idia ese Witnes taudia idia matauraia. Danu, egu tadina mero ta be lau ida Iehova ai tomadiho henia, bona emai Sinana be ma haida vairanai emai abidadama ia gwauraia hedinarai ela bona ia mase.

Danu, hahine namona ta ladana, Anita lau adavaia, bona lau ida ful-taim hesiai gaukara ai karaia. Lagani 2000 amo, lau bona Anita be Eskilstuna, Sweden dekenai ai noho bona Baibel amo Arabia gado idia herevalaia taudia ai hadibaia.

Dagedage karadia dainai idia hisihisi taudia lau hebogahisi henidia. To unai idia vara ena badina lau dibaia, bona lau diba Dirava ese kahirakahira unai dika do ia haorea. Unai ese lau dekenai moale bona maino ia henia.​—Salamo 37:29.