“Idau Bese Taudia” Durua Iehova ‘Do Idia Tomadiho Henia, mai Edia Moale Danu’

1, 2. (a) Iseda tadikaka taihu haida dekenai dahaka ia vara? (b) Dahaka henanadai idia vara?

TADIKAKA ta ladana Lije, ia gwau: “Burundi ai, tuari ia vara matamaia neganai, emai famili be hebouhebou ta dekenai idia noho. Ai itaia taunimanima idia heau noho lalonai idia pididia. Egu tama sina bona ai natudia 11 be ai heau mauri, bona gau momo ai abia lasi. Egu famili haida be kilomita 1,600 idia raka ela bona Malawi ena refiuji kamepa dekenai idia ginidae. To ai haida be gabu idauidau dekenai ai lao.”

² Tanobada hegegemadai, tuari o dagedage dainai edia tano idia rakatania refiuji taudia be hari 65,000,000 mai kahana, unai ese guna ena namba ia hanaia.a Idia tausen momo be Iehova ena Witnes taudia. Idia momo ese edia lalokau taudia bona kahirakahira edia kohu ibounai idia haboioa. To, ma haida dekenai dahaka ia vara? Unai tadikaka taihu be edena dala ai ita durua diba, unai amo Iehova ‘do idia tomadiho henia, mai edia moale danu,’ herevana dagedage idia davaria? (Sal. 100:2) Bona edena dala ai Iehova idia diba lasi refiuji taudia dekenai sivarai namona ita harorolaia diba?

REFIUJI TAUDIA EDIA MAURI

3. Dahaka dainai Iesu bona ena hahediba taudia momo be refiuji taudia ai idia lao?

³ Iehova ena aneru ese Iosepa ia hamaoroa King Heroda ia ura Iesu ia hamasea neganai, Iesu bona ena tama sina be refiuji taudia bamona Aigupito ai idia noho. Unuseniai idia noho ela bona Heroda ia mase. (Mat. 2:13, 14, 19-21) Lagani momo murinai, Iesu ena hahediba taudia ginigunadia be dagedage dainai, “idia heau bona idia be Iudea bona Samaria ena gabu ibounai dekenai idia lao.” (Kara 8:1) Iesu ia peroveta, ia murinai idia raka taudia momo be edia tano amo do idia luludia. Ia gwau: “Taoni ta dekenai umui idia dagedage henia neganai, taoni ma ta dekenai umui heau lao.” (Mat. 10:23) Badina ta dainai emu tano oi rakatania be nega momo ia auka.

4, 5. Refiuji taudia be dahaka dika idia davaria diba (a) idia heau neganai? (b) kamepa ai idia noho neganai?

⁴ Refiuji taudia idia heau eiava refiuji kamepa dekenai idia noho neganai, dika idia davaria diba. Lije ena tadina Gad, ia gwau: “Wiki momo ai raka, bona mase tauanidia handred momo ai hanaia. Unai nega ai egu muri lagani be 12. Egu aena idia gudu bada herea dainai, egu famili lau hamaoroa lau do idia rakatania. To, egu tamana ia ura lasi dagedage oreana ese lau idia davaria dainai, lau ia huaia. Dina ta ta ena aniani sibona ai laloa, Iehova ai guriguri henia bona ia dekenai ai abidadama, nega haida dala badinai idia gini vaivai sibona ai ania.”​—Fili. 4:12, 13.

⁵ Lije ena famili momo be lagani momo United Nations ena refiuji kamepa dekenai idia noho. To, unuseniai dika idia davaria diba. Lije, hari ia be sekit naria tauna, ia gwau: “Taunimanima momo be gaukara lasi. Idia udu mauri, kekero, laki gadara idia karaia, henaohenao, bona matabodaga karadia idia karaia.” Unai bamona karadia idia dadaraia totona, namona be kamepa ai idia noho Witnes taudia be kongrigeisen ena gaukara idauidau dekenai idia bisi. (Heb. 6:11, 12; 10:24, 25) Edia abidadama ia goada totona, namona be edia nega idia gaukaralaia namonamo, momo be painia gaukara idia karaia. Nega ibounai idia moale, bona Israela taudia be tano gagaena ai idia loaloa negana idia laloa, idia diba kahirakahira unai kamepa do idia rakatania.​—2 Kor. 4:18.

REFIUJI TAUDIA DEKENAI LALOKAU HAHEDINARAIA

6, 7. (a) “Dirava ena lalokau” ese edena dala ai Keristani taudia ia hagoadaia edia tadikaka idia durua totona? (b) Haheitalai ta gwauraia.

⁶ Bema nega dikadia idia vara, “Dirava ena lalokau” ese ita ia hagoadaia ta ta dekenai lalokau ita hahedinaraia totona. (1 Ioane 3:17, 18 duahia.) Aposetolo edia negai, Iudea Keristani taudia dekenai hitolo bada ia vara neganai, kongrigeisen taudia be dala idia tahua heduru idia henia totona. (Kara 11:28, 29) Danu, aposetolo Paulo bona Petero ese Keristani taudia idia hagoadaia ta ta dekenai heabidae karana do idia hahedinaraia. (Roma 12:13; 1 Pet. 4:9) Bema Keristani taudia ese vadivadi tadikakadia idia abia dae, namona be edia abidadama dainai dagedage idia davaria eiava kahirakahira edia mauri idia haboioa tadikaka idia abia dae danu!​—Aonega Herevadia 3:27 duahia.b

⁷ Vanegai Ukraine ena ist kahanai, tuari bona dagedage ia vara dainai, Iehova ena Witnes taudia tausen momo​—tatau, hahine, bona natudia​—be unai gabu idia rakatania. Madi, idia haida be idia hamasedia. To idia momo be Ukraine ena gabu ma haida ai idia noho tadikaka haida ese idia abia dae, bona ma haida be Russia ai idia noho Witnes taudia ida idia noho. Unai tano rua ai, idia be politikol karadia lalonai idia vareai lasi, badina idia be “tanobada ena lasi” bona “sivarai namona idia harorolaia” goadagoada.​—Ioa. 15:19; Kara 8:4.

REFIUJI TAUDIA DURUA EDIA ABIDADAMA IDIA HAGOADAIA TOTONA

8, 9. (a) Tano matamata ai idia noho refiuji taudia be dahaka hekwakwanai idia davaria diba? (b) Dahaka dainai mai haheauka ida idia ita durua be namo?

⁸ Refiuji taudia haida be edia tano ena kahana ta dekenai idia atodia, to idia momo be idia diba lasi tanodia dekenai idia siaia. Gavamani ese reana aniani, dabua, bona ruma ia henidia, to nega momo idia manadalaia aniani idia abia lasi. Siahu tanodia amo idia mai refiuji taudia be reana nega ginigunana paraka idia mamia bona idia diba lasi edena bamona dabua do idia hahedokilaia. Bema idia be hanua gabudia amo idia mai, reana ruma ena kohu matamatadia gaukaralaia daladia do idia diba lasi.

⁹ Gavamani taudia haida be program idauidau idia hegaegaelaia, unai amo refiuji taudia be edia mauri dala matamatana idia manadalaia diba. To, hua haida murinai refiuji taudia be sibodia do idia naria. Nega haida unai idia karaia be auka. Mani oi laloa, idia be gado matamata do idia dibaia, bona gau davadia karaia dalana, takisi, sikuli lao henia karana, bona natudia hadibaia karana dekenai idia noho taravatu matamatadia do idia badinaia! Unai bamona hekwakwanai idia davaria tadikaka taihu be mai haheauka bona hemataurai ida oi durudia diba, a?​—Fili. 2:3, 4.

10. Edena dala ai refiuji tadikaka edia abidadama ita hagoadaia diba? (Laulau ginigunana herevalaia.)

¹⁰ Nega haida gavamani taudia ese iseda tadikaka taihu idia koudia kongrigeisen heboudia dekenai idia lao lasi totona. Hegeregere, gavamani orea haida ese tadikaka idia hagaridia, idia gwau bema idia henia moni gaukarana idia dadaraia, edia heduru do idia abia lasi o edia tano dekenai do idia siaidia giroa. Tadikaka haida be idia gari bona lalohisihisi dainai, unai orea edia hereva idia badinaia. Unai dainai, iseda refiuji tadikaka idia ginidae neganai, namona be idia ita hedavari henia haraga. Unai amo do idia diba ita be idia ita laloa. Iseda hebogahisi bona heduru karana ese edia abidadama ia hagoadaia diba.​—Aon. 12:25; 17:17.

REFIUJI TAUDIA DURUA DALADIA

11. (a) Edena dala ai refiuji taudia ita durua diba? (b) Refiuji taudia be edena dala ai tanikiu karana idia hahedinaraia diba?

¹¹ Matamanai, ita ese iseda tadikaka dekenai aniani, dabua, eiava heduru gaudia ma haida do ita henia.c Eiava harihari gauna maragina ita henia diba, hegeregere tadikaka dekenai nektai ita henia, unai do ia moalelaia. Bona bema refiuji taudia be edia tanikiu karana idia hahedinaraia, bona gau momo idia noia lasi, heduru idia henia taudia be henia karana ena moale do idia mamia. To, refiuji taudia be sibodia naria dalana idia diba be mai anina bada. Bema unai idia karaia, sibona do idia matauraia bona edia hetura karana tadikaka taihu ida be do ia goada. (2 Tes. 3:7-10) To gau ma haida dekenai ita durudia be namo.

12, 13. (a) Edena dala ai refiuji taudia ita durua diba? (b) Haheitalai ta gwauraia.

¹² Refiuji taudia durua totona moni bada ita haboua be anina lasi. Idia ura bada gauna be iseda nega bona lalokau. Hegeregere, idia dekenai basi abia dalana, davana maragi aniani namodia hoia gabudia, eiava gaukara tulu idauidau abia dalana o ima gaukara dibaia daladia ita hadibaia, unai amo sibodia durua monina idia karaia diba. To mai anina bada gauna be, idia ita durua edia kongrigeisen matamatana idia diba namonamo totona. Bema hegeregere, hebou dekenai do oi hakaudia lao. Danu, emu teritori ai idia noho taudia dekenai Basileia ena sivarai namona harorolaia dalana oi hadibaia. Haroro gaukara totona refiuji tadikaka taihu oi bamodia diba.

¹³ Refiuji memero matamata 4 be kongrigeisen ta dekenai idia mai neganai, elda taudia ese idia dekenai motuka taria dalana, kompiuta gaukaralaia dalana, bona gaukara tahua dalana idia hadibaia. Bona edia nega gaukaralaia namonamo dalana idia hadibaia danu, unai amo Iehova ena hesiai gaukara idia atoa guna diba. (Gal. 6:10) Gabeai, unai memero 4 be painia taudia ai idia lao. Tadikaka edia heduru bona Iehova ena hesiai gaukara lalonai tahua gaudia namodia idia atoa dainai, idia be Keristani taudia ai idia lao bona Satani ena tanobada idia dadaraia.

14. (a) Refiuji taudia be edena hahetoho idia dadaraia be namo? (b) Haheitalai ta gwauraia.

¹⁴ Keristani taudia ma haida hegeregerena, refiuji taudia ese kohu momo tahua karana idia dadaraia be namo, unai amo edia hetura karana Iehova ida idia gimaia diba.d Tadikaka Lije be ena famili ida ia heau mauri neganai, edia tamana ese edia abidadama hagoadaia totona sisiba namodia ia henia, bona unai idia laloatao. “Ia ese emai baege lalonai idia noho anina lasi gaudia ta ta ia negedia. Dokonai, baege kavakava ia dogoatao bona mai kiri ida ia gwau: ‘Umui itaia? Inai sibona umui abia be namo!’”​—1 Timoteo 6:8 duahia.

REFIUJI TAUDIA IDIA URA BADA GAUNA

15, 16. Edena dala ai iseda tadikaka (a) edia abidadama ita hagoadaia diba? (b) edia lalona ita hagoadaia diba?

¹⁵ Refiuji taudia be aniani bona kohu sibona idia ura henia lasi, to edia abidadama ia goada noho totona, heduru idia abia be namo. (Mat. 4:4) Refiuji taudia durua totona, elda taudia ese idia dekenai edia gado ai idia halasia buka bona magasin do idia henia bona edia gado idia diba tadikaka idia hereva henia diba. Refiuji taudia momo be edia famili, noho gabuna, bona kongrigeisen idia rakatania. Unai dainai edia Keristani tadikaka taihu amo Iehova ena lalokau bona hebogahisi idia mamia be namo. Bema unai idia mamia lasi, edia hanua tamona taudia amo heduru do idia tahua. (1 Kor. 15:33) Kongrigeisen dekenai idia ita abia dae neganai, Iehova hegeregerena, ita ese “idau bese taudia [ita] gimaia.”​—Sal. 146:9.

¹⁶ Iesu bona ena famili hegeregerena, refiuji taudia be edia hanua dekenai idia giroa lou diba lasi, bema edia dagedage taudia be idia do lohia noho. Lije ia gwau: “Tama sina momo idia itaia edia famili taudia be unai dagedage oreadia ese idia reipia bona alaia mase dainai, idia ura lasi edia natudia be edia hanua dekenai idia abia giroa.” Unai bamona taudia durua totona, namona be ita hahedinaraia ita be edia hemami ita laloa, idia ita lalokau henia, ita hebogahisi henidia, bona ita lalomanau. (1 Pet. 3:8) Dagedage karadia dainai, refiuji taudia haida be ma haida idia bamoa lasi, bona reana idia hemarai edia natudia vairanai idia dekenai ia vara gauna idia sivarailaia totona. Sibona oi nanadaia, ‘Bema unai be lau, do lau ura ma haida ese edena bamona lau do idia kara henia?’​—Mat. 7:12.

WITNES LASI REFIUJI TAUDIA HARORO HENIA

17. Refiuji taudia haroro henia karana ese edena dala ai idia ia hagoadaia?

¹⁷ Refiuji taudia momo be iseda haroro gaukara idia taravatua tanodia amo idia mai. To, ita moale badina idia lao tanodia ai, tadikaka taihu momo idia gaukara goada dainai, refiuji taudia tausen momo be “Basileia ena hereva [idia] kamonai.” (Mat. 13:19, 23) “Metau bada” idia huaia taudia momo be iseda kongrigeisen heboudia ai lalogoada idia abia, bona haraga idia gwau: “Momokani, Dirava be umui huanai ia noho.”​—Mat. 11:28-30; 1 Kor. 14:25.

18, 19. Refiuji taudia ita haroro henia neganai, edena dala ai do ita aonega?

¹⁸ Refiuji taudia idia haroro henia taudia idia “naria namonamo” bona idia “aonega” be namo. (Mat. 10:16; Aon. 22:3) Mai lalomanau ida edia lalohekwarahi oi kamonai, to politik karadia oi herevalaia lasi. Brens ofesi bona gavamani edia hakaua herevadia oi badinaia; namo lasi oi eiava ma haida be dika idia davaria. Refiuji taudia edia tano ena kastom bona tomadiho ita dibaia bona matauraia be namo. Hegeregere, tano ma haida taudia idia laloa hahine be dabua maorodia idia hahedokilaia be namo. Unai dainai refiuji taudia ita haroro henia neganai, hemataurai dabua ita hahedokilaia be namo, unai amo idia do ita hahekwakwanaia lasi.

¹⁹ Iesu ese ia gwauraia Samaria tauna ena haheitalai hegeregerena, ita ura dagedage bona hisihisi idia davaria Witnes lasi taudia ita durua. (Luka 10:33-37) Bona dala hereadaena be idia dekenai sivarai namona ita harorolaia. Refiuji taudia momo ia durua elda tauna ta ia gwau: “Namona be maoromaoro idia ita hadibaia ita be Iehova ena Witnes taudia bona ita ura Baibel amo idia ita durua, to idia dekenai kohu o aniani do ita henia lasi. Badina dika haida be edia ura gaudia abia sibona totona ita idia bamoa.”

MOALE GAUNA

20, 21. (a) Refiuji taudia dekenai Keristani lalokau ita hahedinaraia neganai, dahaka namo ia vara? (b) Stadi gabena ai dahaka do ita herevalaia?

²⁰ “Idau bese taudia” dekenai Keristani lalokau hahedinaraia karana ese namo ia havaraia. Taihu ta ladana, Alganesh, ena adavana ia mase neganai, ia bona ena natudia 6 be Eritrea ai ia vara dagedage karana amo idia heau mauri. Dina 8 lalonai taunimanima idia noho lasi gabuna idia raka hanaia murinai, Sudan dekenai idia ginidae. Ia gwau: “Unuseniai idia noho tadikaka ese ai be edia varavara korikori hegeregerena idia kara henia, ai dekenai aniani, dabu, noho gabuna idia henia, bona edia motuka amo ai idia udaia. Daika ese idau tauna be iena ruma dekenai ia abia dae diba, badina idia be Dirava tamona idia tomadiho henia? Iehova ena Witnes taudia sibona!”​—Ioane 13:35 duahia.

²¹ Edia tama sina ida idia mai natudia be edena bamona? Stadi gabena ai, do ita itaia edena bamona unai natudia ita durua diba mai moale ida Iehova idia hesiai henia totona.