Acts
The Seven Helpers
6 Noqw ephaqam tuptsiwniʼyunqam wūhaqʼiwmaqw, Greek-sinmuy amuhkwa yuaatotaqam Hebrew-sinmuy amumiq qayan unaṅway hiṅqaqwa, puma nāqavo hihta akw tūvaaṅwank̇ahk̇aṅw pumuy amuṅaqw koṅnanalvutuy tatamiʼyuṅqw ōviyʼo. 2 Pahsat pu pakwt lȫq sihk̇ayʼtaqam ayaiwyuṅqam sohsokmuy tuptsiwniʼyuṅqamuy tsovalayaqe, amumi paṅqaqwa: Soon tis pi itam God lavayiyat mātaviʼk̇ahk̇aṅw tūnopniʼyuṅqw pam súantani. 3 Oviy uma umuṅaqw hakimuy tsaṅeʼ tahtaqtuy amumi lomanavotit namorstotani, hakim Qahováriwtaqat Hikwsit akw tuyqawiwyuṅqamuyu, pu suan wuwniʼyuṅqamuyu. Noqw puma it yantaqat aw tunatyawyuṅwniqat itam ep pumuy oʼyani. 4 Nīk̇aṅw itamwat nāwakinpit, pu lavayit tumalayʼyuṅwniqey aw-sa yukiʼyuṅwni. 5 Noqw iʼ yan lavayi sohsokmuy sinmuy amumi lomatöqti. Noqw ōviy puma hakiy Stephen qapēvewnit, pu Qahováriwtaqat Hikwsit akw tuyqawiwtaqat namorstota, pu Philip, pu Prochorus, pu Nicanor, pu Timon, pu Parmenias, pu Nicolas, pam hak Antioch aṅqwnihqe qa-Jew-sínonik̇aṅw Jew-sinmuy amún tuptsiwniʼta. 6 Nihqe puma ayaiwyuṅqamuy amutpipo pumuy oʼya. Noqw puma amumi matyawk̇ahk̇aṅw, amuṅem nānawakna. 7 Noqw God lavayiat suyhtsepṅwat öqawiʼma, noqw wūhaqti; noqw God awwat momṅwituy amuṅaqw k̇aysiwhqam it tuptsiwnit kwusuyaqe aṅ hinwisa.
The Arrest of Stephen
8 Noqw Stephen qapēvewnit, pu öqalat akw qaöwíhink̇aṅw sinmuy amuhpaʼ hīhihta k̇ātatayhpit hintsaki, pu hihta supsiwyuṅqata. 9 Noqw tsotsvalki Mātaviwyaqamuy Tsotsvalkiamu yan túṅwantiwhqat aṅqw hakim hoṅvaqe Stephen amum nāṅwuyʼyuṅwa, pu Cyreniat aṅqw sínomu, pu Alexandriat aṅqʼö, pu Ciliciat-nik̇aṅw Asiat aṅqʼö. 10 Noqw Stephen Hikwsit ahpiy suan lavayhtiṅwuniqw, puma kurs hin put áṅwutotani. 11 Pahsat pu puma hakimuy tahtaqtuy pan unaṅwtoynayaqw, puma paṅqaqwa: Itam aw tūqayyuṅqw Moses aqw qalomáhiṅqawu, pu God aqwʼa. 12 Kitotaqe sinmuy hin unaṅwtoynaya, pu wukwʼaʼyatuyu, pu tutavot tutuqaynayaqamuyu. Noqw puma Stephen aw ö́kihqe, ṅuayaqe, moṅwtsovawtaqamuy amumi wikvaya. 13 Nihqe hakim put ehpewi hihta atsátotaniqamuy momi oʼyaqw puma paṅqaqwa: Pas iʼ tāqa panis tuwat it pas k̇aptsiwtaqat kīhut, pu hin hinwisniqat tutavot aqw qalomáhiṅqawlawu; 14 Oviy pi itam aw tūqayyuṅqw, paṅqawu: Yaw iʼ Jesus Nazareth aṅqw tāqa it kīhut sahpuknani, pu yaw Moses itamumi itahhintsakpiy tutaptaqat aw alöṅtani. 15 Noqw moṅwtsovawtaqam sohsoyam Stephen aw tāyuṅqw, pas pitsáṅwaat hakiy God hoṅviayayat taywayat anta.