Romans
God and His Chosen People
9 Christ nuy pas súaṅqawhqat inumi navotiʼta, pu Qahováriwtaqa Hikwsi nuy qa atsálawhqat iunaṅwpeq yan nuy āwinta. 2 Pas nu aʼnö putuiwk̇aṅw sutsep isinomuy amuṅem iunaṅwpeq qahahlayi. 3 Pay pi as nu tatam isinomuy, pu inuhpivituy amuṅem Christ aṅqw tūviwtanik̇aṅwo. 4 Puma hapi Israel-timatu; puma hapi God timkiwamatu, pu put lolma tālaat as amumum yanta; pu God pumuy amumi hīhihta pasiwna; pu pumuy amuhpiy sinmuy hin hinwisniqat tutapta; pu puma hapi hakim hin God eṅem tumaltotaniqat tuwiʼyuṅwa; pu pumuy amuṅem hīhihta lolmat hintsakniqey āawna. 5 Pu hakim pavansinom pumuy námatu; pu Israel-sinmuy amuhpiy Christ tokot aṅ pitu; pam hapi sohsokmuy amupyevenihqe mohpeqnihqa. Pam hapi God sutsep tayawintiwa. Nam yantani. 6 Nīk̇aṅw suhpan pay God lavayiat qa aniwhtiqat qa panta; pi qa sohsoyam Israel ahpiy nö́ṅakqam God timatu. 7 Pu God qa sohokmuy Abraham tímuyatuy namorsta; pi ura paṅqawu: Ason hapi Isaac timat Abraham timat túṅwantiwyani. 8 It hapi nu paṅqawu: Ima tokot-sa ahpiy aniwhtiqam qa puma God tímatu; pi God awiniyat ahpiy aniwhtiqam hapi tímatnihqey pan pohtoylaniwyuṅwa. 9 Yan ura God Abraham aw lavayhti: Yahsaṅwuy yaṅqe qalawmaqw nu pítuni; noqw Sarah pay tiyohyat tiʼtani. 10 Pu qa panis-sa panta: ura Rebecca hakiy itanay Isaac eṅem sūs nöʼyilti, 11 Noqw ura tsāyom nāt qa tihtiwhqe hihta lolmat, piw qalolmat qa haqam hinhtiqw Rebeccat aw yan lavayhtiwa: Wūyoqwa hapi tsākwwat eṅem tumalayʼtani, kita. Pi God hin tunatyawtaqey pan hakiy namorstaṅwu, hakiy hintsakpiyat qa ahpiynit, pas nāp tunatyay ahpiyʼo. 12 See 9:11 13 Pi ura yan peyʼta: Nu aṅqaqw Jacob aw unaṅwayʼk̇aṅw Esau nu aw qa suhtaqʼewa, yanʼi. 14 Noqw ya sen itam God hihta ep qa súantsakqat paṅqaqwani? Qae. 15 Oviy pi ura pam Moses aw paṅqawu: Nu hakiy ōkwatuwnik put ōkwatuwmantani; pu hakiy aw unaṅwtapnik put aw nu unaṅwtapmantani, kita. 16 Noqw ōviy qa hak pas nāp tunatyay ahpiy namorstiwṅwu, sen öqalay ahpiyʼo; pas hapi God hakiy ōkwatuwhq pantaṅwu. 17 Oviy pi God tutuvenit aṅ Pharoah aw paṅqawu: Pi nu yaniqw uṅ wuṅwna, nu uhpe iöqalay mātaktaniqe ōviyʼo, nen inatṅwaniy tūwaqatsit aṅ ahsupoq tunvotnani. 18 Noqw ōviy hapi pam hakiy ōkwatuwnik ōkwatuwṅwu, pu hakiy aʼnö unaṅwtoynanik pantsanṅwu.
Godʼs Wrath and Mercy
19 Noqw k̇a hak soon inumi qa paṅqawni: Noqw hinoqw pam nāt piw hakiy aqw hiṅqawlawṅwu? Ya hak haqam put tunatyayat aw rohomtiniqey aw öqala? 20 Qa panta, tāqa; ya um haknihqe ōviy God aw kolilita? Ya sen haqam himu yukiwtaqa put yúkuhqat aw paṅqawni: Ya um hinoqw nuy yanhaqam yuku, kítani? 21 Ya tsaqavotlawhqa tsöqat aw qa tuyqawiʼtaṅwu? Ya sen pam sukw tsöqat aṅqw hihta nukṅwat yúkuk̇aṅw pu pay piw put aṅqw hihta hinʼewakw yúkuniqey aw qa öqala? 22 Pi haqawat sivuskwit an nawus hovalniwyani. Noqw pay God pumuy amumi wuhko maqaptsiʼta. Nīk̇aṅw ason pam pumuy hovalanik itsívuy mahtaknani, pu öqalayu. 23 Nīk̇aṅw pam hakimuy Chrsit amum k̇aptsiʼtiwyaniqat ōviy aṅwu pay pumuy namorsta. Pam namorayamuy amumi núokway, pu pas hímunihqey mahtaknani, 24 Itamumii, itam put ahpiy wáṅwayniwyaqamuy amumii, Jew-sinmuy amumii, pu qa-Jew-sinmuy amumi pīwu. 25 Suyan pi pam qa-Jew-sinmuy enaṅ wáṅwayi; ōviy pi Oseet tutuveniyat aṅ yan peyʼta: Nu hakimuy qa isinomuy amumi paṅqawni: Uma hapi isinomu, amumi kítani; piw nu sinmuy amumi qa unaṅwayʼtaqey amumi paṅqawni: Nu umumi pas unaṅwayʼta, kítani. 26 Piw yanʼi: Ura pam haqam puma qa sínomnihqat amumi paṅqawhq pay pep piw puma God qátuhqat tímatnihqat yan amumi lavayhtiwni. 27 Noqw Esaias pi pas tsaʼlawhqe Israel sinmuy lavayhtiqe paṅqawu: Nāmahin pi as Israel timat pātuwaqatsit qalavaqe pisat an qaanʼewakw hintaqw pay hapi híkiyom-sa ayo nöṅakni. 28 Pi Tutuyqawhqa tūwaqatsit ep sinmuy amuṅem pay yuku. Ason hisat aw pituqw pam suan yuk̇eʼ supsiwnani. 29 Pu ura pi Esaias pay mohti paṅqawu: Pas as qaanʼewakw hintaqamuy amumi Tutuyqawhqa itamuṅem qa poshumtaqw soon itam Sodom ep sinmuy qa amún súlawhtini, pu Gomorraht ep sinmuy amún hovalniwyani.
Israel and the Gospel
30 Taa, noqw itam it ep hiṅqaqwani? Ima qa-Jew-sinom suan hinyuṅwniqey aṅ qa öʼqalyaqw God pumuy suan hinyuṅwniqat pan amuṅem yuku, puma qapēvewnayaqw ōviyʼo. 31 Noqw pay Israel-sinom God tutavoyat ahpiy suan hinyuṅwniqey aṅ öʼqalyaqam tutavot aṅ qa kuhkuyva. 32 Noqw ya hinoqʼö? Puma pi tuptsiwnit qa ahpiy put aṅ öʼqalya, púmuyniqw hak God tutavoyat hintsakpiyat ahpiy put túwaṅwuniqʼö. Soñawnen pi puma owat ep múnukya. 33 Pi ura pan peyʼta: Meh, nu hapi Sion ep owat távini. Sinom put ep wíwakyaʼ múnukyani; nīk̇aṅw put aw tuptsiwhqa pas soon hamanhtini. (Iʼ owa Christ tuawiʼta.)