Romans
Do Not Judge Your Brother
14 Uma hakiy tuptsiwnit aṅ qa öqalat pās taviyamantani, nīk̇aṅw hihta tuptsiwniyat ep qa amum nāṅwuyʼyuṅwni. 2 Pay suhk̇a sohsok hihta tūmoytaniqey tuptsiwniʼtaṅwu; noqw pu suhk̇a qa öqala sikwit qa tūmoytaṅwu. 3 Tūmoytaqa it qa tūmoytaqat aw qa yeʼtayʼtani; pu iʼ qa tūmoytaqa it tūmoytaqat aqw qa hiṅqawlawni, taq God pay put kwusu. 4 Ya um haknihqe God tumalʼayayat aqw hiṅqawlawu? Ason pi pam God-niqw sen suan hinmaṅwu, sen qa suan hinmaṅwu. Noqw nu nātuptsiwniʼtaqw pam soon qa suan hinmani; pi pam pan hinmaniqat God put eṅem yúkuniqey aw öqala. 5 Suhk̇a hihtawat talöṅnit pas hihtayʼtaṅwu; pu sukwniqw pay sohsoy suntaṅwu. Uma nanāp umuhwuwniy aṅ qa wiwsiyani. 6 Talöṅnit k̇aptsiʼtaqa Tutuyqawhqat eṅem put k̇aptsiʼtaṅwu, pu piw put qa k̇aptsiʼtaqa pay Tutuyqawhqat eṅem put qa k̇aptsiʼtaṅwu. Sikwit tūmoytaqa Tutuyqawhqat eṅem put tūmoytaṅwu, God aw put ep hahlayhtimaqee; pu iʼ put qa tūmoytaqa piw pay Tutuyqawhqat eṅem put qa tūmoytaṅwu, nihqe God aw hahlayhtima. 7 Pi qa hak súneṅem qatu, piw qa hak súneṅem mōki. 8 Pi itam yesqe Tutuyqawhqat eṅem yēse; pu itam soeʼ Tutuyqawhqat aw yank̇ahk̇aṅw soʼni. Noqw ōviy nāmahin pi itam yesni, sen soʼni, itam Tutuyqawhqat himumatu. 9 Pi yantaniqw ōviy Christ mōki, pu ahoy tātayi, pam soʼpumuy amumi-nik̇aṅw pu yesqamuy amumi tutuyqawniqe ōviyʼo. 10 Noqw ya um hinoqw uhtupkoy aqw hiṅqawlawu? Hal ya um hinoqw uhtupkoy qahihtalawu? Pi itam sohsoyam Christ haqam sinmuy hin yukunaniqat atpip hoṅvani. 11 Pi ura yan peyʼta: Nu hapi suyan qatu, kita Tutuyqawhqa; noqw pan hapi pas suyan sohsoyam inumi tamötshoṅvani, noqw sohsoyam God aw nātuhtualyani. 12 Noqw ōviy itam hapi sohsoyam God aw nālavaytani.
Do Not Make Your Brother Fall
13 Oviy itam pāpu nānamiq hihta aṅ qa hiṅqaqwani; itam qa panyuṅwt yanwat wūwantotani, qa hak tupkoy atpik hihta ep múnukniqat hintsakni, sen hihta ep múnuk̇eʼ qaanhtiniqata. 14 Pi nu navotiʼta, nu Tutuyqawhqat Jesus aṅqw pan tuptsiwa; pas qa himu nȫsiwhqa nāp nahpe itséhee; nīk̇aṅw himu hákiyniqw itséheenen pam put eṅem itséheeniṅwu. 15 Noqw kurs uhtupko uhnösiwhqay akw unaṅwmokq pahsat pay kurs um put aw qa unaṅwayʼtaqat antani; um Christ hakiy eṅem mokqat uhnösiwhqay akw qa hovalani. 16 Oviy hapi uṅniqw himu lolmanihqat qa hak put qalomáyuaatani. 17 Pi hak sikwit nösqa, sen ovavalat hikwqa qa pam hapi God tunatyayat aṅ hinma, piw hak put qa nösqa, sen qa hikwqa qa pamʼi; nīk̇aṅw hak suan hinmeʼ piw kwakwhat unaṅwayʼteʼ put tunatyayat aṅ hinmani. Pam hapi Qahováriwtaqat Hikwsit ahpiy hahlayhpit pasiwtani. 18 Pam hapi Christ eṅem tumalayʼmeʼ God unaṅwveni, pu sinmuy amumi lomahintani. 19 Noqw ōviy itam hin yep pās unaṅwat yesniqey aṅ öʼqalyani, pu hihta akw nāwuṅwnayaniqeyu. 20 Um qa sikwit ōviy God tumalayat sakwítani. Pay as pas sohsoy himu nȫsiwhqa kwaṅwʼewayʼo; nīk̇aṅw hak hihta tūmoytaqey akw hakiy unaṅwmoknaniqw pam qa súanta. 21 Pay hak tupkoy tunatyawk̇aṅw qa sikwínösat pu sen ovavalat qa hīkweʼ sen nāp hintsakpiy mēweʼ súanhtini. Noqw pep puʼ put tupkoat put hintsakpiyat qa akw múnukni, piw qa unaṅwmokni, piw qa tūtsakwiwtani. 22 Kurs um sikwit tūmoytaniqey qapēvewneʼ um God atpip nāla pantani. Ya um sikwit tūmoytaniqey nānakwhantoyna? Kurs um put akw qa nāsoontsaneʼ um hahlayhpit epni. 23 Pu iʼ wiwsik̇aṅw nösqa hapi pay qalomáhinhtiṅwu, pam qatuptsiwniʼk̇aṅw panhtiṅwuniqe ōviyʼo; pi hak qatuptsiwniʼk̇aṅw hihta hintsak̇eʼ qaanhtiṅwu.