John
Jesus the Real Vine
15 Nu hapi ovauyit pas antsanihqat anta, Noqw Ina hapi ūyiʼtaqa. 2 Inuhpiy hohtakiwtaqa qa hímuyʼvaṅwuqat pam ayo túkuṅwu; pu pölöyʼvaṅwuqat pam papsiṅwu, noqw pahsat pu pam wūhaq aniwnaṅwu. 3 Noqw uma hapi it lavayit nu umumi lavayhtiqat akw kwaṅwʼeʼwayʼiwyuṅwa. 4 Uma inumi wiwyuṅwni, noqw nu umumi wiwtani; soon ovauyit ahpiy hohtakiwtaqa nāp natsviy hihta himuyʼvaṅwu, pas pam kopölvuy aw wiwteʼsa hihta aniwnaṅwu; noqw pan hapi uma inumi qa wiwyuṅweʼ, soon hihta aniwnayani. 5 Nu hapi ovauyi; noqw uma hapi ahpiy hohtakiwyuṅqamu. Nu hakiy aw wiwtaqw pam inumi wiwteʼ aʼnö himuyʼvamantani; pi uma qa inutsviyeʼ, soon hihta apitotini. 6 Inumi qa wiwtaqa lakput hohtakiwtaqat an ayo tūviwṅwu; noqw sinom put tsovalayeʼ, qȫhit aqw maspayeʼ, put taqtsokyaṅwu. 7 Kurs uma inumi wiwyuṅweʼ, piw ilavayiy umuhʼunaṅwpeq paniʼyuṅweʼ, pep puʼ uma hihta nānawakneʼ, put ōviy tūviṅtotamantani; noqw pam umumi antsaniwmantani. 8 Uma aʼnö aniwnayeʼ, yan Inay pas pavan mātaktotani; pu piw yan uma pas antsa inumi nánatuwnayaqamyani. 9 Nu hapi pas Inay inumi hin unaṅwayʼtaqat pan nu umumi unaṅwayʼta; uma suan hinwisq nu umumi unaṅwayʼtani. 10 Uma itutavoy aṅ hinwisq pan nu umumi unaṅwayʼtani, pas nu Inay tutavoyat aṅ hinmaqw pam inumi unaṅwayʼtaqat panʼi. 11 Noqw uma pas hinhaqam hahlayhtotiniqat ōviy nu umumi yan lavayhti; nu pas hinhaqam hahlayhtiqat panʼi. 12 Noqw nu yan umumi tutaptani: Uma nānami unaṅwayʼyuṅwni, pas nuy hin umumi unaṅwayʼtaqat panʼi. 13 Kurs hak tāqa kwatsmuy amuṅem qatsiy taveʼ suyan pi pam pumuy amumi pas pavan unaṅwayʼtaqe ōviy panhtini. Noqw qa hak put tāqat epnihqe pas pavan nuhtumi unaṅwayʼta. 14 Uma nuy umumi hin tutaptaqat aṅ hinwiseʼ ikwátsimyani. 15 Yahpiy hapi nu pāpu umuy qa tūwiktuṅwantani, taq tūwiki moṅwiy hihta hintsakq put qa navotiʼtaṅwu. Nīk̇aṅw nu umuy ikwátsimyaqat pan túṅwanta; pi nu Inay aṅqw hihta navotqey umuy sohsok āawna. 16 Qa uma hapi nuy namorstota, pi nu hapi umuy namorstaqe umuy sinmuy tsovalayaniqat ōviy ayata; noqw tsovalniwyaqam qa hovalniwyani; noqw uma ituṅwniy aw yank̇ahk̇aṅw Inay aw hihta tūviṅtotaqw pam umuy put máqamantani. 17 Nu umumi yan tutaptani: Uma nānami unaṅwayʼyuṅwni.
The Worldʼs Hatred
18 Kurs yep qatsit tunatyayat aṅ hinwisqam umumi qa suhtaqʼewyaqw pay ura puma inumi mohti qa suhtaqʼewyaqat uma uʼniʼyuṅwni. 19 Pi as uma yep qatsit tunatyayat aṅ hinwisq, pay put aṅ hinwisqam soon umuy qa hahlayyani; noqw uma pi yep qatsit tunatyayat qa aṅ hinwisq nu umuy put aṅqw namorsta; noqw ōviy yep qatsit tunatyayat aṅ hinwisqam umumi qa suhtaqʼewya. 20 Ura nu umumi lavayhtiqw uma put uʼniʼyuṅwni; pay tūwiki moṅwiy epnihqe qa pavan pasniṅwu; noqw kurs sinom nuy okiwsasneʼ soon umuy piw qa okiwsasnani; kurs ilavayiy aṅ hinwiseʼ pay soon piw umuhlavayiy qa aṅ hinwisni. 21 Nīk̇aṅw pay uma isinomniqw ōviy puma umuy yan hintsatsnani, nuy aṅqw távihqat qa tuwiʼyuṅqe ōviyʼo. 22 Pay nu pítuhqe pumuy amumi yuaaykuqw puma inumi qa tuptsiwyaqe qaanhtoti. Kurs puma ilavayiy qa nanapteʼ pay soon pas qaanhtotini. Nihqe puʼ hapi puma kurs hihta akw qaanhtipuy tupk̇ayani. 23 Inumi qa suhtaqʼewnihqa hapi piw Inay aw qa suhtaqʼewa. 24 Nu pumuy amutpik nihtiwhtaqat k̇ātutmalat hinhti. Qa hak inuhpenihqe hihta k̇ātumalta. Kurs puma itutmalay aw qa yórikyeʼ pay soon pas qaanhtotini; noqw pi as puma put aw yórikyak̇ahk̇aṅw inumi qa suhtaqʼewya, pu Inay piw awʼi. 25 Ura pumuy tutuveniyamuy aṅ yan peyʼta: Nuy qa hinhtiqw puma inumi qa suhtaqʼewya, yanʼi. Noqw puma hin peyʼtaqat anhtoti. 26 Nīk̇aṅw ason nu umumi unaṅwtaviʼtaqat Qahováriwtaqat Hikwsit Inay aṅqw ayataqw, pam hihta pas antsanihqat umuy tutuqaynat, nuy hákiynihqat sinmuy āawnani. 27 Pu uma piw pas nāp hihta aw yórikyaqey tuawiʼyuṅwni, uma yayhniwhqat aṅqaqw inumum hinnumyaqe ōviyʼo.