Acts
The Conversion of Saul (Acts 22.6-16; 26.12-18)
9 Noqw Saul nāt pas itsívuhihkwisk̇aṅw, Tutuyqawhqat aw tuptsiwniʼyuṅqamuy pavan pas hintsanniqey, pu pas qö́yaniqey tunatyawk̇aṅw, God awwat susmohpeq moṅwit awʼi; 2 Nihqe Damascus ep aṅqeʼ tsotsvalkit aṅ sinmuy amumi put eṅem pēnayaniqat nāwakna; noqw kurs pam hakimuy tahtaqtuy, sen momoymuy Jesus aw tuptsiwniʼyuṅqamuy tuweʼ, pumuy somhtat, Jerusalem aqw tsamni. 3 Noqw ōviy pam paṅsoqnihqe, Damascus aw hayiṅwnaqw, ōṅaqw tāla put ánanʼik suhtalawva; 4 Noqw pam tutskwami posqe, hakiy tönayat navotq, put aw paṅqawu: Saul, Saul, ya um hinoqw nuy okiwsahsana? 5 Noqw pam paṅqawu: Ya um hakʼi, Tutuyqawhqa? Noqw Tutuyqawhqa paṅqawu: Nu Jesus, um nuy hapi okiwsahsana. Um sökwíkinpit aqw horarataqw, pam uṅem anahaa. 6 Noqw pam tsawnaqe, tururutik̇aṅw, pas hin unaṅwayʼk̇aṅw paṅqawu: Tutuyqawhqa, noqw nu hinhtiniqat um nāwakna? Noqw Tutuyqawhqa put aw paṅqawu: Um wunuptut, kīmini; noqw ason um hinhtiniqat uṅ pep āawnayani. 7 Noqw tahtaqt put ámumyaqam qa hiṅqawk̇ahk̇aṅw aṅqeʼ hōñi; hakiy as tönayat nanvotyak̇ahk̇aṅw hakiy qa tuwayʼyuṅwa. 8 Pahsat pu Saul tutskwaṅaqw wunuptuqe, as pōsiy púruknat, qa hihta tuwa; noqw puma put māyat ṅuyʼwisqe, Damascus ep wikvaya. 9 Noqw pam pāyis tālat aṅ kurs hin hihta túwani, piw qa nȫsa, qa hīko. 10 Noqw hak tuptsiwniʼtaqa Ananias yan mātsiwhqa Damascus ep qatu. Noqw pam tuawyorikq, Tutuyqawhqa put aw paṅqawu: Ananias, Noqw pam paṅqawu: Yep nūu, Tutuyqawhqa. 11 Noqw Tutuyqawhqa put aw paṅqawu: Um wunuptut, Sūwipo kisk̇at yan mātsiwhqat awni; nen Judas kīyat ep hakiy Tarsus aṅqwnihqat Saul yan mātsiwhqat ōviy tūvintani; taq meh, pam okiwlawu, 12 Nihqe tuawyorikq hak tāqa Ananias yan mātsiwhqa ep pákihqe, put aw may akw toṅo pōsiy tālawnaniqat ōviyʼo. 13 Pahsat pu Ananias lavayhtiqe paṅqawu: Tutuyqawhqa, pas yaw iʼ tāqa Jerusalem epeq uhsinmuy okiwsahsanqat nu k̇aysiwhqamuy amuṅaqw navota. 14 Noqw yaw pam yep uhnatṅwaniy aw tatqaʼnaṅwyaqamuy sohsokmuy somhtaniqey God awwat mohpeq momṅwituy öqalat pasiwk̇aṅw pitu. 15 Noqw pay Tutuyqawhqa put aw paṅqawu: Um awni, taq pam pas inamorsʼawiwa; pam qa-Jew-sinmuy, pu pas momṅwituy-nik̇aṅw, pu Israel-sinmuy amumi inatṅwaniy tūawmani. 16 Pu nāt pam inatṅwaniy ep hīhihta aṅ qaanʼewakw okiwsaniwniqat nu put āawnani, kita. 17 Noqw ōviy Ananias awnihqe, kīmi pákihqe, put aw may akw toṅot, paṅqawu: Itupko Saul, Tutuyqawhqa Jesus uṅ aṅqaqwniqw ūmi mātaktiqa nuy aṅqw hōna, umuhposiy tālawnaniqat ōviyʼo, pu Qahováriwtaqat Hikwsit akw tuyqawiwtaniqat ōviyʼo. 18 Noqw pahsat pay himu nasiṅwput antaqa put pōsiyat aṅqw löhökq, pam pōsiy tālawnaqe wunuptu; nihqe kūyit akw tuvoylatit, nösqe, öqawhta.
Saul Preaches in Damascus
19 Pahsat pu Saul Damascus ep tuptsiwniʼyuṅqamuy amumum hihsavo qatu, 20 Nihqe āpiy tsotsvalkiva iʼ Jesus God Tíatnihqat yuaatinuma. 21 Noqw sohsoyam put aw tūqayyuṅqam hin kurs wūwantotaqe paṅqaqwa: Ya qa iʼ Jerusalem epeq it natṅwanit aw tatqaʼnaṅwyaqamuy hovalaqe, hakimiy panyuṅqamuy somhteʼ God awwat mohpeq momṅwituy amumi tsamniqe ōviy pew pitsíwta? kitota. 22 Noqw tuwat Saul pas suyhtsepṅwat öqawiʼmaqe, Damascus ep Jew-sinmuy yumoṅwaltaqe, pay Jesus pas antsa Christ-nihqat amumi mātaqlawu. 23 Noqw ōviy ahpiy wūyavotiqw, Jew-sinom put nīnayaniqey nanawinya. 24 Nihqe puma put nīnayaniqe ōviy tālö-nik̇aṅw, pu tōkilat aṅ höhtsiwat aw tunatyawyuṅwa. Noqw yaw puma put moqmaniʼyuṅqw Saul navota. 25 Pahsat pu tuptsiwniʼyuṅqam míhikiwtaqw put tuhpelat aṅ tutsáyat akw hawnaya.
Saul in Jerusalem
26 Noqw Saul Jerusalem epeq pítuhqe, as tuptsiwniʼyuṅqamuy amumumtiniqey anhtiqw, puma sohsoyam put mamqasyaqe, pam pas antsa tuptsiwniʼtaqat qa tūtuptsiwa. 27 Noqw Barnabas put aw unaṅwtapqe, ayaiwyuṅqamuy amumi put wikva; nihqe hin pam Damascus aqwniqw, Tutuyqawhqa put aw namtaknaqe, put aw yuaaykuqat pam pumuy āawna, pu hin Paul Damascus epeq qa tuhtusk̇aṅw, Jesus natṅwaniyat aṅ nuhtumi yuaataqata. (Noqw pep puʼ puma put kwusuya.) 28 Noqw Paul Jerusalem epeq pumuy amumum hinnumqe, 29 Qa tuhtusk̇aṅw Tutuyqawhqat Jesus natṅwaniyat aṅ nuhtumi yuaata; nihqe Greek-sinmuy amuhkwa yuaatotaqamuy amumum put ep nāṅwuyʼtaqw puma put nīnayaniqey tunatyawyuṅwa. 30 Noqw tuptsiwniʼyuṅqam put nanaptaqe, Caesareat aqw put wikyaqe paṅqw put Tarsus aqw taviya. 31 Pahsat pu Jesus aw tōnawtaqam Judeat, pu Galileet, pu Samariat aṅ ahsupoq yesqam suyan unaṅwtotiqe, öqawhtota; nihqe Tutuyqawhqat k̇aptsiʼk̇ahk̇aṅw wūhaqʼiwma, Qahováriwtaqa Hikwsi amumi unaṅwtapqʼö.
Peter in Lydda and Joppa
32 Noqw Peter aṅqeʼ sohsovik nakwsuqe, Lyddat epeq God sinomuyatuy amumi hāwi. 33 Nihqe pepeq pam hakiy tāqat Aeneas yan mātsiwhqat tuwa, put hakiy ahpa qa taytaqw, pam okiw nanal yahsaṅwuy aṅ tuyhqatsi. 34 Noqw Peter put aw paṅqawu: Aeneas, Jesus Christ uṅ qalaptsina. Wunuptut, uhʼahpay tsovalaa, kita. Noqw pahsat pay pam wunuptu. 35 Noqw sohsoyam Lyddat pu Saron ep kiʼyuṅqam put aw yórikyaqe Tutuyqawhqat awwat lasya. 36 Noqw hak Joppat ep tuptsiwniʼtaqa Tabitha yan mātsiwa, pam Dorcas (Tsöviwmana) iʼnihqe pamʼi. Noqw iʼ hak wuhti lolmat tumalayʼta, pu hīhihta akw tūvaaṅwanta. 37 Noqw pam ephaqam tūtuyhtiqe mōki; noqw puma put pāhomyaqe tupatsveq taviya. 38 Noqw pay pi Lydda Joppat áhayhpo; noqw yaw Peter pep qátuhqat tuptsiwniʼyuṅqam nanaptaqe, hakimuy lȫqmuy tāqatuy paṅso ayatotaqw, pam qa sȫwunit, pumuy amuminiqat puma nāwakna. 39 Pahsat pu Peter nakwsuqe, pumuy amumuma. Noqw ōviy pam pituqw, puma put tupatsmiq wupnaya; noqw sohsoyam koṅnanalvut okiw put aqlap hoṅqe, tsaykik̇ahk̇aṅw nāt Dorcas pumuy amumum qátuhqe kwakwsat, pu yūyuwsit yukuhtaqat puma put aw matamintota. 40 Noqw pay Peter pumuy sohsokmuy paṅqw ipwat, tamötswunuptut nāwakna; nit pahsat put tokoyat aw namtökt paṅqawu: Tabitha, qatuptuu. Noqw pam pōsiy púruknaqe, Peter túwahqe, pahsat qatuptu. 41 Noqw pam put aw māvuyaltiqe, wunuptsinaqe, God sinomuyatuy koṅnanalvutuy enaṅ wáṅwayhqe, pumuy put āawna, kurs pam taytaqʼö. 42 Noqw iʼ yantaqa Joppat aṅ ahsupoq nanaptiwhq, k̇aysiwhqam Tutuyqawhqat aw tūtuptsiwa. 43 Noqw Peter Joppat ep hakiy pūvuk̇at pöhiwantaqat Simon amum wūhakis qatu.