Luke
The Widowʼs Offering (Mr 12.41-44)
21 Pu pam kwuhpukqe k̇ahksinmuy kuwahtipuy sivatataṅpit aqw taṅalalwaqamuy amumi yori. 2 Noqw pu piw pam hakiy ōokiwhqat koṅnalavut paṅsoq lȫqmuy palavotōnat pahpaṅqw tuwa. 3 Nihqe pam paṅqawu: Pas antsa nu umumi paṅqawni: Iʼ ōokiwhqa koṅnalavu imuy sohsokmuy amuhpenihqe hóyokiwtaqat paṅsoq pana. 4 Ima pi pay sohsoyam qarūrumnayak̇ahk̇aṅw, hihta akwsiṅqat aṅqw God eṅem kuwahtiput paṅsoq taṅatota. Noqw iʼ pi okiw hihta rūrumnak̇aṅw, pas hihta akw qátuhqey sohsok paṅsoq pana.
Jesus Speaks of the Destruction of the Temple (Mt 24.1-2; Mr 13.1-2)
5 Noqw haqawat God kīyat yuaatotaqe paṅqaqwa: Is uti! pam lomaoʼwat akw lomasniwa, pu hīhihta kuwahtiput akwʼa. Noqw Jesus pumuy amumi paṅqawu: 6 Ya uma īit yaṅ oʼwat aw tāyuṅwa? Pay nāt hisat aw pituqw, pep puʼ qa haqam owa nāp qeniy ep akwsiṅwni. Pam sohsoy sahpumhtini.
Troubles and Persecutions (Mt 24.3-14; Mr 13.3-13)
7 Noqw puma put tūviṅtotaqe aw paṅqaqwa: Tutuqaynaqa, noqw ya īi hisat yaniwhtini? Pu hisat paniwhtiniqw himu put tuawiʼtani? 8 Noqw pam paṅqawu: Uma tunatyaltoteʼ qa ūnatoyniwyani. Taq k̇aysiwhqam inatṅwaniy aṅ ök̇eʼ paṅqaqwani: Nuʼ Christ, kitotani; pu piw Aw hayiṅwti, kitotani. Noqw ōviy hapi uma qa amuṅkyani. 9 Sinom nāqöytivayani, piw qanamítuqayvahsiʼyuṅwni. Noqw pay uma put nanapteʼ qa tsawiniwyuṅwni. Pi īi yantaqa pas soon qa mohti yaniwhtini. Nīk̇aṅw hapi pay nāt qa pep soʼṅwamiq pítuni. 10 Pahsat pu pam pumuy amumi paṅqawu: Haqam hihtuwat sinom hihtuywatuy sinmuy amumum nehpewi hoṅvani. Pu moṅwtunatya sup moṅwtunatyat ehpewhtimantani. 11 Pu hāhaqeʼ tutskwa aʼnö tayayaykuni; pu tsö́ṅöstini; pu hīhimu wukotuyani; pu sinom hīhihta nuhtselʼeʼwakw aw yórikyani; noqw tokpelat aṅ hīhimu hihta tuawiʼtaqat mātaktotini. 12 Nīk̇aṅw hapi nāt īit qa yayhniwhq, sinom umumi mayʼyuṅweʼ, umuy okiwsahsantivayani, tsotsvalkiva momṅwituy amumi umuy mātaplalwani; pu sivikimi umuy taṅalalwani. Noqw uma kitsókimi moṅwʼiwyuṅqamuy amumi-nik̇aṅw pu tutskwat aw moṅwʼiwyuṅqamuy amumi tsamvaniwyani, uma isinomnihqe ōviyʼo. 13 Noqw uma umuhtuptsiwniy tunvotnayaniqat aw umuṅem qenitiwmantani. 14 Paniqw ōviy uma pep hin lavayhtotiniqey aṅwu pay wūwantotaniqey qeʼyaniqey umuhʼunaṅwpeq yukiʼyuṅwni. 15 Pay ason nu hapi umuy lavaymaqamantani, pu súanwuwnitoynamantani. Noqw sohsoyam umuhpewʼiwyuṅqam soon put ep umuy yumoṅwaltotani, piw áṅwuyʼyuṅwni. 16 Pu umunam, umuṅum, umuhpavam, umuhtupkom, pu umuṅaqwvim, pu umuhkwatsim umuy nuhtumi mātaplalwaqw, puma umuy haqawatuy qöqyani. 17 Pu sinom sohsoyam umumi qa suhtaqʼewyani, uma isinomnihqat ōviyʼo. 18 Nīk̇aṅw hapi pay pas soon umuhqötöva umuhhömi himuwa súlawhtini. 19 Uma qa naṅʼeknayeʼ, qatsit himuyʼvayani.
Jesus Speaks of the Destruction of Jerusalem (Mt 24.15-21; Mr 13.14-19)
20 Pu ason Jerusalem solāwamuy akw nö́yakiwtaqw, uma aw yórikyeʼ, pahsat uma put kīqötiwhqat aw hayiṅtiqw uma nanaptani. 21 Pep puʼ ima Judeat ep yesqam tuhtukwimiq watqani, pu kīveyaqam paṅqw ahpiyyani, pu haqeʼ tutskwava hinnumyaqam qa paṅso ahoy yuṅni. 22 Pi ep hapi God sinmuy amumi nāoyni. Noqw tutuvenit aṅ hin peyʼtaqat sohsok aṅ aw antsaniwni. 23 Nīk̇aṅw hisat aw pituqw aṅ nöʼyiwyuṅqamuy, pu aṅ yōyoṅnayaqamuy kurs hin watqaniqamuy amuṅem pas is óhini! Taq sinom pavan pas k̇ānanaptani. Pi God itsívuat pumuy amumi hūrs töṅaniwtani. 24 Noqw puma sipwuvahpit qalayat akw súlawhtini. Noqw tuwqaam pumuy tūwiktoteʼ, hāhaqeʼ tutskwat aw pumuy tsamyani. Noqw qa-Jew-sinom Jerusalem atsva wukukuykuyani, pumuy paptsiy aṅ kūkuyvaniqat aqw pahsavoo.
The Coming of the Son of Man (Mt 24.29-31; Mr 13.24-27)
25 Pu tāwat, mūyawuy, pu sōtuy aṅ himu hihta tuawiʼyuṅwni. Noqw hīhihtu sinom sóonhtoteʼ, kurs hin wūwantotani, pātuwaqatsi aʼnö hoṅvantak̇aṅw sȫykitaqw ōviyʼo. 26 Noqw sinom hihta tūwaqatsit aw pítuniqat aw-sa tāyuṅweʼ, tsawiniwk̇ahk̇aṅw, unaṅwsoʼni, pi ōvaqe öqala tayayaykuniqw ōviyʼo. 27 Pep pu nuʼ Sinot Tiat öqalat pasiwk̇aṅw, qaanʼewkw tālawṅwayʼk̇aṅw ōmawuy akw hawtoqw, sinom inumi tātayyani. 28 Noqw ason īi yantaqa hiniwmaqw, uma kwuhpukyeʼ, ōmiq tāyuṅwni; ispi uma soon pas hisat ayo nö́ṅakiwtaniqee.
The Lesson of the Fig Tree (Mt 24.32-35; Mr 13.28-31)
29 Pu pam pumuy amumi himu hihta antaqat lavayit akw yuaaykuqe paṅqawu: Uma nönvospaltsokit aw wūwayani, pu hīhihta himutsotskita. 30 Puma sipölöyʼvayaqw, uma aw tātayyeʼ, pay talʼaṅwhayiṅwiwtaqat nanaptaṅwu. 31 Noqw pay pan hapi ōviy uma ason īit yantaqat hiniwmaqw aw tātayyeʼ, pay God moṅwtunatyaat aw pitsíwtaqat nanaptani. 32 Pas antsa nu umumi paṅqawni: Yep sinom pas soon tūtuwayaqw, pay sohsoy it yaniwhtini. 33 Pay as tokpela, pu tūwaqatsit tūwayani. Noqw ilavayi hapi pas soon tūwayani.
The Need to Watch
34 Nīk̇aṅw uma nānami tunatyaltotini. Taq k̇a uma hihta nasaniʼyuṅweʼ, pu honaqkuyit akw hōnaqʼiwyuṅweʼ, yep qatsit ep hihta tunatyat-sa aw tunatyawyuṅweʼ qa unaṅwtalawvayani. Nen uma qa navotiʼk̇ahk̇aṅw, put talöṅnit aw suyʼkini. 35 Pi sopk̇awtaqam sinom tūwaqalvoqhaqami yesqam put aw ök̇eʼ, soñawnen wivosit aqw kwisyani. 36 Paniqw ōviy uma tunatyawk̇ahk̇aṅw, yūmosa nāwakinwisni. Nen uma īit yaniwhtiniqat aṅqw ayo nö́ṅakniqey aw öqawiʼk̇ahk̇aṅw, nuy Sinot Tiyat inutpip hoṅni. 37 Noqw Jesus nāqavo God kīyat ep sinmuy tutuqayna; nit mihikq paṅqw yámak̇eʼ tsomot, Olivet yan mātsiwhqat aqwnen, epeq talöṅnaṅwu. 38 Noqw qavoṅvaqw sinom sohsoyam suits God kīyat ep put aw öki, aw tūqayyuṅwniqe ōviyʼo.