Colossians
1 Nuʼ Paul, God tunatyayat ahpiy Jesus Christ lavayʼayaat it penta. 2 Nuʼ itahtupkoy Timotheus amum ayam Colosset ep God sinomuyatuy, Christ aw tuptsiwniʼyuṅqamuy öqalanta. Nam núokwa, pu kwakwha unaṅwa God Itanay aṅqw umumi pitsíwiwtaa, pu Itahtutuyqawhqay Jesus Christ aṅqʼö.
Prayer of Thanksgiving
3 Itam God Itahtutuyqawhqay Jesus Christ Nayat aw sutsep umuhpe hahlayhtima, yūmosa umuṅem nāwakink̇aṅwo. 4 Kwakwhat pi uma lomayuaatiwya. Yaw uma Christ Jesus qapēvewnayaqe sohsokmuy God sinomuyatuy amumi unaṅwayʼyuṅwa, 5 Itahṅöyiy ōveqatsit ep itamuṅem waraniwtaqat aw-sa taywisk̇ahk̇aṅwo, lomatuawit pas antsanihqat ahpiy put hímunihqat tuwiʼvayaqee. 6 Iʼ lomatuawi suyhtsepṅwat öqawiʼmak̇aṅw ahsupoq tūwaqatsit aṅ kúrukiwmak̇aṅw sopk̇awtaqamuy sinmuy amuhpaʼ aʼnö hihta tumalayʼma. Noqw ura Epaphras mohti umumi lomatuawit, pu God núokwayat yuaataqw, uma put pas antsanihqat tuptsiwyaqe put kwusuya. Noqw pahpiy haqahpiy pam lavayi umuhpaʼ enaṅ tumalayʼta. 7 Epaphras umuy lomatuawit āawnaqat ura nu paṅqawu. Pam hapi aw itahʼunaṅwa itahtumalsuṅwa, Christ eṅem umuhpaʼ tumalayʼk̇aṅw qaatsáʼmak̇aṅwo. 8 Noqw pam hapi itamuy umuy āawna, yaw uma Qahováriwtaqat Hikwsit aṅ nuhtumi unaṅwayʼyuṅwniqata. 9 Paniqw ōviy itam hisat put nanaptaqe pahpiy qa qéʼiwmak̇aṅw umuṅem nāwakinma. Okiw as Qahováriwtaqa Hikwsi navotit, pu suyan unaṅwtalwuwnit umumi noeʼ, God tunatyayat umuy māmatsnani. 10 Okiw as uma Tutuyqawhqat sinomatnihqey pan suan hinwiseʼ aṅ ahsupoq umuhhintsakpiy akw put unaṅwveyani. Okiw as uma lomahintsakpit aṅ qaöwíhinyuṅweʼ suyhtsepṅwat God tuwiʼyuṅqey pas pavan aṅ öqawiʼwisni. 11 Okiw as uma God aʼnö öqalayat akw öqawhtoteʼ, hihta k̇ānanvotpit aw ök̇eʼ nakwhaniʼk̇ahk̇aṅw, hahlayk̇ahk̇aṅw put aṅ kuyyuṅwni, 12 Itanay aw hahlayhtiwisk̇ahk̇aṅwo, it navotiʼyuṅwee: Itam put sinomuyatuy amumum moṅwtunatyayat tālanihqat aw yuṅniqat Itana pan itamuṅem yukiʼta. 13 Pi pam yep qatsit qatālat aw moṅwʼiwtaqat öqalayat aṅqw itamuy ayo óyahqe, pas aw unaṅway Tiy moṅwtunatyayat aw itamuy nahlakna. 14 Ura pam Tiy mokiwuyat akw itahqaanhtipuy ayo yúkuhqe itamuy qenivo oya.
The Person and Work of Christ
15 God Tiat hapi Nay qamātaqpuvenihqat amum súnanta, put tímuyatuy amuṅaqw mohtiʼmaqanihqee, pu piw mohpeqnihqee. 16 Pi put ahpiy God sohsok hihta yuku, ōveqatsit epʼe, piw tūwaqatsit epʼe, mātaqyaqamuyu, pu qamātaqyaqamuyu, sen moṅwyesqamuyu, sen aṅ öqalayʼyuṅqamuyu, sen aṅ mohpeqyaqamuyu, sen pávanyaqamuyu. Sohsoy himu put ahpiy yukiltoti, pu put éṅemʼi. 17 Pam hapi sohsok hihta amupyevee; noqw put öqalayat ahpiy sohsoy himu hūrs hōñi. 18 Put aw tōnawtaqam put tokoyat anyuṅqw, pam qötöamu; ōviy pi pam hapi pumuy pūhuta, mokiwuy aṅqw mohti ahoy tātayhqee. Pam hapi sohsok hihta ep mohpeqʼa. 19 Pi God hin pasiwtaqw pan piw Tiat aṅ ahsupoq put an pasiwta. Pi pam pantaqa Náyat-niqw lomahinta. 20 Pi God Tiy ahpiy sohsok hihta yukiltiqat nāptiniqey tunatyawta, hihta tūwaqatsit epnihqata, pu ōveqatsit epnihqata. Noqw ōviy Tiat nahoylehtsit ep mokq, God itamumi pöhi. 21 Ura as uma hisat qalomáwuwniʼyuṅqe, qalomáhinwisk̇ahk̇aṅw, God aṅqw haqtotiqe put tuwqamatu. 22 Noqw God Tiat tokoyʼvaqe, mokq God umumi pö́hi. Nihqe put akw uma qa hihta akw hink̇ahk̇aṅw, qahováriwk̇ahk̇aṅw, qa hihta ep tukopniwyuṅqw, God umuy nāmi ökinani. 23 Kurs uma qapēvewnit aṅ yūmosa hinwist, hūrsʼiwk̇ahk̇aṅw, qa naṅʼekniʼwiseʼ, lomatuawit ahpiy ṅȫyit uma nanaptaqey aw taywisk̇ahk̇aṅw qa aṅqw lasyeʼ, uma qa hihta akw hink̇ahk̇aṅw put atpip hoṅni. Pam lomatuawi sinmuy sohsovik yesqamuy amumi yuaatiwa. Noqw nuʼ Paul hapi put ep lavayhtaviwa.
Paulʼs Ministry to the Church
24 Noqw nu hapi umuṅem hīhihta aṅ k̇ānanvotqey aṅ hahlayhtima. Pi Christ nāt put aw tōnawtaqamuy, put tokoyat anyuṅqamuy, amuṅem k̇ānanvota. Noqw nu itokoy ep put amum k̇ānanvotniqey ep hahlayi. 25 Pi God put aw tōnawtaqamuy amumi nuy ayataqw, nu pumuy tūwikiamu. Nu umumi put lavayiyat aṅ ahsupoq navotnaniqat aw pam nuy tavi. 26 It hapi nu paṅqawu: Ura God yūpahaqaqw nānaṅk qatsíniwmaqat, pu nānaṅk qatsívaptsiʼwisqamuy amumi it navotit tupk̇a; nīk̇aṅw yepehaq puʼ pam sinomuy amumi put mātakna. 27 Pi God sopk̇awtaqamuy sinmuy amuṅem hihta tunatyawta. Nīk̇aṅw pam tunatyay pas pavan qaöwíhintaqat as hisat tupk̇at, yepehaq sinomuy amumi put mātaktaniqey nāwakna, itʼa: Christ umuhʼunaṅwpeq qatuqw, uma put amum k̇aptsiʼyuṅwni. 28 Put hapi itam tūawinta, sohsokmuy uʼnantoyna; put hin navotiʼtaqey aṅ ahsupoq put tutuqayna. Pas as itam Christ Jesus ep sohsokmuy pās pasiwyuṅqamuy God atpipo ökinaniqey nāwakna. 29 Put ōviy nu aʼnö tumalayʼmak̇aṅw maqsonlawu. Noqw God öqalaat inumum hinmak̇aṅw, inuhpiy aʼnö tumalayʼta.