Haida Matauraia

1. Dahaka dainai taunimanima ese ita idia matauraia neganai ita moale? (Aonega Herevadia 22:1)

TAUNIMANIMA ese oi dekenai hemataurai idia hahedinaraia neganai oi moale, a? Oibe. Badina taunimanima ibounai idia ura haida ese do idia matauraia. Unai dainai Baibel ia gwau: “Ta matauraia karana ese siliva bona golo ia hereaia”!—Aonega Herevadia 22:1 duahia.

2-3. Dahaka dainai nega haida ia auka hemataurai ita hahedinaraia totona? Bona daidia dekenai hemataurai ita hahedinaraia be namo?

² Nega haida do ia auka ma haida dekenai hemataurai ita hahedinaraia totona. Badina ma haida edia kerere ita laloa. Danu, hari iseda nega ai taunimanima momo be hemataurai karana idia hahedinaraia lasi. To namo lasi edia kara ita badinaia. Dahaka dainai? Badina Iehova ia ura “taunimanima idauidau ibounai” ita matauraia.—1 Pet. 2:17.

³ Inai atikol ai ma haida ita matauraia karana ita herevalaia neganai, ita do ia durua. Bona (1) iseda ruma taudia, (2) tadikaka bona taihu, bona (3) ma haida dekenai hemataurai ita hahedinaraia dalana do ita herevalaia. Danu bema unai kara ita hahedinaraia totona ia auka neganai do ita karaia gauna ita herevalaia.

MA HAIDA MATAURAIA KARANA ENA ANINA BE DAHAKA?

4. Ma haida matauraia karana ena anina be dahaka?

⁴ Hemataurai ena anina be taunimanima ita laloa bona idia ita kara henia namonamo. Haida ita matauraia neganai, idia dekenai ita hahedinaraia idia ita laloa bada badina reana kara namodia idia hahedinaraia, gau haida idia karaia bona idia be mai edia dagi. Bona unai ita karaia be mai anina bada, badina unai kara ita ura hahedinaraia.

5. Ma haida ita matauraia totona, dahaka ese ita ia durua diba?

⁵ Iehova ia ura ma haida dekenai hemataurai karana ita hahedinaraia. Hegeregere, ia ura gavamani taudia do ita matauraia. (Roma 13:1, 7) To haida idia gwau: “Do lau moale haida dekenai hemataurai karana lau hahedinaraia totona, bema idia ese kara maorona idia karaia.” To unai be badina namona, a? Lasi. Ita be Iehova ena hesiai taudia dainai, ita laloparara taunimanima edia kara dainai idia ita matauraia sibona lasi, to unai kara ita hahedinaraia ena badina badana be Iehova ita lalokau henia bona ita ura ia ita hamoalea.—Ios. 4:14; 1 Pet. 3:15.

6. Bema ta be oi dekenai hemataurai ia hahedinaraia lasi, ia dekenai hemataurai oi hahedinaraia diba, a? (ena laulau itaia danu.)

⁶ Haida idia laloa, ‘bema ta be oi dekenai hemataurai ia hahedinaraia lasi, ia dekenai hemataurai oi hahedinaraia diba, a?’ Oibe. Mani haheitalai haida ita laloa. King Saulo be haida vairanai iena natuna Ionatana ia hahemaraia. (1 Sam. 20:30-34) To, Ionatana be ena tamana Saulo ia durua ela bona Saulo be tuari ai ia mase. (Eso. 20:12; 2 Sam. 1:23) Hahelaga Tauna Badana Eli ia gwau Hana be ia kekero. (1 Sam. 1:12-14) To ia be mai hemataurai ida Eli ia hereva henia, ena be Eli be tamana maduna bona Hahelaga Tauna Badana ena maduna ia huaia namonamo lasi. (1 Sam. 1:15-18; 2:22-24) Bona Atena taudia ese aposetolo Paulo idia hereva dika henia, ia idia gwauraia “herevahereva momo kavakava tauna.” (Kara 17:18) Ena be Paulo dekenai unai bamona idia hereva, to ia be mai hemataurai ida idia ia hereva henia. (Kara 17:22) Unai haheitalai ibounai ese ia hahedinaraia, Iehova ita lalokau henia bada bona ita ura ia ita hamoalea dainai, nega ibounai ita ura hemataurai karana ita hahedinaraia. To daidia dekenai hemataurai ita hahedinaraia bona ena anina be dahaka? Mani unai ita herevalaia.

RUMA BESE TAUDIA MATAURAIA

7. Dahaka dainai nega haida ruma bese taudia dekenai hemataurai ita hahedinaraia be ia auka?

⁷ Nega momo ita be ruma bese taudia ida ita noho dainai, edia kara namodia bona manoka gaudia ita diba. Haida be mai edia gorere o idia lalometau momo dainai ia auka idia ita naria totona. Haida be edia hereva bona kara amo ita idia hahisia diba. Iseda ruma bese lalonai maino ia noho be namo. To, bema ta be hemataurai ia hahedinaraia lasi, badu ia havaraia diba. Gorere ta arthritis ese tauanina idia gaukara hebou karana ia hadikaia hegeregerena, hemataurai hahedinaraia lasi karana ese ruma bese ena lalotamona ia hadikaia diba. To, gorere haida be idia hanamoa diba hegeregerena, famili lalonai hemataurai lasi karadia ita dadaraia diba.

8. Dahaka dainai ruma bese taudia ita matauraia be mai anina bada? (1 Timoteo 5:4, 8)

⁸ Dahaka dainai hemataurai ita hahedinaraia? (1 Timoteo 5:4, 8 duahia.) Paulo ese Timoteo dekenai ia siaia revareva ginigunana ai, ruma bese taudia be ta ta idia durua karana ia herevalaia. Ia gwau ruma bese taudia dekenai hemataurai ita hahedinaraia be namo, badina unai be iseda maduna bona Dirava ita badinaia dalana ta. Unai hereva ena anina be unai ita karaia badina Iehova ita lalokau henia, bona unai be iseda tomadiho ena kahana ta. Iehova ese ruma bese ia hamatamaia. (Efe. 3:14, 15) Unai dainai famili taudia dekenai hemataurai karana ita hahedinaraia neganai, ita be ruma bese ia Hamatamaia Tauna Iehova ita matauraia. (1 Tim. 5:4) Unai be badina badana ta ruma bese taudia ita matauraia totona!

9. Edena dala ai tau bona hahine be ta ta dekenai hemataurai karana idia hahedinaraia diba? (Laulau itaia danu.)

⁹ Hemataurai hahedinaraia dalana. Hemataurai ia hahedinaraia tau be ena adavana ia laloa bada. Unai be sibodia idia noho negana ai bona taunimanima vairana ai idia noho neganai ia hahedinaraia. (Aon. 31:28; 1 Pet. 3:7) Ia ese ena adavana ia botaia lasi, ia hahemaraia lasi bona anina lasi tauna bamona ia kara henia lasi. Argentina ai ia noho tadikaka ladana Ariel,a ia gwau: “Egu adavana be ia gorere dainai, nega haida ia gwauraia herevadia ese egu lalona ia hahisia. Unai ia vara neganai, sibona dekenai lau gwau, ‘Unai hereva be ena hemami korikori ia hahedinaraia lasi.’ Bena 1 Korinto 13:5 ena hereva lau laloa, bona unai ese lau ia hagoadaia mai hemataurai ida egu hahine ida lau herevahereva totona.” (Aon. 19:11) Hahine ese ena adavana ia matauraia dalana ta be ma haida dekenai ena adavana hanamoa hereva ia gwauraia. (Efe. 5:33) Ia ese hevaseha hereva eiava ladana hadikaia herevana ia gwauraia lasi. Badina ia diba unai bamona kara ese headava ia hadikaia diba. (Aon. 14:1) Italy ai ia noho taihu ena adavana be mai ena lalometau gorere dainai ia hekwarahi. Taihu ia gwau: “Nega haida lau mamia, egu adavana be ia wari momo. Guna egu hereva bona egu toana amo lau hahedinaraia ia lau matauraia lasi. To, lau davaria hemataurai idia hahedinaraia taudia lau bamoa neganai, unai ese lau ia durua egu adavana lau matauraia totona.”

10. Edena dala ai natudia ese edia tama sina idia matauraia diba?

¹⁰ Natudia e, emu tama sina ese idia atoa taravatu oi badinaia. (Efe. 6:1-3) Mai hemataurai ida emu tama sina oi hereva henia. (Eso. 21:17) Emu tama sina be idia buruka idia lao neganai, idia be emu heduru idia abia be namo. Emu goada oi gaukaralaia idia oi naria totona. Mani María ena haheitalai ita laloa. Iena tamana be Iehova ena Witnes tauna lasi. Iena tamana ia gorere neganai, ia auka ia naria totona. Maria ia gwau: “Lau guriguri egu tamana dekenai hemataurai karana lau hahedinaraia totona. Lau laloa bema Iehova ese lau ia noia egu tama sina lau matauraia totona, ia ese goada ia henia diba unai lau karaia totona. Nega idia hanaia lalonai lau laloparara, ena be tamana be ena kara ia haidaua lasi, to ia lau matauraia be gau badana.” Ena be iseda famili taudia be mai edia manoka gaudia, to idia ita matauraia neganai, ita hahedinaraia Iehova ena dala ita matauraia.

TADIKAKA BONA TAIHU DEKENAI HEMATAURAI HAHEDINARAIA

11. Dahaka dainai nega haida tadikaka bona taihu dekenai hemataurai ita hahedinaraia be auka?

¹¹ Tadikaka bona taihu be edia mauri lalonai Baibel ena hereva idia badinaia. To nega haida, haida ese ita idia kara namo henia lasi eiava iseda lalona idia hahisia. Bema tadikaka o taihu ta ese ita dekenai kerere ta ia karaia, do ia auka mai hemataurai ida ia ita kara henia totona. (Kol. 3:13) Unai nega ai dahaka ese ita do ia durua?

12. Dahaka dainai tadikaka taihu ita mataurai be mai anina bada? (2 Petero 2:9-12)

¹² Dahaka dainai hemataurai hahedinaraia? (2 Petero 2:9-12 duahia.) Petero be ena revareva amo ia hahedinaraia Keristani kongrigeisen ginigunana ai, haida be “hairai taudia,” Keristani elda taudia unai, dekenai mai hemataurai ida idia hereva lasi. Unai idia itaia aneru taudia be dahaka idia karaia? Idia be “Iehova idia matauraia dainai,” unai hemataurai lasi taudia dekenai hereva aukadia idia gwauraia lasi. Mani oi laloa! Ena be unai taudia idia hekokoroku, to goevadae anerudia be unai taudia idia matauraia. (Roma 14:10-12; Iuda 9 ida hahegeregerea.) Unai dainai ita danu namona be iseda tadikaka taihu ita matauraia. (Roma 12:10) Bema unai bamona ita karaia, ita hahedinaraia ita be Iehova ita matauraia.

13-14. Edena dala ai iseda tadikaka bona taihu ita matauraia diba? Haheitalai gwauraia. (Laulau itaia danu.)

¹³ Hemataurai hahedinaraia dalana. Elda taudia e, mai lalokau ida ma haida umui hadibaia. (File. 8, 9) Bema oi ura ta oi sisiba henia, namo lasi oi badu neganai oi karaia. Taihu taudia e, haida umui durua ta ta idia matauraia totona, maumau herevadia eiava ta ia hadikaia hereva umui dadaraia. (Tito 2:3-5) Elda taudia be hebou kahadia idia naria, haroro gaukara idia hakaua, bona “dala kererena ai ia raka tauna” idia durua dainai idia ita tanikiu henia, bona idia ida ita gaukara hebou neganai ita hahedinaraia idia ita matauraia.—Gal. 6:1; 1 Tim. 5:17.

¹⁴ Taihu ta Rocío be ia dekenai sisiba ia henia elda ta ia matauraia be auka. Ia gwau: “Lau mamia ia be lau ia kara auka henia. Ruma dekenai ia lau maumauraia. Ena be lau hahedinaraia lasi, to egu lalona ai lau ura lasi ena sisiba lau abia dae.” Dahaka ese Rocío ia durua? Ia gwau: “Egu Baibel duahiduahi lalonai, 1 Tesalonika 5:12, 13 lau duahia. Lau laloparara unai tadikaka dekenai hemataurai lau hahedinaraia lasi neganai, egu lalomamina ia dika. Iehova lau guriguri henia bona iseda pablikeisen lau stadilaia. Unai ese lau ia durua egu kara lau haidaua totona. Unai nega ai lau laloparara unai hekwakwanai ena badina be unai tadikaka lasi, to lau hekokoroku. Hari lau laloparara manau karana ese lau ia durua haida lau matauraia totona, bona egu kara lau hanamoa noho be namo. To lau ura hemataurai karana lau hahedinaraia, unai amo Iehova ese lau do ia lalonamo henia.”

MA HAIDA ITA MATAURAIA

15. Dahaka dainai ma haida ita matauraia be auka?

¹⁵ Nega momo haroro ai ita davaria taudia be idia ura lasi Baibel ena hereva idia kamonai. (Efe. 4:18) Haida be idia ura lasi badina idia maragi neganai idia dibaia gaudia idia ura badinaia. Iseda gaukara turadia bona sikuli taudia haida idia ura lasi ita idia tura henia. Bona iseda bosi eiava iseda tisa danu be iseda gaukara idia moalelaia lasi. Unai dainai metairametaira iseda kara do ia idau ia lao, bona unai bamona taudia dekenai kara namo bona hemataurai do ita hahedinaraia lasi.

16. Dahaka dainai Iehova idia do hesiai henia lasi taudia ita matauraia be mai anina bada? (1 Petero 2:12; 3:15)

¹⁶ Dahaka dainai hemataurai hahedinaraia? Laloatao, ma haida ita kara henia dalana be Iehova ese ia itaia noho. Aposetolo Petero ese Keristani taudia ia hadibaia, edia kara namodia ese ma haida ia durua diba “Dirava idia hanamoa” totona. Unai dainai ia ese idia ia hagoadaia “mai manau bona mai hemataurai ida” edia abidadama idia herevalaia totona. (1 Petero 2:12; 3:15 duahia.) Ena be kota vairanai idia gini eiava dekena taudia ida Baibel ena hereva idia gwauraia, Keristani taudia ese Witnes lasi taudia be mai hemataurai ida idia kara henia be namo. Badina Iehova be ita gwauraia hereva bona ita gwauraia dalana ia itaia bona ia kamonai noho. Unai dainai Witnes lasi taudia ita kara namo henia be gau badana!

17. Edena dala ai ma haida dekenai hemataurai karana ita hahedinaraia diba?

¹⁷ Hemataurai hahedinaraia dalana. Haroro gaukara ai ita ura lasi Baibel idia diba namonamo lasi taudia dekenai ita hahedinaraia idia ita hereaia. To ita ura ita hahedinaraia idia be Dirava ese ia laloa bada bona idia ese ita idia hereaia. (Hag. 2:7; Fili. 2:3) Bema oi abia dae gauna dainai, ta ese oi ia hereva auka henia, namo lasi ia dekenai hereva aukadia oi gwauraia. (1 Pet. 2:23) Bema oi be hereva aukadia oi gwauraia, namona be sori herevana oi gwauraia haraga. Gaukara gabuna ai ma haida dekenai edena bamona hemataurai karana oi hahedinaraia diba? (Tito 2:9, 10) Namona be oi be gaukara namonamo tauna, bona emu turadia dekenai kara namodia oi hahedinaraia. Bema oi kara momokani, gaukara oi karaia namonamo, bona mai kudouna ibounai ida oi gaukara, ena be taunimanima ese unai idia moalelaia eiava lasi, to oi ese Dirava oi hamoalea.—Kol. 3:22, 23.

18. Dahaka dainai ma haida dekenai hemataurai karana ita hahedinaraia be mai anina bada?

¹⁸ Badina namodia momo idia noho, ma haida ita matauraia totona. Ita herevalaia bamona, iseda ruma bese taudia ita matauraia neganai, ita hahedinaraia iseda ruma bese ena kwarana Iehova ita matauraia. Unai hegeregerena iseda tadikaka taihu ita matauraia neganai, iseda guba Tamana Iehova ita matauraia danu. Bona Witnes lasi taudia dekenai hemataurai karana ita hahedinaraia neganai, dala ita kehoa idia ese iseda Dirava do idia hanamoa bona matauraia totona. Ena be haida ese ita idia matauraia lasi, to idia ita matauraia be mai anina bada. Dahaka dainai? Badina Iehova ese ita do ia hanamoa. Ia gwauhamata: “Lau idia matauraia taudia do lau matauraia.”—1 Sam. 2:30.