Romans
Please Others, Not Yourselves
15 Noqw ōviy itam tuptsiwnit aṅ öʼqalt qaöqáwiʼyuṅqamuy amumi maqaptsiʼyuṅwni, qa paysoq-sa nāp itahtunatyay hinhtotini. 2 Itam sohsoyam itahsinosṅwamuy öqawhtotaniqat ōviy tunatyawyuṅwni. 3 Pi Christ pas nāp tunatyay hinhtiniqey qa pan tunatyawta, pi ura yan peyʼta: Umumiq hiṅqaqwaqamuy lavayiam inuhpe yēvaya. (Ura Christ Nay aw yan lavayhti.) 4 Pi hisat himu pēniwhqa itamuṅem pēniwa, itam put ahpiy hihta tutuqayyaniqat ōviyʼo; noqw itam tutuvenit ahpiy öqalantiwyeʼ hūrs hoṅvani, nen God aw yanyuṅwni. 5 Nam God hakiy hihta aṅ kuyvanaṅwuk̇aṅw pu hakiy öqalaṅwuqa umuy sun unaṅwtoynani, Jesus Christ hin tunatyayʼtaqat panʼi. 6 Noqw uma sunwuwnit, pu sunlavayit akw God, Itahtutuyqawhqay Jesus Christ Nayat tayawnayani.
The Gospel to the Gentiles
7 Piw uma pās nāooyyani, Christ itamuy pās óyahqat panʼi, God pas hímunihqat ōviyʼo. 8 Noqw nu umumi paṅqawni: Jesus Christ Jew-sinmuy amumi lavayʼaya, God pas qa atsátaqat mahtaknaniqee, pu itahwuʼyamuy amumi hin pasiwhtaqat aw aṅ antsantaniqee. 9 Noqw ima qa-Jew-sinom God núokwayat ep put pas hihtatotani, pi ura yan peyʼta: Yaniqw ōviy nu qa-Jew-sinmuy amumi uṅ paṅqawni; nu uhnatṅwaniy aw tawlawni, yanʼi. 10 Pu piw pam paṅqawu: Uma qa-Jew-sinom put sinomuyatuy amumum hahlayyani. 11 Pu piw yanwata: Uma Tutuyqawhqat tayawnayani, sohsoyam qa-Jew-sínomu; uma put aw hahlayyani, sinom sohsoyamu. 12 Pu piw Esaias yan lavayhti: Pay nāt Jesset ahpiy aniwhtiqa wunuptuni; nen pam qa-Jew-sinmuy amumi moṅwʼiwtani; noqw qa-Jew-sinom put aw yanyuṅwni. 13 Nam God hakiy unaṅwvastoynaṅwuqa umuy hinhaqam hahlaytoyneʼ umuy kwakwhat unaṅwtoynani, umuy put aw tūtuptsiwaqʼö. Nam pam umuy pās unaṅwvahsit huytani, Qahováriwtaqat Hiksit ahpiyʼo.
Paulʼs Reason for Writing So Boldly
14 Itupkomu, pas nu umuy qapēvewnaqw uma lolmat pas pasiwyuṅwa, pu itahtuptsiwniy sohsok tuwiʼyuṅwa, pu uma nāöʼqawnayaniqey pasiwyuṅwa. 15 Nīk̇aṅwo itupkomu, nu hihin qatuhtusk̇aṅw umumi penta, umuy ahoy hīhihta uʼnananiqey tunatyawk̇aṅwo. 16 God nuy ōkwatuwhqe nuy qa-Jew-sinmuy Jesus Christ āawnaniqat ayata, nu God aṅqw lomatuawit yuaataniqat ōviyʼo. Okiw as nu qa-Jew-sinmuyy put aw noaqw Qahováriwtaqa Hikwsi pumuy put aw sūpwataqw God put pantaqat ep hahlayni. 17 Noqw ōviy nu Jesus Christ amum God eṅem hihta tumaltaqey ep tsúyakiwtani. 18 Nen Christ inuhpiy hihta hintsakqat-sa yuaatani; pam inuhpiy qa-Jew-sinmuy put aw tuqayvastotaniqat tumaltaqʼö. Pam lavayiy akw tumalta, pu hintsakpiy akwʼa, 19 Pu k̇ātutmalat hihta tuawiʼyuṅqat akwʼa, God Hikwsiyat öqalayat ahpiyʼo. Noqw ōviy nu Jerusalem-kitsókit aṅqw Illyricum-tutskwat aqw pahsavo lomatuawit Christ tuawiʼtaqat sohsok yuaayku. 20 Pu nu yan tunatyawta: Nu haqam Christ pay yuaatiwhqat qa pep lomatuawit yuaataniqeyu, taq k̇a nu pay hakiy kīyayhniyat ahpiy tukwtani. 21 Pay pi ura yan peyʼta: Hakimuy amumi qa āawnayaqw puma put nanaptani; pu put qa hisat nanaptaqam māmatsyani.
Paulʼs Plan to Visit Rome
22 Yantaqw ōviy nu as piép umumiqniqey unaṅwtik̇aṅw itumalay akw sóontsaniwṅwu. 23 Noqw nu yepeq kurs pāpu haqaminiqey, pu nu as wūhaq yahsaṅwuy aṅ umumiqniqey tunatyawtaqe 24 Oviy ason nu hisat Spain aqwnen umumiqni; pay hisnen nu aqwnīk̇aṅw umumi as yórikniqey wūwanta; nen nu umumum hihsavo hahlayhq, pu nu paṅsoqniqw, uma nuy paaṅwayani. 25 Nīk̇aṅw nu nāt pay puʼ Jerusalem aqw hoyta, God sinomuyatuy hihta haqniʼyuṅqat amuṅem yawmaniqey ōviyʼo. 26 Pi ima Macedoniat pu Achaiat ep tuptsiwniʼyuṅqam hihta oʼyaniqey ep hahlayk̇ahk̇aṅw kuwahtoti, Jerusalem epeq God sinomuyatuy amuṅaqw aṅ okiwhinyuṅqamuy amuṅemi. 27 Puma hahlayhtoti, amumi yoniwyuṅqee, pi God Jew-sinmuy amuhpiy qa-Jew-sinmuy lomatuawit āawnaqe pumuy ayo oya, soñawnen pumuy kuwahtiput huyta; noqw ōviy qa-Jew-sinom soon it qatsit ep hihta himuyʼyuṅqey akw qa pumuy amumi unaṅwtapyani. 28 Noqw ōviy ason nu yan it iayaway an hinhteʼ hihta oyiwhqat pumuy amumi noeʼ pep puʼ nu umuhpa hinmak̇aṅw Spain aqwni. 29 Noqw it nu navotiʼta: Pas nu umumiq piteʼ umuy Christ āawnaqw pam inuhpiy umuy pas pavan öqaltoynani. 30 Aw iunaṅwamu itupkomu, uma Jesus Christ aw tūtuptsiwhqe nānami unaṅwayʼyuṅwa, pan Hikwsit ahpiy tutuqayyaqee. Noqw ōviy nu umumi okiw paṅqawni: Uma qa nātusiʼk̇ahk̇aṅw inuṅem God aw tūviṅtotani. 31 Noqw nu Judeat ep qatuptsiwniʼyuṅqamuy amuṅaqw ayo taviwniqat uma inumum nāwakintotani, pu nu Jerusalem epeq sinmuy amuṅem hihta hinmaqat God sinomat pas pay okiw ömahtotani. 32 Noqw God pan tunatyawtaqw nu hahlayk̇aṅw umumiq pituni, nen umumum suyan unaṅwtini. 33 Taay, nam hakiy kwakwhat unaṅwtoynaṅwuqa God sohsokmuy umumum yantaa. Nam antani.