Romans

Godʼs Judgment

2 Yantaqw ōviy uma hakim nuhtumiq hiṅqaqwaqam kurs hin ayo nö́ṅakiwtani; pi uma hakiy aqw hiṅqaqweʼ napsiwnayaṅwu; pi uma nuhtumiq hiṅqaqwaqam pay piw pan hinwisa. 2 Noqw suyan pi God hakimuy panyuṅqamuy amuṅem suan hin yukuniʼmaqw itam navotiʼyuṅwa. 3 Noqw uma hakim nuhtumiq hiṅqawk̇ahk̇aṅw pay piw amún hinwisqamu, hisat God nuhtuṅem suan hin yúkunaqw, ya uma hin ayo nö́ṅakiwtaniqey wūwantota? 4 Pi God umuy pas ōkwatuwhqe ōviy umumi qa suyʼtsipti. Ya uma pay pas put paysoqlalwa? Pam umuy umuhnukusqatsiy aṅqw ayo lasnaniqe ōviy umuy pāsi. Ya uma pay pas qa ṅasʼew it aw wūwaya? 5 Uma umuhnukusqatsiy aṅqw ayo qa lasyat soq umuhʼunaṅway owatotaqe soñawnen God itsívuyat nenṅem waranhtota. Noqw ason God sinmuy amuṅem suan yuk̇eʼ pep puʼ pam umuy pas pavan sivintoynani. 6 Pi God sinmuy sohsokmuy nānap hintsakpiyamuy an amumi ahoytani. 7 Ima hakim lolmat tunatyawk̇ahk̇aṅw aṅ ahsupoq suan hinwisqamuy pam pumuy qatsit qasoʼtaqat máqani. Puma pi God aṅqw tayawinpit, pu k̇aptsiʼtiwhqat, pu qatsit tunatyawyuṅwa. 8 Nīk̇aṅw pay hakim nenṅem-sa hinwist God lavayiyat pas antsanihqat aw qa tuqayvastotat qaanhinwisq pam pumuy amumi itsívuy mahtaknani. 9 Sohsoyam qaanhinwisqam k̇ānanaptani, pas pavan hihta ep okiwhinhtotini, ima Jew-sinom mohtii, pu ima qa-Jew-sinom pīwu. 10 Nīk̇aṅw sohsoyam suan hinwisqam God tālayat ep yesni, k̇aptsiʼtiwyani, kwakwhat unaṅwayʼvayani, ima Jew-sinom mohtii, pu ima qa-Jew-sinom pīwu. 11 Pi God qa sinonuiña. 12 Pi ima qa-Jew-sinom Moses tutuvoyat qa navotiʼyuṅwa; nīk̇aṅw pay nāmahin pi tutavot qa pasiwk̇ahk̇aṅw qaanhtoteʼ hovalniwyani; noqw pay Jew-sinom Moses tutavoyat navotiʼk̇ahk̇aṅw qaanhtoteʼ tutavot an yukuniwyani. 13 Pi Moses tutavoyat nanaptaqam qa puma God aw súanyuṅwa; pi put aṅ hinwisqam hapi put aw súanyuṅwa. 14 Pi ima qa-Jew-sinom Moses tutavoyat qa tuwiʼyuṅwa; nīk̇aṅw nāp hin tutaptiwhqat aṅ mamavisya. Yanwisqey akw nāp tutavoy aṅ hinwisqey namtakniʼyuṅwa. 15 Pi pan hinmaqa unaṅwpeq tutavot pasiwtaqey mahtakniʼta; nihqe pam qaanhteʼ unaṅwpeq sunvotiʼtaṅwu, pu piw súanhteʼ navotiʼtaṅwu. 16 Pi Jesus Christ sinmuy qaanhintsakpiyamuy ep ason amuṅem hin yúkuni, hikis pi hihta nanauyve hintsatsk̇aqata, hisat God put eṅem tokiltaqat aw pítuqʼö. Nu yan sinmuy āwinta.

The Jews and the Law

17 Meh, um hapi Jew-sínonihqey pan túṅwantiwa, nihqe um Moses tutavoyat navotiʼtaqe put aw yank̇aṅw God sivihpiyat aṅqw ayo yámakiwtaniqey wūwanta; pu um God tuwiʼtaqey kwiviyuaata. 18 Nihqe um put tunatyayat navotiʼta; pu um hihta súantaqat, pu piw qasuantaqat navotiʼta, sam pi um Moses tutavoyat ahpiy put tutuqayhqee. 19 Nihqe um aṅ qapostalyaqamuy tsāmiʼmaqey pas nēṅem qa nánahtsovi; qatalpuveyaqamuy amumi talniʼtaqeyu; 20 Aṅ anʼeʼwakw hinwisqamuy tsihkwantaqeyu; tsātsakwmuy tutuqaynaqeyu; sam pi um Moses tutavoyat ahpiy hihta pas antsanihqat navotiʼta. 21 Taa, noqw um ayo sukw tutuqaynaqa, ya um hinoqw qa nātutuqayna? Hak hihta qa ūuymantaniqat um nuhtumi paṅqawlawhqa, ya um hinoqw hihta ūuyṅwu? 22 Hak nömaqtsit qa sokoptamantaniqat nuhtumi paṅqawlawhqa, ya um hinoqw nömaqtsit sokoptaṅwu? Um nāp yukiwhput aw nāwakintiwhqat pas qa hahlayhqa, ya um hinoqw pas āantsawat kīhut aṅqw hihta ūuyṅwu? 23 Um Moses tutavoyat ep tsómokiwtaqa, ya um hinoqw put ep qaanhteʼ God qa hihtataṅwu? 24 Pi God natṅwaniat umutsviy qa-Jew-sinmuy amunawit ōvelaniwa, ōviy pi pan peyʼta. 25 Pay as pi pas antsa um Moses tutavoyat an hinmaniqw pep puʼ poṅotkit akw tuvoyla hihk̇ayʼtani; nīk̇aṅw kurs um put tutavot ep qaanhteʼ pep hapi puʼ um qa pan tuvoylaiwtaqey antani. 26 Taa, kurs hak tāqa poṅotkit akw qa tuvoylaiwtaqa God tutavoyat an hinmeʼ pam as qa poṅotkiwk̇aṅw God-niqw pay pam tuvoylaiwtaqey antani. 27 Nen pam hak tokoy ep qa poṅotkiwk̇aṅw tutavot an hinmeʼ uṅ tuhtualni, um hak pan tuvoylaiwk̇aṅw tutavot tuwiʼk̇aṅw qaanhinmaqata. 28 Pi pay iʼ hak Jew-sino pan tihtiwhqa God-niqw qa pas antsa Jew-sino; pu hak tókoy-sa ep poṅotkit akw tuvoylaiwtaqa God-niqw qa pas antsa pan tuvoylaiwta. 29 Pi iʼ hapi hak pas unaṅwpeq Jew-sinonihqa hapi putniqw pas antsa Jew-sino; pu iʼ hak pas unaṅwpeq tuvoylaiwtaqa hapi putniqw pas antsa tuvoylaiwta. Hak tutavot an hinhtiniqey-sa ōviy tokoy ep tuvoylaiwteʼ qa pas antsa tuvoylaiwtaṅwu. Pi hak Qahováriwtaqat Hikwsit ahpiy unaṅwpeq tuvoylaiwṅwu. Pam God ahpiy tayawniwni, qa sinmuy amuhpiyʼo.