1 Corinthians

Spiritual Gifts

12 Noqw uma kuwahtiput Hikwsit ahpiynihqat navotiʼyuṅwniqat nu nāwakna. 2 Pay pi uma navotiʼyuṅwa, ura pay uma nāt qatuptsiwniʼyuṅqe aṅ hihtuy nāp yukit qayuaatotaqamuy amuhpaʼ hinnumya, haqeʼ umuhʼunaṅway qatsqat paṅʼa. 3 Noqw ōviy nu umuy māmatsnani, soon hapi hak God Hikwsiyat ahpiy yuaatak̇aṅw Jesus qalomáyukiwtaqat paṅqawni. Pu soon hak Jesus Tutuyqawhqatnihqat paṅqawni, hal pas Qahováriwtaqat Hikwsit ahpiynen-saa. 4 Qahováriwtaqa Hikwsi hīhihta kuwahtiput tūhuytaṅwu; nīk̇aṅw pam pas sūk̇aa. 5 Pu itam nanāp tumalat makiwyaqe, sūkw Tutuyqawhqat eṅem tumalayʼyuṅwa. 6 Itam nanāp hin makiwyaqey pan hihta hintsatsk̇aṅwu. Noqw pay God itamuhpaʼ, itahhintsakpiy sohsok akw nāp tunatyay tumalayʼta. 7 Pi sohsoyam Hikwsit makiwyaqw, pam amuhpe namtaknaṅwu. Noqw put ahpiy itam sohsoyam moṅwvastotini. 8 Pi Hikwsi wuwanlavayit sukwat aw nóaṅwu; pu pay pam Hikwsi piw súannavotit lavayit sukwat aw nóaṅwu. 9 Pu pay pam Hikwsi piw qapēvewnit sukwat aw nóaṅwu; pu pay pam Hikwsi piw sukwat aw tūqalaptsintaniqey öqalat nóaṅwu. 10 Noqw sūk̇a k̇ātutmalat hintsaki; piw sūk̇a God eṅem yuaata; piw sūk̇a hīhihtuy hikwsimuy māmatsṅwu; piw sūk̇a ōṅaqw lavayit yuaata; piw sūk̇a ōṅaqw lavayit namtöknaṅwu. 11 Noqw hapi pay pam Hikwsi īit sohsok hintsaki; hakiy aw hihtawat nóanik panhtiṅwu.

One Body with Many Parts

12 Pay as pi hakiy tokoat sūk̇anik̇aṅw wūhaq aʼwiwayʼtaqw, pu put tokoyat aṅ sohsoy aʼwisa wūhaqnik̇aṅw pay sūk̇a tókoniṅwu. Noqw Christ hapi pan hinta. 13 Pi itam sohsoyam sūkw Hikwsit ahpiy tuvoylatotiqe, soñawnen sūk̇a tókoniwhtoti, sen itam Jew-sínomu, sen qa-Jew-sínomu, sen núantutuwiktu, sen qa tūtuwiktu. Pi itam sohsoyam sūkw Hikwsit makiwya. 14 Pi hakiy tokoat qa sūkw awiwaniṅwu. Pam hapi wūhaqʼa. 15 Noqw ōviy kurs hakiy kukʼat sen kítani: Nu qa māatnihqe ōviy pay nu tokot qa aṅqwvi, kiteʼ, ya pam pay paniqw tokot qa aṅqwvini? 16 Pu kurs hakiy naqvuat sen kítani: Nu qa pōsiatnihqe ōviy nu tokot qa aṅqwvi, kiteʼ, ya pam pay paniqw tokot qa aṅqwvini? 17 Kurs as hakiy tokoat sohsoy pōsiniqw hak hin navotmantani? Pu kurs pam sohsoy naqvusaniqw hak hin hihta hovaikmantani? 18 Noqw pay pi God hin aw wūwaqey pan hakiy tokoyat aṅ aʼwiwayat yukuhtaṅwu. 19 Noqw kurs as puma pay sohsoy sūk̇a awiwasaniqw ya hakiy tokoat háqamni? 20 Nīk̇aṅw pay hapi hak wūhaq aʼwiwayʼk̇aṅw pay sūk̇a tokoyʼtaṅwu. 21 Noqw ōviy soon hakiy pōsiat māyat aw paṅqawni: Nu uṅ qa haqniʼta, kítani. Pu piw soon qötöat kukyat aw paṅqawni: Nu uṅ qa haqniʼta, kítani. 22 Qae, pi hakiy tokoyat aṅ himu suhpan pay öwihinyuṅqa pas soon qeʼyaṅwu. 23 Pi hakiy tokoyat aṅ hahqeʼ itamuyniqw pay hinʼewakwyaqat itamuy pumuy pas k̇aptsiʼyuṅṅwu; pu itamuhpaʼ qasonʼiwyaqat itam pās tunatyawk̇ahk̇aṅw yuwsinaya. 24 Itamhpaʼ sóniwyaqa pi pay qa hihta haqniʼyuṅwa. Pi God hakiy tokoyat namikwaptaqe aṅ haqeʼ hihta qa pasiwyuṅqat aw pas pavan unaṅwtavi, 25 Hakiy tokoyat ep qa haqam nehpewi hintaqat ōviyʼo; noqw aṅ aʼwiwa nāmi unaṅwtaviʼyuṅwni. 26 Noqw kurs himuwa awiwa nātuhotaqw, sohsoyam aʼwiwat put amum nātuhototaṅwu. Pu kurs sūk̇a awiwa k̇aptsitiwhq, sohsoyam aʼwiwat put amum hahlayyaṅwu. 27 Noqw uma hapi sumiyank̇aṅw Christ tokoyat anyuṅwa; nihqe nanāp aṅ aʼwiwatu. 28 Noqw God hapi Jesus aw tōnawtaqamuy amuhpe haqawatuy hihta aṅ oyahta, imuy ayaiwyuṅqamuy mohtii, amúṅk puʼ put eṅem yuaatotaqamuyu, amúṅk puʼ tūtutuqaynayaqamuyu, atsve puʼ k̇ātatayhpit hintsatsk̇aqamuyu, pep puʼ tūqalaptsintotaqamuyu, pu tūvaaṅwantotaqamuyu, pu aṅ moṅwʼiwyuṅqamuyu, pu qa supwat himuhkwa yuaatotaqamuyu. 29 Ya sohsoyam ayaiwyuṅwa? Ya sohsoyam God eṅem yuaatota? Ya sohsoyam tūtutuqaynaya? Ya sohsoyam k̇ātatayhpit hintsatsk̇a? 30 Ya sohsoyam tūqalaptsintotaniqey öqalayʼyuṅwa? Ya sohsoyam ōṅaqw lavayit yuaatota? Ya sohsoyam tuqayʼaʼyatu? 31 Nīk̇aṅw pay uma pas aṅ núnukṅwat kuwahtiput tuṅlayʼyuṅwni. Nīk̇aṅw nu it epnihqe háqeʼwat pas nukṅwat umuy āawnani.