Colossians
2 Nu umuy it navotnaniqey nāwakna, itupkomu. Pas nu umuṅem inawakinpiy aṅ qa nātusiʼta, pu Laodicea-kitsókit ep tuptsiwniʼyuṅqamuy amuṅemʼi, pu hāhaqeʼ aṅ tuptsiwniʼyuṅqamuy nuy qa tuwiʼyuṅqamuy sohsokmuy amuṅemʼi. 2 Okiw as uma wuhko unaṅwtoteʼ namiʼnaṅwat akw sun unaṅwayʼyuṅwni. Pan hapi uma Itanay God aṅqw navotit as tupkiwtaṅwuqat tuwiʼvayeʼ pās mātsiʼyuṅwni. Pam navoti Christ aṅ tupkiwta. 3 Pi pam hapi God aṅqw suyan unaṅwtalwuwnit, piw navotit qaöwíhintaqat aṅ ahsupoq tuwiʼta. 4 Nu aṅwu pay umuy it āawna; taq k̇a hak kwaṅwálvayit akw umuy ūnatoynani. 5 Pay nu qa umumum yank̇aṅw, yūmosa umuy wūwanta. Kwakwhat pi uma Christ pas antsa tuptsiwniʼyuṅwt, sunk̇ahk̇aṅw, qa nānaphin hinwisa.
Fulness of Life in Christ
6 Uma Itahtutuyqawhqay Jesus Christ aw tuptsiwya. Nihqe ōviy uma put aw yank̇ahk̇aṅw yesni. 7 Uma hin tutuqayyaqey pan qapēvewnit akw Christ hūrs ṅuyʼk̇ahk̇aṅw, öqawhtoteʼ, hūrs hoṅni, sohsok hihta aṅ kwakwhatiwisk̇ahk̇aṅwo. 8 Uma tunatyaltotini; taq nāphisat pi hak wuwantuwiy, pu anʼewakw unatwiy akw umumi tuyqawvani. Pan hinyuṅqam pi pay yep qatsit tunatyayat ahpiy sinmuy tutavoyamuy-sa yuaatota, puma pi Christ navotiyat qa tuwiʼyuṅqee. 9 Pi God hímunihqat Christ aṅ ahsupoq pan hinta, nāmahin pi pam sínoniwhti. 10 Noqw put aṅ uma pās pasiwyuṅwa. Pam hapi aṅ mohpeqyaqamuy, pu aṅ moṅwíʼiwyuṅqamuy amuṅaqw mohpeqʼa. 11 Noqw put amum uma soñawnen poṅotkit akw tuvoylatiwya, qa umuhtokoy epyat, umuhʼunaṅway epʼe, Christ tuvoylayat akw tuvoylatotiqee, pam umuhqaanhqatsiy ayo yúkukqʼö. 12 Noqw uma kūyit akw tuvoylatotiqe, soñawnen Christ amum āmiwyat, ahoy tātayya, uma God öqalay akw mokiwuy aṅqw put ahoy tātaynaqat aw tuptsiwyaqe ōviyʼo. 13 Ura as uma hisat God qa aw tuqayvahsiʼyuṅqe qalomáqatsit aw nānoiʼyuṅqe, soñawnen soʼpumu. Noqw pay God Christ enaṅ umuy yesvana, umuhqaanhtipuy ayo yúkutʼa. 14 Itam pi as God tutavoyat qa k̇aptsiʼtotaqe soñawnen hihta put aw pöiwyuṅwa. Noqw pay pam sohsok itahpöiy súlawhta, Christ itamuṅem nahoylehtsit ep mokqʼö. 15 Pu pan hapi pam aṅ mohpeqyaqamuy, pu qamātaqpuveyaqamuy öqalat pasiwyuṅqamuy kīqötaqe, pumuy áṅwutaqe nuhtumi poñahta. 16 Paniqw hapi ōviy qa hak Jew-sinmuy tutavoyamuy ep umumiq hiṅqawlawni-uma hihta nōnovaqat epʼe, sen hihta hīhikwyaqat epʼe, pu sen hihta aṅ nōviwhqat epʼe, pu sen mūyawuy qātsiptuqat ep nōviwhqat epʼe, pu sen nasuṅwintalöṅnit epʼe. 17 Taq pam pantaqa pay kihsit an hakiy nātoniqat sinmuy amumi tuawiʼta, Christ Jesus hapi. 18 Uma tunatyaltotini; taq k̇a hak umuy ūnatoynaqw, uma umuhʼahsatiy kwayhyani. Taq nāt haqawat paysoq nātsotsk̇anayeʼ, hihta tuawyorikyaqey paṅqaqwani; nen umuy nāqahihtatoteʼ, ōṅaqw hoṅviaʼyamuy amumi nāwakintotaniqat umumi paṅqaqwani. Nīk̇aṅw puma pay nāp wuwniy-sa ahpiy yuaatotani. 19 Puma pi Christ qa aw tōnalti. Pi pam hapi sinomuy qötöyamuy antaqw, puma soñawnen put aw wiwyuṅwa, tathut akw namiwiwyuṅqee. Nihqe Christ aṅqw puma öqalat makiwya; nihqe put aw tōnaltiqe God tunatyayat aṅ wūhakʼiwwisa.
Dying and Living with Christ
20 Uma Christ amum soʼqe yep qatsit tunatyayat aṅqw mātaviwya. Noqw ya uma hinoqw nāt yep qatsit ep sinmuy amún hinwisa? 21 Ya uma hinoqw sinmuy lavayiyamuy aw tunatyawyuṅwa? Itʼa: Uma it qa aw tóṅokyamantani, uma aṅqw qa yukuyamantani, uma qa aw hintsatsk̇ani, yan lavayita? 22 Iiʼ pay sinmuy amuhpiy tutaptiwa. Noqw pay sohsoy nȫsiwhqa itamuṅem yukilti, itam put soswaniqat ōviyʼo. 23 Pay pas antsa pan lavayi sinmuyniqw nāp wuwniewakw hinta. Pi hak panmeʼ nawus pās unaṅway hinmeʼ, nāqahihtateʼ, tokoy tatamhtani. Nīk̇aṅw pam pay kurs hin put akw tuṅlayiy nāp tuyqawiʼtani.