Romans
An Illustration from Marriage
7 Sino hihsavo qátuniqey pahsavo tutavot k̇aptsiʼmani. Ya uma it qa navotiʼyuṅwa, itupkomu? Nu hapi tutavot tuwiʼyuṅqamuy amumi penta. 2 Pi wuhti puwsuṅwayʼtaqa puwsuṅway aw somʼiwtaṅwu, puwsuṅwaat hihsavo qátuniqat pahsavoo; nīk̇aṅw ason puwsuṅwaat mokq pep puʼ pam put aṅqw mātaviwṅwu. Tutavot aṅ yan hapi peyʼta. 3 Noqw ōviy kurs nāt puwsuṅwaat qatuqw pam sukw amum qatupteʼ pam yoñaywuhti túṅwantiwṅwu; nīk̇aṅw kurs pay puwsuṅwaat mokq pahsat pu pam tutavotniqw put aṅqw mātaviwṅwu; nihqe ōviy pas as pi nāmahin piw hakiy amum qatupteʼ pay qa yoñaywuhti túṅwantiwni. 4 Panta itupkomu. Noqw ōviy hapi uma Christ amum soʼqe tutavot aṅqw mātaviwyuṅwa, uma Christ ámumtotiniqee, it hakiy mokiwuy aṅqw ahoy tātayhqat ámuma, nihqe uma God eṅem tumalayʼyuṅwni. 5 Pi ura itam nāp itahtunatyay aṅ hinwisq tutavo itamuy mēwantaqw itam pas pāpu qaanhinwisk̇ahk̇aṅw mokiwuy aw ökiwisa. 6 Noqw puʼ hapi itam Christ amum soʼqe tutavot itamuy ṅuyʼtaqat aṅqw mātaviwyaqe Qahováriwtaqat Hikwsit ahpiy pūhut qatist makiwya. Ura as itam hisat tutavot aṅ hin peyʼtaqat pan God eṅem tumalayʼwisa; nīk̇aṅw puʼ hapi Qahováriwtaqa Hikwsi itamumi hin tutaptiʼmaqat itam pan put eṅem tumalayʼyuṅwa.
Law and Sin
7 Noqw itam pahsat hiṅqaqwani? Ya tutavo qaanhtiput súanta? Qae. Pi as tutavot qa háqamniqw nu soon qaanhtiput hímunihqat tuwiʼtani. Pi tutavot ep yan peyʼta: Um hihta qa uhhimuy qa tuṅlayʼtani. Pay kurs as qa pan peyʼtaqw nu soon tuṅlayit hímunihqat tuwiʼtani. 8 Pi as tutavo tuṅlayit hímunihqat nuy tutuqaynaqw pahsat pu nu pas pāpu hīhihta tuṅlayʼta. Pi nu as nāt tutavot qa tuwiʼtaqw soñawnen pi tutavo qa háqamo; noqw ōviy kurs nu hin tutavot aṅqw lasni. 9 Ura nu hisat mewnit nāt qa tuwiʼtaqe hahlayk̇aṅw qatu; nīk̇aṅw nu put tuwiʼvaqe qaanhtiniqey pas pāpu nāwaknaqe qahahlayhtiqe soñawnen mōki. 10 Pas as sinom yesniqat ōviy tutavo mātaviwa; noqw pay nu put aw navotq kurs sinom put ahpiy soʼṅwu. 11 Pi nu tutavot tuwiʼvaqe qaanhtiput ahpiy ūnatiwhqe soñawnen mōki. 12 Noqw ōviy hapi God tutavoat pas qahováriwta, pu mewni qahováriwta, súanta, pu lolma. 13 Ya sen tutavo lolmanihqa nuy nīna? Pas qae. Pi nu qaanhinmak̇aṅw tutavot aṅqw lahsi, nihqe nu tutavotniqw mokiwuy hihk̇ayʼtani. Pi tutavo qaanhtiput suhputsnaniqe taviwa, qaanhtiput pas nuhtselʼewakw put akw mātaktiniqat ōviyʼo.
The Two Natures in Man
14 Pi itam navotiʼyuṅqw God tutavoat Hikwsit ahpiy mātaviwa; noqw pi nu nāp itunatyay aṅ hinmak̇aṅw qaanhtiput aw tūwikiniṅwu. 15 Pi nu hintsakqey qa mātsiʼta. Pi nu hinhtiniqey nāwakneʼ soq qa put panhtiṅwu; pu nu as hihta aw qa suhtaqʼewnik̇aṅw soq putwat hinhtiṅwu. 16 Noqw ōviy nu as hihta qa nāwaknak̇aṅw soq putwat hinhteʼ pahsat pay God tutavoyat lolmanihqat nu paṅqawṅwu. 17 Noqw ōviy hapi pāpu nu qa nahpiy put hinhtiṅwu, pi qaanhtipu inuhpe pakiwtaqw ōviy nu pantsakma. 18 Pi nu navotiʼtaqe kurs hin pas nāp hihta lolmat hintsakni. Pay nu as hihta lolmat tumaltaniqey tunatyaltiṅwu; nīk̇aṅw hin nu put lolmat hinhtiniqey qa túwaṅwu. 19 Pi nu as lolmat hinhtiniqey nāwaknak̇aṅw put qa panhtiṅwu; pu nu hihta qalolmat as qa hinhtinik̇aṅw tuwat soq put panhtiṅwu. 20 Noqw ōviy hapi nu hihta as qa nāwaknak̇aṅw put panhteʼ qa nahpiy put panhtiṅwu; pi qaanhtipu inuhpe pakiwtaqw ōviy nu pantsakma. 21 Noqw nu navotiʼtaqw kurs panta: Kurs nu as hihta lolmat hinhtiniqey nāwaknaqw pay kurs qalolma piw inumum yanta. 22 Pi nu as pas iunaṅwpeq God tutavoyat aṅ nāhahlayna. 23 Nīk̇aṅw nu itokoy túwahqe pay kurs pam hihtawat nāwaknaqw iwuwni sukwat nāwakna; noqw nu itokoy qalomátuṅlayiyat aw tūwikʼiwta. 24 Nu iunaṅṅaqw God eṅem tumalayʼtaniqey nāwakna, nīk̇aṅw nu itokoy akw qaanhtiput eṅem tumalayʼta. Is ohi, okiw himu nūu! Ya sen hak itokoy tuṅlayiyat mokiwuy aw nuy wīkiʼmaqat aṅqw nuy ayo távini? Pas nu God aw hahlayhti, Jesus Christ nuy ayo táviqʼö. 25 See 7:24