Luke

The Question about Jesusʼ Authority (Mt 21.23-27; Mr 11.27-33)

20 Pu hisat pam God kīyat ep sinmuy tutuqaynaqe lomatuawit yuaata. Noqw God awwat mohpeq momṅwit-niqw, pu tutavot tūtutuqaynayaqam, wukwʼaʼyatuy amumum put aw ö́kihqe, 2 Aw paṅqaqwa: Kurs itamuy hihta āawnaa. Ya um hihta öqalat aw yank̇aṅw īit hintsaki? Ya hak uṅ it öqalat maqa? 3 Noqw pam lavayhtiqe amumi paṅqawu: Kurs nu tuwat umuy sūkw hihta tūviṅtani. Noqw uma nuy āawnayani. 4 Ura John kūyit akw tūtuvoylalawu. Ya pam haqaqw put makiwa? Sen ōveqatsit aṅqöʼ? Sen sinmuy amuṅaqöʼ? 5 Noqw puma put nānami yuaatotaqe paṅqaqwa: Ya sen itam Oṅaqʼö, kitotani? Soon qa pam itamumi paṅqawni: Noqw hinoqw uma put aw qa tūtuptsiwa? 6 Ya sen itam Sinmuy amuṅaqʼö kitotani? Noqw soon sinom sohsoyam itamuy qa tatatupqöqyani. Pi púmuyniqw John pas antsa God lavayʼayaata. 7 Noqw ōviy puma lavayhtotiqe aw paṅqaqwa: Pay kurs pi hin put háqaqwnihqat itam paṅqaqwani. 8 Noqw Jesus pumuy amumi paṅqawu: Pay ōviy nu piw soon hihta öqalat aw yank̇aṅw īit hintsakqey umuy āawnani.

The Parable of the Tenants in the Vineyard (Mt 21.33-46; Mr 12.1-12)

9 Pahsat pu pam tūwutsit hihta tuawiʼtaqat sinmuy amumi yuaativaqe amumi paṅqawu: Hak tāqa ōvat uyht, tumalayʼyuṅqamuy amumi put mātapt, wūyavo yāvoqhaqamii. 10 Pu ōvat kwaṅwtinisavotiqw, pam ovauyit tumalayʼyuṅqamuy amumi hoṅviayay hōna, puma aniwniyat aṅqw put maqayaniqat ōviyʼo. Noqw tuwat soq ovauyit tumalayʼyuṅqam put wuvahtotat, qa hihta hintaqat paṅqw hōnaya. 11 Pu piw pam sukw hoṅviayay pumuy amumi hōna. Noqw pay puma piw put wuvahtotat, hamanhintsatsnat, qa hihta hintaqat paṅqw lālayya. 12 Pu amuṅk puʼ pam piw sukw pumuy amumi hōna. Noqw piw pay puma put ȫputotat, qalavohaqami tūvaya. 13 Pahsat pu ovauyit himuyʼtaqa paṅqawu: Ya sen nu hinhtini? Han pi amumi pas aw iunaṅway itiy tavi. Pay k̇a as puma put aw yórikyeʼ, k̇aptsitotani. 14 Noqw ovauyit tumalayʼyuṅqam put tutwaqe, nānami lavayhtotiqe paṅqawa: Iʼ hapi nay akpetani. Taay, itam nīnayaqw, himu himuatniqa itahhimuniwhtini, kitota. 15 Pu ōviy puma ovauyit aṅqw qalavohaqami put wikyat, nīnaya. Taay, noqw ya ovauyiʼtaqa it ep sen pumuy hintsanni? 16 Pam piteʼ, imuy tumalayʼyuṅqamuy qöyeʼ, pas pētuy amumi ovauyit noani, pam kita. Noqw puma put nanaptaqe paṅqaqwa: Soon pantani. 17 Noqw pam pumuy amumi tātayht, paṅqawu: Ura yan peyʼta: Owa kīlalwaqamuy amuhpiy qalavo tūviwhqa hapi tuyqaatniwhti, yanʼi. Noqw ya pam lavayi hihta lavayhti? 18 Put owat ep yēvaqa yoyhni. Nīk̇aṅw ason pam hakiy aw yēveʼ, tostani.

The Question about Paying Taxes (Mt 22.15-22; Mr 12.13-17)

19 Noqw God awwat mohpeq momṅwit, tutavot tūtutuqaynayaqamuy amumum put lavayiyat māmatsya, suyan pi pam pumuy amunkiwakw sōmokyuaaykuqʼö; nihqe ōviy puma āpiy put ṅuayaniqey anhtotik̇aṅw, sinmuy mamqastoti. 20 Noqw ōviy puma put aw pās tūqayyuṅwa, piw hakim put mokmaniʼyuṅwniqat put aw hōnaya, puma hakim suan hinyuṅqey as nawipʼew hinyuṅqʼö. Nen puma put lavayiyat unahepyeʼ, pep tutskwat ep öqalayat, pu tunatyayat aw put mātapyani. 21 Noqw puma put tūviṅtotaqe aw paṅqaqwa: Tutuqaynaqa, itam ūmi navotiʼyuṅqw, um suan yuaatak̇aṅw hihta súantaqat sinmuy tutuqayna. Pu um qa hakiy pas hihtayʼk̇aṅw, pas qa atsat God tunatyayat tūtutuqayna. 22 Ya pay itam hihta aṅ sivit Caesar aw ōoyyaniqw, pam súanta, sen qa súanta? 23 Noqw pay pam pumuy unatwiyamuy māmatsqe, amumi paṅqawu: Ya uma hinoqw nuy unaheptota? 24 Kurs inumi votōnat mahtaknayaa. Ya iʼ hakiy pitsáṅwaat ep peyʼta? Pu hakiy tuṅwniat aṅ peyʼta? Noqw puma lavayhtotiqe, paṅqawu: Caesar pitsaṅwaata. 25 Noqw pam pumuy amumi paṅqawu: Turs uma hihta Caesar himuyat Caesar aw noayani. Pu God himuyat uma God aw noayani. 26 Noqw pay puma kurs hin sinmuy amutpip put lavayiyat ep hintsatsnani. Nihqe puma put lavayiyat ep k̇ātayuṅqe, pay qa hiṅqaqwa.

The Question about Rising from Death (Mt 22.23-33; Mr 12.18-27)

27 Pahsat pu hakim Sadducee-sinom, yaw soʼpum pay ahoy qa yesvaniqat paṅqaqwaqam put aw öki; nihqe put tūviṅtotaqe, 28 Aw paṅqaqwa: Tutuqaynaqa, Moses itamumi tutaptaqe yan pēna: Kurs tāqa nȫmayʼtaqa qa tímuyʼk̇aṅw mokq, put pāvaat, sen tupkoat put nȫmayatniṅwuqat amum qatupteʼ, put eṅem tíoymantani. 29 Noqw ura as hakim tsáṅeʼnihqam nānatupkom yēse. Noqw amuṅaqw suspavaam as nȫmatat, qa tímuyʼvat pay mōki. 30 Noqw aṅknihqa put nȫmayatniṅwuqat amum qatuptut, tuwat qa tímuyʼk̇aṅw mōki. 31 Noqw pu amuṅknihqa pay piw amunhti. Noqw puma as tsáṅeʼnihqam put nȫmatotaqw, qa hihtawat eṅem wuhti tiʼva. 32 Noqw nuhtuṅk puʼ wuhti tuwat mōki. 33 Noqw ya ōviy sinmuy ahoy yesvaqw, pam hihtawat pumuy tsáṅeʼnihqamuy nȫmaatni? Pi puma sohsoyam put nȫmatota? 34 Noqw Jesus lavayhtiqe amumi paṅqawu: Sinom yep qatsit ep nȫmalalwa, piw puwsuṅwlalwa. 35 Noqw pay ima hakim mokiwuy aṅqw ahoy yesveʼ, qatsit nātoniqat ep ö́kiniqey pay ep pávanyaqamuy qa nȫmalalwani, piw qa puwsuṅwlalwani. 36 Piw soon puma pāpu soʼni. Pi puma God hoṅviʼaymuyatuy pas amunyuṅwni. Puma ahoy yesveʼ, God tímatni. 37 Noqw kurs uma soʼqam ahoy yesvaniqat ep tūviṅtotaniqw-ya Moses himutskit lavayhtiqe hin pēnaqe hihta lavayhti? Ura God Abraham Tutuyqawhqaatnihqat paṅqawu, pu Isaac Tutuyqawhqaata, pu Jacob Tutuyqawhqaata, 38 Ispi pam qa soʼpumuy Tutuyqawhqaamu, pi yesqamuyu; pi putniqw sohsoyam yēse. 39 Pahsat pu tutavot tūtutuqaynayaqamuy amuṅaqw haqawa lavayhtiqe paṅqawu: Tutuyqawhqa, pas um súaṅqawu. 40 Pahpiy pāpu puma put hihta tūviṅtotaniqey aw qa unahintsatsk̇a.

The Question about the Messiah (Mt 22.41-46; Mr 12.35-37)

41 Pu pam pumuy amumi paṅqawu: Ya hintaqw ōviy uma Christ David tíatnihqat paṅqaqwa? 42 Noqw pi David Tātawit peyʼtaqat ep nāp paṅqawu: Tutuyqawhqa, Imoṅwiy aw paṅqawu: Um hāk iputvaqewat qatuqw 43 Nu uhtuwqamuy áṅwutaqw, puma ūmi maqaptsiʼyuṅwniqat pahsavoo. 44 Noqw ōviy hapi David put Moṅwílawu; noqw hin pam put tíata?

Jesus Warns alainst the Teachers of the Law (Mt 23.1-36; Mr 12.38-40)

45 Pahsat pu sinom sohsoyam tūqayyuṅqw, pam put aw nánatuwnayaqamuy amumi paṅqawu: 46 Uma tutavot tūtutuqaynayaqamuy amuhpe qa nāunayʼyuṅwni. Puma wupausit usnumyaniqey nānawakna, pu kitpik amumi hahlaykwa yuaatiwniqata; pu tsotsvalkiva mohk̇aqe tsotsókpit tuṅlayʼyuṅwa, pu nōviwhqat aṅ nukṅwat qeqnita. 47 Ima hapi koṅnanalvutuy kīyamuy tusoqkwahanniʼyuṅwa. Puma nawipʼew hink̇ahk̇aṅw, nānawakneʼ sutsépyuaativayaṅwu. Puma hapi pas pavan qaöwíhintsaniwyani.