Romans
Life in the Spirit
8 Pi God itamuy Christ Jesus aw tōnawtaqamuy qa hinwat yukunani, itamuy hakimuy nāp itahtunatyay aṅqw lasyaqe Hikwsit tunatyayat aṅ hinwisqamuyu. 2 Pi itam Jesus Christ aw tōnaltiqe Hikwsit öqalayat aw nānoiʼyuṅwa, nihqe qaanhtiput öqalayat-nik̇aṅw pu mokiwut öqalayat aṅqw mātaviwyaqe qatsit himuyʼvaya. 3 Pi tutavo kurs hin hakiy qaanhtiput aṅqw ayo távini, kurs hak put suan hinmaniqʼö. Noqw pay God pas nāp Tiy taviqw pam sinmuy qaanhtotiṅwuqamuy amún tokoyʼva, nihqe itahqaanhtipuy ep mokqe qaanhtiput áṅwuta, put pāpu itahtokoy aw qa moṅwʼiwtaniqw ōviyʼo. 4 Noqw pahsat pu itam Hikwsit tunatyayat aṅ hinwisqam tutavot suan tunatyayat aw antsanyani, nāp itahtunatyay qa aṅ hinwisk̇ahk̇aṅwo. 5 Pi nāp tunatyay aṅ hinwisqam put-sa aw tunatyawyuṅwa; pu Hikwsit tunatyayat aṅ hinwisqam Hikwsit tunatyayat aw tunatyawyuṅwa. 6 Nāp tunatyay aṅ hinwisqam mokiwuy aw ökiwisa; noqw pay Hikwsit tunatyayat aw tunatyawyuṅqam kwakwhat unaṅwat, pu qatsit tutwani. 7 Pi nāp tunatyay aṅ hinwisqam God aw qa suhtaqʼewya. Puma God aw qa tuqayvastota; ōviy puma soon put tunatyayat aṅ hinwisni. 8 Nihqe ōviy nāp tunatyay aṅ hinwisqam kurs hin God unaṅwveyani. 9 Noqw pi uma nāp umuhtunatyay qa aṅ hinwist, Hikwsit tunatyayat aṅ hinwisa, kurs God Hikwsiat pas antsa umuhʼunaṅway ep pakiwtaqʼö; noqw kurs Christ Hikwsiat hakiy ep qa pakiwtaqw pay hak qa put sinoatniṅwu. 10 Noqw kurs Christ hakiy ep qatuqw God hakiy qenivo táviṅwu; noqw ōviy hakiy hikwsiat qátuni; noqw pay tokoat qaanhtiput atsviy mokpuni. 11 Noqw kurs put Hikwsiat hakiy ep qatuqw suyan pi pam hin Christ ahoy tātaynaqey pan piw kurs hin hakiy tokoyat mokṅwuqat ahoy qa tātaynani, Hikwsiy hakiy ep qátuhqat ahpiyʼo. 12 Noqw ōviyʼo itupkomu, itam yahpiy haqahpiy nāp itahtunatyay aw qa tūtuwiktu; nihqe ōviy itam itahtokoy tuṅlayiyat qa aṅ hinwisni. 13 Taq hak nāp tunatyay aṅ hinmaqa mokni; nīk̇aṅw hak Hikwsit aṅ nāp tunatyay ayo yuk̇eʼ qátuni. 14 Pi hihsaʼnihqam God Hikwsiyat akw tsāmiwyaqam hapi God tímatu. 15 Pi itam God Hikwsiyat makiwyaqe God timatniwhtoti. Itam qa tūtuwiktniwhtoti. Ura as itam God pas pavan mamqasya, nīk̇aṅw itam puʼ qa pan put mamqasya, nīk̇aṅw Hikwsit aṅ itam Abba, Itanaa, yan God aw hiṅqawwisa. 16 Pi God Hikwsiat itahʼunaṅwpeq itam God timatnihqat itamuy āawna. 17 Noqw kurs itam God timatnen, itam Christ amum sohsok hihta himuyʼvayani, God sohsok hihta itamuy máqaqʼö. Kurs itam Christ amum hihta aṅ k̇ānanvotyeʼ piw put amum k̇aptsiʼtiwyani.
The Future Glory
18 Pi hisat aw pituqw, itam Christ amum k̇aptsiʼtiwyani. Noqw nu it aw wūwaqe hihta ep k̇ānavotqey pay qahihtata. 19 Pi yaṅ sohsoy himu yukiwyuṅqa kwaṅwtoynayak̇ahk̇aṅw God tímuyatuy mātaktotiniqat ōviy maqaptsiʼyuṅwa. 20 Pi yaṅ himu yukiwyuṅqa qa nahpiy nukwsiwhti, pi God ahpiyʼo; noqw pay pam put pasiwnaniqey tunatyawta. 21 Pi yaṅ himu yukiwyuṅqa súlawhtotiṅwu; nīk̇aṅw ason God timat qatsit qasoʼtaqat pas suyan himuyʼvayani. Noqw pahsat pu yaṅ himu yukiwyuṅqa pumuy amumum alöṅtoteʼ pāpu qa súlawhtotini. 22 Pi itam navotiʼyuṅqw yaṅ himu yukiwyuṅqam sumiyank̇aṅw pew pahsavo soñawnen tiylawhqe eykitaqat anta. 23 Noqw itam nuhtum itahʼunaṅwpeq eykik̇ahk̇aṅw hisat itam God tímatnihqey mātaktotiniqey maqaptsiʼwisa, pep puʼ itahtoko alöṅtotini. Pi God itamuṅem pan yúkuhqey mahtaknaniqe ōviy itamumi Qahováriwtaqat Hikwsit noa. 24 Pi itam pan tunatyawk̇ahk̇aṅw ayo nȫṅa; noqw hak hihta tuweʼ pāpu qa put ōviy maqaptsiʼtaṅwu; ispi hak hihta pay tuweʼ ya hinoqw nāto piw put ōviy maqaptsiʼtaṅwu? 25 Nīk̇aṅw itam hihta qa tuwayʼk̇ahk̇aṅw maqaptsiʼyuṅwa; itam pas suyan alöṅtotiniqey navotiʼyuṅqe qa ȫnaiwk̇ahk̇aṅw pay ōviy maqaptsiʼyuṅṅwu. 26 Pu pan hapi ōviy pay piw iʼ Hikwsi itamuy hihta aṅ qa pasiwyuṅqat ep itamumi unaṅwtaviʼta; pi itam as hin hihta ōviy tūviṅlalwaniqey qa tuwiʼyuṅwa; noqw itam kurs hin lavayhtotinik̇ahk̇aṅw itahʼunaṅwpeq eykitaqw Qahováriwtaqa Hikwsi pas nāp itamuṅem God aw okiwhtima. 27 Noqw God uʼnaṅwat aṅ purimaqa Hikwsit wuwniyat navotiʼta, ispi pam God tunatyayat an put sinomuyatuy amuṅem okiwhtima. 28 Noqw itam navotiʼyuṅqw God sinomuy amuṅem sohsok hihta lolmat tumalayʼta, ima hakim put tunatyayat ahpiy wáṅwayniwyaqe put aw unaṅwayʼyuṅqamuy pumuy amuṅemʼi. 29 Noqw God sohsokmuy sinomuy amumi aṅwu pay navotiʼtaqe pumuy namorsta, nihqe puma put Tiyat hin sonʼiwhqat an yukiltotiniqat amuṅem yuku; noqw Christ k̇aysiwhqamuy nānatupkomuy amuṅaqw mohpeqʼa. 30 Pu pam hakimuy aṅwu pay namorstaqe pumuy wáṅwayi, pu hakimuy wáṅwayhqe pumuy qenivo oya, pu pam pumuy qenivo óyahqe puma put Tiyat amum k̇aptsiʼtiwyaniqat tunatyawta.
Godʼs Love in Christ Jesus
31 Noqw itam it ep hiṅqaqwani? Kurs God itamuy paaṅwantaniqw hak sen itamuy áṅwuyʼtani? Kurs hakʼi. 32 Pi God Tiy qa k̇ahk̇awnat sohsokmuy itamuṅem put mokniqat ōviy aṅqw tavi. Nihqe panhtiqe suyan pi pam sohsok hihta itamuy paysoq huytani. 33 Ya hak sen God namorayamuyatuy amumiq hihta tutupni? Pi God pumuy qaanhtipuyamuy ayo yuku. 34 Ya hak sen itamuṅem qalomáyukuni? Sen Christ Jesus panhtini? Pi pam itamuṅem mōki, piw mokiwuy aṅqw ahoy tātayhqe God putvaqe qatu; pam pep itamuṅem lavayiʼma. 35 Christ itamumi unaṅwayʼtaqw ya sen hak put aṅqw itamuy tsīk̇ani? Pas kurs hakʼi. Itam k̇a k̇ānanvotpit akw sóonʼiwyuṅwni, okiwsaniwyani, tsöṅsoiwyuṅwni, yuwsit ṅastayani; hihta nuhtselʼewakw aṅ kuyyuṅwni, sipwuvahpit akw qö́yaniwyani. Nīk̇aṅw itam it aṅ kuhkuyveʼ Christ aṅqw qa ayo tsīk̇aniwyani. 36 Pi ura yan peyʼta: Pi itam uhsinomnihqe ōviy tāwanawit qö́yaniwya; itam púmuyniqw kanelmuy qö́yaniwyaqamuy amunyuṅwa. 37 Itam k̇ānanvotpit aṅ kuhkuyveʼ qa unaṅwsoeʼ hahlayyani, Jesus Christ itamumi unaṅwayʼtaqat navotiʼk̇ahk̇aṅwo. 38 Pi nu pas nātuptsiwnaqw soon himu God aṅqw itamuy ayo tsīk̇ani, sen mokiwu, sen qatsi, sen ōveqatsit aṅqw hoṅviaʼyatu, sen mohpeqyaqamu, sen öqalat pasiwyuṅqamu, sen himu puʼ yaṅ hinyuṅqa, sen himu nātoniqa, 39 Sen ōveqatsit ep yesqamu, sen maskiṅaqw hoṅviaʼyatu. Pi God Jesus Christ Itahtutuyqawhqay aṅ itamumi unaṅwayʼta, noqw ōviy soon himu yukiwhqa put aṅqw itamuy ayo tsīk̇ani.