Acts

Ananias and Sapphira

5 Noqw hak tāqa Ananias yan mātsiwhqa nȫmay Sapphirat amum tutskway huya; 2 Nit soq hihk̇ayat hihsaʼ nēṅemta; noqw nȫmaat amum put navotiʼta; nihqe pay qa sohsok kívahqe, ayaiwyuṅqamuy amutpipo put oya. 3 Noqw Peter paṅqawu: Ananias, ya um hinoqw Qahováriwtaqat Hikwsit aw atsátaniqat, pu tutskwat hihk̇ayat hihsaʼ nēṅemtaniqat Satan uṅ pan unaṅwtoyna? 4 Puyaw pam nāt qa huyiwhqe, qa uhhimu; pu pam huyiwhqe ya qa um hihk̇ayat aw moṅwi? Ya um hinoqw yanhaqam uhʼunaṅwpeq tunaltyalti? Um qa sinmuy amumi atsáta; pi um God aw atsáta. 5 Noqw Ananias yan lavayit navotqe, aṅqeʼ minukt mōki; noqw sohsoyam it nanaptaqam pas maqastoti. 6 Noqw hakim tōtim hoṅvaqe put mok̇ahtotat, ihpo hóroknayaqe haqam tavimaya. 7 Pu ahpiy k̇a tāwa aṅhqe pāyis qöniltiqw, pahsaʼhaqam nȫmaat hiniwhtiqat qa navotiʼk̇aṅw ep paki. 8 Noqw Peter lavayhtiqe put aw paṅqawu: Kurs nuy āawnaa, ya pay uma pas yahsaʼ ōviy tutskwat huya? Noqw pam paṅqawu: Owi, pay pahsaʼ ōviyʼo. 9 Pahsat pu Peter put aw paṅqawu: Ya hintaqw ōviy uma Tutuyqawhqat Hikwsiyat aw hepniqey sun unaṅwti? Meh, uhpuwsuṅway tavimayaqam hötsiwmi ökiwiwta; nihqe puma uṅ yaṅqw haqami taviwisni. 10 Noqw pahsat pay pam put kukmiq munukt mōki; noqw tōtim ö́kihqe put mokput tutwa; nihqe paṅqw put hóroknayaqe, puwsuṅwayat ehpeq taviya. 11 Noqw sohsoyam Jesus aw tōnawtaqam put ep pas tsātsawna, puʼ hakim hihsaʼnihqam it nanaptaqam pīwu.

Miracles and Wonders

12 Noqw ayaiwyuṅqamuy māyamuy ahpiy k̇ātatayhpi hihta tuawiʼyuṅqa sinmuy amuhpaʼ tumalayʼtiwa. (Noqw puma sun unaṅway haqam Solomon tuhöoyat ep tsovawta. 13 Pu ahpiy mimuy amuṅaqw soon hak pumuy amumi tōnaltiniqey kurs suhtaqʼewni; noqw sinom pumuy pas hihtayʼyuṅwa. 14 Noqw tūtuptsiwaqam Tutuyqawhqat aw wūhaqʼiwma, k̇aysiwhqam tahtaqtu, pu momoyamu.) 15 Noqw ōviy sinom tūtuyyaqamuy kisk̇ami tsamvantaqe, ahpat, pu puvuwhpit aṅ ōoyya, hísatniqw Peter paṅqeʼniqw ṅasʼew kihsiwniat hihtawat ep kistamantaniqat ōviyʼo. 16 Pu Jerusalem ahpiy hāhaqeʼ kitsókit aṅqw qaanʼewakw hintaqam sinom tūtuyyaqamuy tsamk̇ahk̇aṅw ökiwta, pu hakimuy tuyoyʼeʼwakw hīhikwsimuy akw qa kwaṅwáhinyuṅqamuyu; noqw puma sohsoyam qalaptuya.

The Apostles Persecuted

17 Pahsat pu God awwat mohpeq moṅwi wunuptu, pu put an tunatyawyuṅqamu, ima Sadducee-sinom tōnawtaqamu, nihqe puma itsívutotiqe, 18 Ayaiwyuṅqamuy amumi mayʼyuṅqe, pumuy sumisivikit aw taṅatota. 19 Noqw pay Tutuyqawhqat hoṅviayaat mihikq sivikit uutspiyat hötahtat, pumuy paṅqw ipwaqe, amumi paṅqawu: 20 Yupavé, uma God kīyat ep hoṅk̇ahk̇aṅw, it qatsit hin hintaqat nuhtumi sohsok yuaatotani. 21 Noqw puma yan nanaptaqe, suits talavay God kīyat aw yuṅqe, pep sinmuy tutuqaynaya. Noqw God awwat mohpeq moṅwi pitu, pu put ámumyaqamu, nihqe wuwanʼaymuy tsovala, pu sohsokmuy Israel-sinmuy amuṅaqw wukwʼaʼyamuyu; nihqe sivikimi pumuy tsamwisniqat hakimuy ayatota. 22 Noqw ayaiwyaqam ep ö́kihqe, pumuy sivikive qa tutwat puma áhoyyaqe tūawvaya; 23 Nihqe paṅqaqwa: Pay as pas sivikimi hūrs uhtsiwta; noqw tūtuwalaqam ihk̇aqe hötsíwhpa hōñi. Noqw itam aw hötayaqe, ahpave qa hakiy tutwa. 24 Noqw God awwat susmohpeq moṅwi, pu God kīyat ep tuwalanmoṅwi, pu God awwat mohpeq momṅwit it nanaptaqe, hin iʼ haqami hiniwhtiniqat wūwantota. 25 Noqw pahsat hak pítuhqe pumuy āawnaqe paṅqawu: Meh, ura uma imuy tahtaqtuy sivikimi taṅatotaqw, puma God kīyat ep hoṅk̇ahk̇aṅw sinmuy tutuqaynaya. 26 Pahsat pu tuwalanmoṅwi, hoṅviaʼyatuy tsamk̇aṅw amuminihqe pumuy paṅqw pās tsāma, sinmuy mamqasqe ōviyʼo, taq k̇a puma pumuy tatatupyaniqʼö. 27 Pu ōviy puma pumuy moṅwtsovawtaqamuy amutpipo tsamvaya. Noqw God awwat susmohpeq moṅwi pumuy amumi paṅqawu: 28 Ura itam umuy pās mēwayaqe, uma Jesus natṅwaniyat qa aṅ tūtutuqaynayaniqat umumi paṅqaqwa, nōqa? Noqw meh, tuwat soq uma Jerusalem ep umuhtutuqayhpiy aṅqeʼ kúruknayaqe, it tāqat qatsíyat itamuy tukopnayaniqey anyuṅwa. 29 Pahsat pu Peter mímuywatuy ayaiwyuṅqamuy amumum lavayhtiqe paṅqawu: Pay kurs pi hin itam God qa awwat tuqayvastotamantani, qa sinot awʼi. 30 Itanamuy aw yantaqaam God as Jesus wunuptsinaqw, uma put himutskit ep hahyaqe nīnaya. 31 Noqw God put putvaqe momi tavi, pam motisinoniqat, pu ayo Tūooyniqat ōviyʼo, Israel-sinmuy nāp tunatyay aṅqw lasneʼ, pumuy qaanhtipuyat ayo yúkuniqe ōviyʼo. 32 Noqw itam hapi īit navotiʼyuṅqe, put tuawiʼyuṅwa, pu iʼ Qahováriwtaqat Hikwsit pīwu, put hapi God put tunatyayat aṅ hinwisqamuy amumi nóaṅwu. 33 Noqw puma put nanaptaqw, pavan unaṅwaam tuyvaqw, puma pumuy qöqyaniqey nānami yuaatota. 34 Pahsat pu hak Pharisee-sino Gamaliel yan mātsiwhqa, tutavot tūtutuqaynaqa pumuy tsovawtaqamuy amuṅaqw wunuptu; pam hak sohsokmuy amuhpiy k̇aptsiwta; nihqe ima ayaiwyuṅqam pay hāk hihsavo nö́ṅakniqat paṅqawu. 35 Pahsat pu pam tsovawtaqamuy amumi paṅqawu: Uma Israel-sinom tahtaqtu, uma imuy hintsatsnaniqey wūwantotaqey ep tunatyaltotini. 36 Taq pay nāt ura qa pew pituqw, hak Theudas mātaktiqe pas himunihqey pan nāyuaata. Noqw ura put hakiy aw tahtaqt sunát-sikip sunat pahsaʼhaqam natsk̇aya. Noqw ura pam nīniwhq, sohsoyam put aw tuqayvastotaqam tatslakqe, qa háqamtoti. 37 Pu it tāqat aṅk ura hak Galileet aṅqw Judas nāmataqta, nāventiwhqat epʼe, nihqe k̇aysiwhqamuy naṅk wīsila; pamwa piw mokq, sohsoyam put aw tuqayvastotaqam ahtsavala. 38 Noqw ōviy nu umumi paṅqawni: Uma imuy sinmuy amumi qa hintsatsk̇ani, uma qa amumi mayʼyuṅwni; pay iʼ yan tunatya, pu tumala kurs pay sinmuy amuhpiynen pay soon aniwhtini; 39 Taq k̇a pam pantaqa God ahpiy hintaniqw soon uma put símoknayani, taq nāphisat k̇a uma God aw rohomnumyani, kita. 40 Noqw puma put lavayiyat kwusuya; nihqe ayaiwyuṅqamuy wáṅwayyaqe, aʼnö wuvahtotat, pāpu puma Jesus natṅwaniyat aṅ qa yuaatotaniqat amumi paṅqaqwat mātapya. 41 Noqw puma hahlayk̇ahk̇aṅw moṅwtsovawtaqamuy amuṅaqw ahpiyya, kurs puma nuhtum put natṅwaniyat ep hamanhintsaniwyaniqey hihk̇ayʼvayaqe ōviyʼo. 42 Noqw puma nāqavo God kīyat ep-nik̇aṅw pu sohsovik kīnawit Jesus pas Christ-nihqat tūtutuqaynayaqey, pu yuaatotaqey qa qeʼiwwisa.