Romans
1 Nuʼ Paul, Jesus Christ tūwikiat, it penta. God nuy wáṅwayhqe nuy ayata. Noqw ōviy nu put aṅqw lomatuawit yuaatinuma. 2 Ura pay hisat pam lavayʼaymuy lomatuawit aṅwu pay āawnaqw puma tutuveniyat aṅ put pēnaya. 3 Puma God Tiyat Jesus Christ Itahtutuyqawhqay lavayta. Put Tiat sinot anwat pítuhqe David ahpiy aniwhti. 4 Noqw pay Qahováriwtaqa Hikwsi pam God Tíatnihqe öqalayʼtaqat nuhtumi tuawiʼta, ispi pam mokiwuy aṅqw ahoy tātayhqʼö. 5 Noqw pam hapi nuy núokway akw tuawʼayata. Noqw ōviy nu put tuṅwniyat aw yank̇aṅw sopk̇awtaqamuy sinmuy amumi lomatuawit yuaateʼ, haqawatuy tuyqawvani; noqw pep puʼ itahtuptsiwniy aṅ hinwisni. 6 Noqw nu umumi piw ayatiwa; nāmahin pi Jesus Christ umuy pay nāmi wáṅwayi. 7 Nu umuy Rome epeq God sinomuyatuy öqalanta. God umumi unaṅwayʼtaqe uma put sinomatniqat ōviy umuy wáṅwayi. Nam pam umuy núokwat, pu kwakwhat unaṅwat máqani, Itahtutuyqawhqay Jesus Christ ámuma.
Prayer of Thanksgiving
8 Pas nu sohsokmuy umuhpe hahlayhtima, Itanay God awʼi, Jesus Christ Itahtutuyqawhqay aṅʼa. Kwakwhat pi umuhtuptsiwni tūwaqatsit aṅ ahsupoq lomayuaatiwa. 9 Nu yūmosa umuṅem tūviṅtima. God pas nāp nuy súaṅqawhqat navotiʼta. Put hapi eṅem nu iunaṅṅaqw tumalayʼma. Nu put eṅem lomatuawit Tiyat yuaataqat sinmuy āwinta. 10 Pas as okiw God pan tunatyawtaqw nāp hisat yepehaqtiqw nu qa haqam hinhteʼ umumiq pohtaniqey ōviy nu put aw tūviṅtima. 11 Pas nu as umumi yórikniqey nāwakna, nen hihta Hikwsit aṅqw tutuqayhqey umumi mātapq uma öqawhtotani. 12 It nu paṅqawu: Nu umumum yantaqw itam naʼqalayani-umuhtuptsiwniy aṅ-nik̇aṅw pu ituptsiwniy aṅʼa. 13 Noqw pay nu umuy it navotnaniqey nāwakna, itupkomu: Nu as piép umumiqniqey unaṅwtiṅwu; nīk̇aṅw nu pewhaqami pahsavo hihta akw sóontiṅwu. Nu umuhpaʼ as hakimuy piw ayo óyaniqey nāwakna, ayaṅ haqeʼ qa-Jew-sinmuy amuhpaʼ hakimuy ayo óyahqey panʼi. 14 Pi nu lomatuawit aw taviwat, aw ayatiwhqe, ōviy nu soon qa sohsokmuy sinmuy put āawnani, imuy Greek-sinmuy-nik̇aṅw pu qa-Greek-sinmuyu, aʼnö wuwniʼyuṅqamuy-nik̇aṅw pu piw qa wuwniʼyuṅqamuyu. 15 Noqw ōviy nu suhtaqʼewnihqe kwaṅwtoynak̇aṅw umuy Rome epeq sinmuy amumi enaṅ lomatuawit yuaatani.
The Power of the Gospel
16 Pi nu lomatuawit Christ yuaataqat qa hahmana, ispi God lavayiat öqalanihqe sohsokmuy tuptsiwyaqamuy ayo óyaṅwu. Pam imuy Jew-sinmuy amumi mohti yuaatiwa, nit pahsat pu imuy qa-Jew-sinmuy amumi pīwu. 17 Pi lomatuawi itamuy āawnaqw hak hin God aw súantaniqat itam navotiʼyuṅwa. Hak qapēvewneʼ put aw súantaṅwu; piw hak tuptsiwniʼk̇aṅw suan hinmaṅwu. Pi ura pan peyʼta: Suan hinmaqa qapēvewnit akw qatsítuwani.
The Guilt of Mankind
18 Pi God sinmuy put qa k̇aptsiʼwisqamuy amuhpewi itsívuat ōṅaqw mahtakiwa, pu qaanhinwisqamuy sohsokmuy amuhpewii. Puma hakim qaanhinwisqey akw God aṅqw navotit pas antsanihqat ahoy ṅuyʼyuṅwa. 19 Puma pi put pas sūkw Godnihqat yūmosa öqalayʼtaqat unaṅwpeq navotiʼyuṅwa, pi God amumi put mātaktaqʼö. 20 Noqw nāmahin pi as pam pantaqa qamātaqpuveniqw tūwaqatsit hisat yukiltiqat aṅqaqw sinom put māmatsya, yaṅ himu yukiltiqat ahpiyʼo; nihqe ōviy kurs hin ayo naymakniʼyuṅwni. 21 Ispi as puma God tuwiʼk̇ahk̇aṅw put qa k̇aptsiʼtota, piw qa tsúyakya; nit tuwat soq nānaphin hihta wūwanvaya. Paniqw ōviy unaṅwaam anʼeʼwakw akw qatālawva. 22 Puma pas aʼnö wuwniʼyuṅqey namiwuwantota; nīk̇aṅw pay kurs núanhihtuniwhtoti. 23 Nihqe puma God pas hímunihqat sutsep qátuhqat aw nānawaknaqey qeʼtotit, sinot pay súlawhtiṅwuqat an hihta yukiwhqat aw nāwakintivaya, pu hihtuy masayʼyuṅqamuy amún yukiwyuṅqamuyu, pu nālöq hok̇ayʼyuṅqamuyu, pu hihtuy hoyóyotinumyaqamuyu. 24 Paniqw ōviy God pumuy tuyoyʼewakw qatsit aw mātavi, nāp unaṅway tuṅlayiyat aṅ hinwisniqat ōviyʼo, nānami tokoy qahihtatotaniqat awʼi. 25 Ima hapi God pas antsanihqat pay wutsit enaṅ nāhoyṅwaya; nihqe pay hihta God ahpiy yukiwhqat aw nāwakintivayaqe eṅem tumaltivaya, God sohsok hihta yukuhqat tatamtotatʼa. Pam hapi sutsep tayawintiwaa; pay nam antaa. 26 Yantaqat ahpiy puʼ God pumuy tuyoyʼewakw tusk̇aptunatyat aw mātavi. Oviy hikis pi momoymat tahtaqtuy amumum namitumalat qeʼtotit nāp nāmi qaantsaktivaya. 27 Pu pay ōviy piw amún tahtaqt momoymuy amumum hin tumalayʼyuṅqey mātatvet, pu pas nānami nuvöʼnaṅway akw qaunaṅwtalawvaya, tāqa sukw tāqat amum hihta nāmiq tumalayʼtaṅwu, nihqe nāp tokoy ep qaanhtipuy ahpiy sivilalwa; noqw pam pantaqa pay pumuy nāp himuamu. 28 Pu pay puma God navotiʼyuṅwniqey qa nānawaknaqw, pahsat pu God pumuy anʼeʼwakw wuwnit aw mātavi; noqw puma as hihta qa hintsatsk̇aniqey hintsaktivaya, God put aw pumuy mātaviqʼö. 29 Puma hihta qaantsatskiwhqat akw ahsaliwyuṅwa. Puma tokot sokoptiwisniqey tunatyawyuṅwa; qalomátunatyawyuṅwa; k̇anʼewtunatyawyuṅwa; hakiy tūhototaniqey tunatyawyuṅwa; unaṅwtuyat akw ahsaliwyuṅwa; tukwyantunatyawyuṅwa; nāṅwuyʼtunatyawyuṅwa; unatwiʼyuṅwa; nukpantunatyawyuṅwa; kolilitiwisa; 30 Tūatsatotoynaya; God aw qa suhtaqʼewya; tūunaṅwmokintota; kwīkwivitu; hihta kwiviyuaatota; hihta qalolmat yēwalalwa; yumuy, namuy qa k̇aptsiʼyuṅwa; 31 Hihta qa mātsiʼyuṅwa; namiyukit tutkilalwa; tūqahahlayya; aʼnö unaṅwayʼyuṅwa; qanunʼokwatu. 32 Noqw hakim pan hinwisqam hovalniwyaniqey ep ö́kiniqat yan God amuṅem yuku. Noqw ima it navotiʼk̇ahk̇aṅw pan hinwisa, piw pan hinwisqamuy amuhpa nāhahlaynaya.