Hahetoho Negadiai Manau Hahedinaraia Noho

1-3. Iuda ai ia noho peroveta tauna be dahaka ia karaia lasi, bona dahaka ia vara? (Laulau ginigunana herevalaia.)

KING IEROBOAMA ena lohia negana ai, Iuda amo Iehova ese peroveta tauna ta be Israela ena aposteit king dekenai ia siaia, hahemaoro hereva aukana ia henia totona. Unai manau peroveta tauna be unai ia karaia, bona Iehova ese iena hesiai tauna be Ieroboama ena badu dikadika karana amo ia gimaia.​—⁠1 Kin. 13:​1-10.

² Unai peroveta tauna be iena hanua dekenai ia giroa lao noho lalonai, ia ese Betele dekenai ia noho tau buruka ta ia hedavari henia. Unai tau burukana ese ia hamaoroa ia be Iehova ena peroveta tauna danu. Unai peroveta tauna matamata ia koia dainai, Iehova ena oda herevana ia badinaia lasi​—⁠“do oi aniani lasi, bona ranu do oi inua lasi [Israela ai], bona oi lao dalana dekena amo do oi giroa mai lasi.” Iehova be ia moale lasi. Gabeai, unai peroveta tauna matamata be iena hanua dekenai ia lao noho lalonai, laiona ta ia mai bona ia ia hamasea.​—⁠1 Kin. 13:​11-24.

³ Dahaka dainai guna ia manau peroveta tauna be ia hekokoroku bona tau burukana ia bamoa? Baibel be unai ena badina ia gwauraia lasi. To reana ia laloaboio ia be “mai manau danu Dirava danu do [ia] raka hebou” be namo. (Mika 6:8 duahia.) Baibel lalonai, Iehova ida raka hebou ena anina be ia oi abidadama henia, iena lohia siahuna oi abia isi, bona iena hakaua dalana oi badinaia. Manau tauna be ia diba ia ese iena lalokau bona siahu ibounai Tamana ia hereva henia diba bona unai ia karaia hanaihanai be namo. Unai peroveta tauna be Iehova ena heduru ia noia lasi, bona Baibel ia gwau lasi ia be unai ia karaia. Nega haida, ita danu be abia hidi aukana ita karaia diba, bona reana ita daradara dahaka do ita karaia. To mai manau ida Iehova ena heduru tahua karana ese ita do ia durua kerere badadia ita karaia lasi totona.

4. Inai stadi ai dahaka do ita herevalaia?

⁴ Vanegai stadi ai ita itaia, Keristani taudia dekenai manau karana be mai anina bada bona unai kara ita hahedinaraia ena namo danu ita herevalaia. To, edena bamona negadiai manau karana ita hahedinaraia be auka? Bona edena dala ai unai kara namona ita hahedinaraia noho diba, herevana hekwakwanai idia vara? Unai henanadai haerelaidia totona, mani iseda manau karana idia tohoa diba gaudia toi ita laloa, bona do ita karaia karana do ita herevalaia danu.​—⁠Aon. 11:⁠2.

ISEDA NOHO DALANA IA IDAU NEGANAI

5, 6. Edena dala ai Barasilai be manau karana ia hahedinaraia?

⁵ Iseda noho dalana eiava asainmen ia idau neganai, do ia auka manau karana ita hahedinaraia totona, ani? Davida ese mauri lagani 80 tauna, Barasilai, ia noia ia ida king ena ruma ai do idia noho neganai, reana Barasilai ia moale bada. Bona ia laloa bema ia ese Davida ena noinoi ia abia dae, ia be king do ia bamoa noho. To, Barasilai ese unai noinoi ia abia dae lasi. Dahaka dainai? Ia be ia buruka momokani dainai, Davida ia hamaoroa ia ura lasi king dekenai metau ia henia. Bona Barasilai ese Davida ia noia iena natuna Kimuhamu ese iena gabu ia abia totona.​—⁠2 Sam. 19:​31-37.

⁶ Barasilai ia manau dainai, abia hidi maorona ia karaia. To, namo lasi ita laloa ia ese Davida ena noinoi ia abia dae lasi, badina ia be ia hegeregere lasi king ese ia henia maduna ia huaia eiava ia ura ena gaukara amo ia doko, unai amo ena mauri ia moalelaia diba. Lasi, to ia ese unai abia hidi ia karaia badina ia diba hari ia buruka bona iena goada be ia hegeregere lasi. Bona ia ura lasi maduna ma haida ia abia. (Galatia 6:​4, 5 duahia.) Bema dagi o ladana bada sibona ita laloa bada, eiava ma haida ese idia itaia totona gau haida ita karaia, ita be sibona ita laloa bona ita kara helulu diba, bona gabeai do ita lalohisihisi. (Gal. 5:26) To, manau karana ese ita ibounai do ia durua, unai amo orea ta bamona Dirava do ita hanamoa hebou bona ma haida do ita durua.​—⁠1 Kor. 10:⁠31.

7, 8. Sibona iseda diba dekenai ita tabekau lasi totona, edena dala ai manau karana ese ita ia durua diba?

⁷ Bema emu dagi be bada, emu maduna danu be do ia bada, bona unai ese emu manau karana ia tohoa diba. Nehemia be Ierusalema taudia edia hekwakwanai ia kamonai neganai, Iehova ia guriguri henia. (Neh. 1:​4, 11) King Aratasaseta ese Nehemia be gavana ai ia halaoa neganai, Iehova ese idia ia hanamoa. Ena be Nehemia ena dagi bona siahu be bada, bona ena kohu danu be momo, to ia be sibona ena diba o goada dekenai ia tabekau lasi. Ia be Dirava ia badinaia noho. Bona nega ibounai Dirava ena taravatu ia duahia, unai amo Iehova ena hakaua dalana ia tahua. (Neh. 8:​1, 8, 9) Nehemia be ma haida ia biagua auka lasi, to iena moni ia gaukaralaia idia ia durua totona.​—⁠Neh. 5:​14-19.

⁸ Nehemia ena haheitalai amo ita dibaia gauna be inai, iseda asainmen ia idau eiava maduna ma haida ita abia neganai, namona be ita manau bona sibona iseda diba dekenai ita tabekau lasi. Bema elda tauna be sibona ena diba dekenai ia tabekau, ia ese kongrigeisen gaukara haida dekenai Iehova ena heduru do ia noia lasi. Ma haida be reana abia hidi idia karaia guna, bona gabeai Iehova idia noia edia abia hidi ia hanamoa totona. To, unai be manau karana, a? Manau tauna be nega ibounai ena gaukara Dirava bona ena orea dekenai ia laloa bada. Ena be iseda diba be bada, to bema hekwakwanai ta ita davaria, namo lasi sibona iseda diba dekenai ita tabekau. (Aonega Herevadia 3:​5, 6 duahia.) Ita be Dirava ena ruma bese taudia dainai, ita ura ruma bese o kongrigeisen lalona ita abia maduna idauidau ita hagugurua, to namo lasi dagi bada ita tahua.​—⁠1 Tim. 3:⁠15.

ITA IDIA HEVASEHA O HANAMOA NEGANAI

9, 10. Ita idia hevasehalaia neganai, manau karana ese edena dala ai ita ia durua diba?

⁹ Bema nega ibounai ta ese oi ia hevasehalaia, reana do ia auka emu hemami oi biagua totona. Hana be hanaihanai ia tai, badina nega ibounai Penina ese ia hevasehalaia. Hana ena adavana ese ia lalokau henia, to ia be ia gabani. Gabeai, ia be dubu helaga dekenai ia guriguri neganai, Hahelaga Tauna Badana Eli ia laloa ia inuinu kekero. Mani oi laloa! Ena be unai ibounai ia vara, Hana be ia badu lasi to ia manau bona mai hemataurai ida Eli ia hereva henia. Ia gwauraia gurigurina be Baibel lalonai ia noho. Unai guriguri lalonai iena abidadama, Dirava hanamoa herevadia, bona ena tanikiu herevadia idia noho.​—⁠1 Sam. 1:​5-7, 12-16; 2:​1-10.

¹⁰ Manau karana ese ita do ia durua “kara namo amo dika [ita] halusia noho” totona. (Roma 12:21) Satani ena tanobada ai hekwakwanai be momo, bona kara dika taudia edia kara ese ita idia habadua diba, to namona be ita hekwarahi badu karana ita dadaraia totona. (Sal. 37:⁠1) Tadikaka taihu huanai hekwakwanai ia vara neganai, ita lalohisihisi bada diba. Manau tauna ese Iesu do ia tohotohoa. Baibel ia gwau: “Ia idia hereva dika henia neganai, idia ia hereva dika henia lou lasi . . . to ia hahemaoro maoromaoro tauna ena imana dekenai ia sibona ia atoa.” (1 Pet. 2:23) Iesu ia diba dika ena davana be Iehova sibona ese do ia henia. (Roma 12:19) Unai hegeregerena, Baibel ese Keristani taudia ia haganidia do idia lalomanau, bona “dika ia karaia tauna ena dika davana [idia] henia lou” lasi.​—⁠1 Pet. 3:​8, 9.

11, 12. (a) Edena dala ma haida ai manau karana ese ita ia durua diba? (b) Iseda dabua bona kara amo edena dala ai manau karana ita hahedinaraia diba?

¹¹ Lalona veria herevadia gwauraia o ena ladana abia isi karana ese iseda manau karana ia tohoa diba. Mani Eseta ita laloa. Ia be hairai momokani bona lagani tamona lalonai muramura namodia amo iena kopina idia dahua, bona ia dekenai aniani namodia idia henia. Parasa Basileiana ena gabu ibounai amo hahine matamata momo idia mai danu, king ese ia lalonamo henidia totona. To Eseta be ia hemataurai bona ena hemami ia biagua. Danu ia hekokoroku lasi, herevana King ese ia be iena kwini ai ia halaoa.​—⁠Est. 2:​9, 12, 15, 17.

¹² Manau karana ese ita ia durua diba mai hemataurai ida dabua ita hahedokilaia bona ita kara namo totona. Momokani, bema ita ura taunimanima ese ita idia ura henia, namo lasi ita hekokoroku eiava ma haida edia lalona ita veria ita idia laloa bada totona, to namona be “lalomanau bona dagedage lasi karadia” ita hahedinaraia. (1 Petero 3:​3, 4 duahia; Ier. 9:​23, 24) Iseda kudouna ai idia noho lalohadai kavakavadia be iseda kara amo ia hedinarai diba. Hegeregere, iseda kara amo ita hahedinaraia diba ita be kongrigeisen lalonai maduna badadia ita huaia, hehuni sivarai haida ita diba, eiava iseda turadia haida be maduna idia huaia tadikaka. Eiava gau haida ita hahedinaraia namonamo dainai ita sibona ese hanamoa ita abia, herevana ma haida edia heduru amo unai ia vara. Iesu ese haheitalai namona ia hahedinaraia. Ia ese ia gwauraia herevadia ibounai be Heberu Toretoredia amo ia abia. Ia be mai manau ida unai bamona ia karaia, unai amo iena kamonai taudia do idia diba ia gwauraia hereva ibounai be Iehova amo idia mai bona ia be sibona ena aonega amo ia hereva lasi.​—⁠Ioa. 8:⁠28.

ITA DARADARA NEGANAI

13, 14. Abia hidi maorodia ita karaia totona, edena dala ai manau karana ese ita do ia durua?

¹³ Ita karaia abia hidi idauidau ese iseda manau karana ia tohoa diba danu. Aposetolo Paulo be Kaisarea dekenai ia noho neganai, peroveta tauna Agabo ese ia hamaoroa, bema ia be Ierusalema dekenai ia lao, ia do idia dogoatao bona hadiburaia, bona do idia hamasea danu. Unai dainai tadikaka ese Paulo idia noia Ierusalema dekenai do ia daekau lao lasi. To, idia ese Paulo ena lalona idia haidaua diba lasi. Bona danu, ia be sibona ena diba dekenai ia tabekau lasi o gari dainai ia manoka lasi. Ia ese Iehova ia abidadama henia momokani bona ia noho hegaegae, Iehova ese ia siaia gabudia dekenai ia lao totona. Vadaeni tadikaka idia manau bona Paulo idia koua lou lasi, bona ia be Ierusalema dekenai ia lao.​—⁠Kara 21:​10-14.

¹⁴ Danu, manau karana ese ita ia durua diba abia hidi maorodia ita karaia totona, herevana ita diba lasi dahaka do ia vara. Hegeregere, bema ful-taim hesiai gaukara ta ita karaia matamaia, to gabeai ita gorere, ita dekenai dahaka do ia vara? Bema iseda tama sina burukadia be iseda heduru idia noia be edena bamona? Ita buruka neganai, edena bamona ita sibona ita naria diba? Ena be guriguri momo ita gwauraia o tahua karana ita karaia, to unai bamona henanadai edia haere korikori ita davaria diba lasi. (Had. 8:​16, 17) Iehova abidadama henia karana ese ita do ia durua, unai amo do ita laloparara iseda diba o goada be mai hetoana. Bona tahua karana ita karaia, ma haida edia lalohadai ita tahua, bona heduru totona ita guriguri murinai, Dirava ena lauma ese ita ia hakaua dalana hegeregerena ita kara. (Hadibaia Tauna 11:​4-6 duahia.) Bena Iehova ese ita do ia hanamoa, eiava dala maorona ai ita do ia hakaua.​—⁠Aon. 16:​3, 9.

MANAU HAHEDINARAIA NOHO

15. Dirava ena lalokau karadia laloa dobu karana ese edena dala ai ita ia durua ita manau totona?

¹⁵ Manau karana ese namo bada ia havaraia diba, unai dainai edena dala ai unai kara ita hahedinaraia badabada diba? Mani dala 4 ita herevalaia. Dala ginigunana be inai, namona be Iehova ena kara badadia bona iena dagi ita laloa dobu, unai amo do ita manau bona Ia ita matauraia bada diba. (Isa. 8:13) Laloatao, ita be Siahu Ibounai Diravana ida ita raka noho, to aneru o tau ta ida lasi. Unai ita lalopararalaia neganai, ‘Dirava ena imana goadana henunai ita sibona ita hamanaua’ diba.​—⁠1 Pet. 5:⁠6.

16. Ma haida edia kara namodia ita laloa ena namo be dahaka?

¹⁶ Dala iharuana, Iehova ena lalokau karadia laloa dobu karana ese ita do ia durua ita manau totona. Aposetolo Paulo ia gwau Iehova ese idia namo lasi tauanina ena kahana haida be ia “naria namonamo.” (1 Kor. 12:​23, 24) Unai hegeregerena, Iehova be ita ta ta ia laloa bada, herevana iseda diba o goada be mai hetoana. Ia ese ma haida ida ita ia hahegeregerea lasi eiava ita kerere neganai, iena lalokau ia hahedinaraia noho. Iehova ena lalokau dainai, herevana edeseniai ia ita hesiai henia, ia ese ita do ia naria.

17. Ma haida edia kara namodia ita laloa ena namo be dahaka?

¹⁷ Dala ihatoina, Iehova ena hesiai gaukara do ita moalelaia, bema Dirava hegeregerena, ma haida edia kara namodia ita laloa. Namo lasi ita ura taunimanima ese iseda ladana idia abia isi eiava ma haida ese idia karaia gaukaradia ita ura henia, to manau karana be ma haida edia lalohadai ita tahua bona ita abia dae. (Aon. 13:10) To idia be hahenamo idia abia neganai, namona be idia ida ita moale. Bona Iehova do ita tanikiu henia, badina ia ese “tadikaka oreana tanobada hegegemadai” ia hanamoa.​—⁠1 Pet. 5:⁠9.

18. Edena dala ai iseda lalomamina ita hadibaia diba?

¹⁸ Dala namba 4, Baibel ena hakaua herevadia hegeregerena iseda lalomamina ita hadibaia neganai, ita be mai manau bona hemataurai ida ita kara diba. Bona bema Iehova ena lalohadai hegeregerena ita laloa, mai laloa maoromaoro ida gau do ita karaia. Nega ibounai sibona eda stadi ita karaia, ita guriguri, bona ita dibaia gaudia ita badinaia neganai, iseda lalomamina ita hagoadaia diba. (1 Tim. 1:⁠5) Bona ma haida do ita atoa guna. Bema unai ita karaia, Iehova ia gwauhamata ia ese iseda “treinini do ia hagugurua,” unai amo manau bona kara namodia ma haida ita hahedinaraia diba.​—⁠1 Pet. 5:⁠10.

19. Dahaka ese ita do ia durua, unai amo do ita manau noho ela bona hanaihanai?

¹⁹ Iuda ena peroveta tauna ena hekokoroku karana dainai iena mauri ia haboioa bona ena hetura karana Dirava ida ia hadikaia. Unai dainai hekwakwanai ia vara neganai, manau karana ita hahedinaraia noho be namo. Idia mase vadaeni abidadama taudia bona hari idia noho manau taudia ese unai idia hamomokania. Iehova ida ita raka noho neganai, do ita ura manau karana ita hahedinaraia. (Aon. 8:13) Herevana dahaka, Iehova ida ita raka karana be hahenamo badana. Namona be unai hahenamo ita laloa bada, bona ita gaukara goada noho mai manau ida Iehova danu do ita raka ela bona hanaihanai.