John
Jesus the Way to the Father
14 Uma qa hin unaṅwayʼyuṅwni, uma God aw tuptsiwniʼyuṅwa; uma piw inumi tuptsiwniʼyuṅwni. 2 Inay kīyat ep yeyespi qaöwíewa, pi as qa pantaqw soon nu umuy qa āawnani. Nu umuṅem qenitato. 3 Noqw nu ahpiynen umuṅem qeniteʼ, nu piw aṅqwni; nen umuy nāmi ökínani; noqw nuy háqamniqw uma piw pepyani. 4 Pu nuy haqaminiqw uma navotiʼyuṅwa; pu uma aqw pöhut tuwiʼyuṅwa. 5 Thomas put aw paṅqawu: Tutuyqawhqa, um haqaminiqw itam qa navotiʼyuṅwa; noqw ya itam hin aqw pöhut tuwiʼyuṅwni. 6 Noqw Jesus put aw paṅqawu: Nu hapi God aqw pöhu, pu navoti pas antsanihqa, pu qatsi. Soon hak Inay awni, pas inuhpanen-saa. 7 Pi as uma nuy tuwiʼyuṅweʼ soon uma Inay piw qa tuwiʼyunwni; noqw yahpiy haqahpiy uma put tuwiʼyuṅwa; nihqe uma aw yórikya. 8 Noqw Philip put aw paṅqawu: Tutuyqawhqa, um Unay itamumi mahtaknaqw itam paṅso uyiwaltotini. 9 Noqw Jesus put aw paṅqawu: Pas as nu wūyavo umumum yantaqw, ya um nāto nuy qa tuwiʼta, Philip? Inumi yórikqa hapi Inay aw yori; noqw piw um nuy umumi Inay mahtaknaniqat inumi paṅqawu. 10 Ya nu Inay amum sūk̇anihqat um qa tuptsiwa? Soñawnen pi nu put epniqw pu pam inuhpee. Nu umumi hihta lavayhteʼ, qa nāp nahpiy lavayhtiṅwu; pi Ina inuhpe qátuhqa tumalat hintsaki. 11 Nu Inay epniqw pu Ina inuhpenihqat uma tūtuptsiwani; hal kurs uma qa pantotinik, ṅasʼew uma itumalay ahpiy inumi tūtuptsiwani. 12 Pas antsaa, pas antsa nu umumi paṅqawni: Inumi tuptsiwhqa nuy hīhihta hintsakqat piw hintsakni, pu īit epnihqe pas pávanyaqat pam hintsakni, nu Inay awniniqw ōviyʼo. 13 Pu uma ituṅwniy aw yank̇ahk̇aṅw nāphihta ōviy tūviṅtotaqw, nu put panhtimantani; noqw Ina Tiy ahpiy pas pavan hímuniwhtini. 14 Uma ituṅwniy aw yank̇ahk̇aṅw nāphihta ōviy tūviṅtotaqw nu put panhtimantani.
The Promise of the Holy Spirit
15 Kurs uma inumi unaṅwayʼyuṅweʼ, itutavoy aṅ hinwisni. 16 Pu nu Inay aw nāwaknani, noqw piw pam sukw umumi unaṅwtaviʼtaqat umumi távini, it Qahováriwtaqat Hikwsita. Noqw pam umumum sutsep yanteʼ, 17 Umuy hihta pas antsanihqat tutuqaynani. Put hapi ima yep qatsit tunatyayat aṅ hinwisqam kurs hin kwusuyani, puma put qa tuwayʼyuṅqe ōviyʼo, piw qa tuwiʼyuṅwa. Noqw uma pi put tuwiʼyuṅwa, pam umumum yantaqw ōviyʼo, nihqe nāt pam umuhʼunaṅwpeq qátuni. 18 Pay nu soon umuy nalʼoyni; pay nu nāt piw aṅqw umumini. 19 Nāt hihsavoniqw pay yep qatsit tunatyayat aṅ hinwisqam inumi qa yórikyani, nīk̇aṅw uma inumi yórikyani. Pi nuy qatuqw ōviy piw uma yesni. 20 Noqw pep puʼ uma nuy Inay epnihqat nanaptani; pu pan piw uma inuhpeyani, pu nu umuhpeni. 21 Itutavoy oyiʼk̇aṅw aṅ hinmaqa hapi inumi unaṅwayʼtani; pu inumi unaṅwayʼtaqat aw Ina unaṅwayʼtani; noqw nu put aw unaṅwayʼtani, nen aw namtaknani. 22 Noqw suhk̇a Jesus aw nánatuwnaqa Judas yan mātsiwa. Qa pam momṅwituy amumi Jesus mātavi. Noqw pam Jesus aw paṅqawu: Tutuyqawhqa, ya hintaqw ōviy um itamumi namtaknat, yep qatsit tunatyayat aṅ hinwisqamuy amumi qa namtaknani? 23 Noqw Jesus lavayhtiqe put aw paṅqawu: Pay inumi unaṅwayʼtaqa soon ilavayiy qa aṅ hinmani; noqw Ina put aw unaṅwayʼtani; noqw itam put awnen unaṅwayat ep qátuni. 24 Inumi qa unaṅwayʼtaqa hapi soon ilavayiy aṅ hinmani. Noqw nu umumi lavayit yuaataqw pam qa inuhpiyʼo, pam nuy aṅqw távihqat Inay ahpiyʼo. 25 Noqw nu nāt umumumnik̇aṅw īit umumi yuaayku. 26 Noqw nu pan Inay aw nāwaknaqw, pam umumi unaṅwtaviʼtaqat Qahováriwtaqat Hikwsit umumi távini. Noqw pam umuy sohsok hihta tutuqaynani; nen nuy hihta umumi lavayhtiqat umuy sohsok ahoy uʼnanani. 27 Uma suyan unaṅwayʼyuṅwni, nuy suyan unaṅwayʼtaqat panʼi. Yep qatsit tunatyayat hinwisqam hakiy suyan unaṅwayʼtaqat paysoq lavaytaṅwu; noqw nu qa panwat umumi yuaata. Uma qa hin unaṅwayʼyuṅwni, piw umuhʼunaṅwa qa tsawiniwyuṅwni. 28 Uma nanaptaqw ura nu umumi paṅqawu: Nu ahpiynit piw aṅqw umumini. Pi uma inumi unaṅwayʼyuṅweʼ soon inumum qa hahlayhtotini, nu Inay awniqey paṅqawhqat epʼe, pi Ina inuhpenihqe pas pávani. 29 Noqw nāt hapi aw qa pituqw, pay nu aṅwu umuy āawna, hisat aw pituqw uma tūtuptsiwaniqat ōviyʼo. 30 Yahpiy hapi nu pāpu soon pas umumi yuaatani, taq Nukpana, yep qatsit ep moṅwʼiwtaqa aṅqʼö, noqw pam qahaqam hihta ep inumi tuyqawiʼta. 31 Noqw Ina inumi hin tutaptaqw nu pan hinma. Noqw put pantaqat akw yep qatsit tunatyayat aṅ hinwisqam nu Inay aw unaṅwayʼtaqat nanaptani. Huvam hoṅvaa; itam yaṅqw ahpiyyani.