Basileia Haroro Ripoti
Netherlands Dekenai Taunimanima Idauidau Idia Durua
ABERAHAMO ena abidadama be idau momokani. Aposetolo Paulo ia gwau, “Dirava ese Aberahamo ia boiria” neganai, Dirava ena gadona ia kamonaia bona “ia lao. Aberahamo be ia lao gwauraia gabuna ia diba lasi.” Iena ruma bese ibounai ia abia lao neganai, gwauhamata tanona ai “idau bese tauna bamona ia noho” ena mauri lagani oredia handred lalonai.—Heberu 11:8, 9.
Unai hegeregerena hari inai negai, Iehova ena Witnes taudia momo be ma tano ta dekenai idia lao ena hekwakwanai idia hanaia badina idia ura haroro taudia be momo lasi gabuna ai idia gaukara. Ma haida ese gado idauna idia dibaia, edia tano ai idia noho idau tano taudia idia haroro henia totona. Inai haheitalai ese idia hahedinaraia bamona, Netherlands dekenai unai bamona idia karaia dainai “iduara badana ia kehoa vadaeni, bona hari be gaukara badana” idia karaia, badina unuseniai idia noho taudia milioni 15 amo milioni ta be tano idauna amo idia mai taudia.—1 Korinto 16:9.
◻ Guna Kung Fu ia hadibaia tauna ta, Bahram, be Middle East ena tano ta amo ia mai. Ia ese Baibel ta bona Watch Tower ena magasin bona buka haida ia abia. Hua ta lalonai, Bahram ia lalo-parara hereva momokani ia davaria vadaeni. Ia bona ena adavana ese Baibel stadi idia abia, to hekwakwanai ta ia noho—edia Baibel stadi ia hakaua tauna be edia gado ia diba lasi. Idia herevahereva lalonai edia imana idia gaukaralaia, idia laloa lou neganai idia gwau, ai be “aena bona imana amo ai herevahereva.” Gabeai, idia ese edia gado idia gaukaralaia kongregesen idia davaria, bona unai nega amo lauma dalanai idia tubu haraga. Hari Bahram be bapatiso Witnes tauna ta.
◻ Dutch tauna ta bona ena adavana, painia taudia, ese sitoa ta vairanai Indonesia tauna ta idia hereva henia. Ena gado ai idia hereva henia neganai, unai tau ia hoa mai moale ida. Dala idia karaia ena ruma ai idia vadivadi henia totona. Idia davaria unai tauna be Russia ai lagani 20 mai kahana ia noho, bona unai nega lalonai ia be hahine edia gorere ia stadilaia doketana ai ia lao. Ia gwau Dirava ia noho lasi lalohadaina ia abia dae, to ia gwau beibi be ena sinana ese ia havaraia bona ia durua negadia ta ta ai, ia hoa bona ia gwau, “Taunimanima edia tauanina be namo herea! Ia be hoa gauna!” Baibel stadi ia abia dae bona nega sisina murina ia abia dae taunimanima ia laloa Havaraia Tauna ta ia noho. (1 Petero 5:6, 7) Hari ia be bapatiso tadikaka ta bona Amsterdam ai ia noho Indonesian gado kongregesen lalonai ia gaukara noho.
◻ Rotterdam, bouti idia vareai gabuna badana ai, painia taudia haida be dina ta ta iboudiai gado idauidau taudia edia bouti be unuseni idia atoa neganai idia haroro henidia dalana idia diba namonamo. Unai haroro taudia mai edia goada edia gaukara dainai, bouti dekenai idia gaukara taudia haida, hegeregere kapena ta, bouti ofesa ta, bona sekuriti tauna ta, ese hereva momokani idia abia dae. Hari idia danu ese tanobada ibounai lalonai Dirava ena Basileia sivarai namona idia halasia.—Mataio 24:14.
Tanobada ena kahana iboudiai ai idia karaia hegeregerena, Iehova ena Witnes taudia Netherlands ai ese edia lalona idia hadaia, noho hanaihanai sivarai namona be bese idauidau, iduhu idauidau, gado idauidau, bona kopina idauidau taudia dekenai idia harorolaia totona.—Apokalupo 14:6.