Romans
Dead to Sin but Alive in Christ
6 Noqw itam hiṅqaqwani? Ya sen itam yūmosa qaanhinwisni, God núokwayat pas pavan mahtaknayaniqe ōviyʼo? 2 Pas sóoni. Pi hak mōk̇eʼ qaanhtiput soon qa qeʼtini. Noqw pan piw itam qa hihta ep qaanhtotini. 3 Pi itam Christ amum soa, itam hakim kūyit akw tuvoylatotiqe put aw tōnaltiqamu. Ya uma it qa navotiʼyuṅwa? 4 Nihqe itam kūyit akw tuvoylatotiqe put amum soʼqe āmiwya; nihqe itam put amum āmiwyaqe Nayat lolmat öqalayat akw ahoy tātayya, pūhut qatsit aṅ hinwisniqe ōviyʼo, Christ hin tātayhqat panʼi. 5 Pi itam put an soeʼ āmiwyeʼ kurs pi hin itam piw qa put an tātayyani. 6 Pi itam navotiʼyuṅqw itahhisatqatsi put amum nahoylehtsit aw muiwa, itahtokoy qalomátuṅlayiat ayo yukiwniqat ōviyʼo; noqw qaanhtipu pāpu itamumi qa tuyqawiʼtani. 7 Pi mokqa qaanhtiput aṅqw mātaviwṅwu. 8 Noqw itam Christ amum soʼqe pay itam soon piw put amum qa yesniqey tuptsiwniʼyuṅwa. 9 Pi itam navotiʼyuṅqw Christ mokiwuy aṅqw ahoy tātayhqe soon pāpu mokni; pi mokiwu pāpu put aw qa tuyqawiʼtani. 10 Pam sūs mokqe qaanhtiput áṅwuta; pu pam tātayhqe God eṅem qatu. 11 Noqw ōviy hapi uma soʼqey nāmi wūwantotani, pi mokqa qaanhtiput soon qa qeʼtini; nīk̇aṅw uma Itahtutuyqawhqay Jesus Christ aw tōnalteʼ God eṅem yesni. 12 Uma umuhtokoy súlawhtiṅwuqat qaanhtiput aw qa mātatveni, taq k̇a qaanhtipu umumi moṅwʼiwtaniqʼö; uma umuhtokoy tuṅlayiyat qa aṅ hinwisni. 13 Pu uma umuhtokoy qaanhtiput qa aw noayamantani, taq k̇a uma put akw qaanhtiput tumaltotani. Uma qa panyuṅwt God aw nānoiʼyuṅwni, soʼpumuy amuṅaqw ahoy yesvaqey panʼi, pu umuhtokoy God aw noiʼyuṅwni, suan hinwisniqe ōviyʼo. 14 Pi qaanhtipu soon pāpu umumi tutuyqawni; pi itam tutavot qa aw yanyuṅwt God núokwayat aw yanyuṅwa.
Slaves of Righteousness
15 Noqw hintani? Ya itam pahsat pu qaanhtiput aṅ hinwisni, itam God núokwayat aw yanyuṅqey tunatyawk̇ahk̇aṅwo, qa tutavot awʼi? Pas sóoni. 16 Ason hak hakiy sukw tunatyayat aw tūqaytaniqey ōviy aw nāmataveʼ pam put tūwikiatni? Ya uma it qa navotiʼyuṅwa? Noqw ōviy kurs uma qaanqatsit aṅ hinwiseʼ uma put aw tūtuwiktni, pu umuhʼahsati mokiwuni. Pu kurs uma God aw tuqayvastoteʼ God tūwikimatni, piw súan qatsit put aṅqw makiwyani. 17 Nu God aw umuhpe hahlayhtima, itupkomu. Pay as ura uma hisat qaanhtiput tūwikimatu; nīk̇aṅw kwakwhat pi hak umuy lomatuawit tutuqaynaqw uma put kwusuyaqe umuhʼunaṅwpeq put tūtuptsiwa. 18 Noqw ōviy uma qaanhtiput aṅqw mātaviwyaqe God aw tūwiktotiqe suan hinwisa. 19 Nu hapi pay sinot tuwiyat an umumi yuaata; pi umuy māmatsyaniqw pam umuṅem qatuvosi. Pay ura uma hisat umuhtokoy itséheeqatsit, pu nānaṅumo qaanhintsatsk̇aniqey aw nānoiʼyuṅwa. Nīk̇aṅw pay uma puʼ hapi umuhtokoy suan qatsit aw noiʼyuṅwni, uma suan hinwisniqe ōviyʼo. 20 Taq ura uma qaanhtiput aw tūtuwiktnihqe uma suan qatsit qa aw tunatyawyuṅwa. 21 Taay, noqw ya uma qaanhtiput aṅqw hihta nukṅwat tutwa? Qa hihtaa. Pi uma puʼ put ep hahmanya. Pi qaanhtipu mokiwuy hihk̇ayʼta. 22 Noqw uma hapi puʼ qaanhtiput aṅqw mātaviwyuṅqe God awwat tūwiktoti; nihqe uma put aṅqw súanqatsit makiwyani, pu soʼṅwamiq qatsit qasoʼtaqat himuyʼvayani. 23 Pi mokiwu qaanhtiput ahsatiata; noqw pay qatsi qasoʼtaqa God kuwahtipuata, Itahtutuyqawhqay Jesus Christ aṅʼa.