Colossians

4 Noqw uma aṅ tūwikiʼyuṅqamu, uma umuhtutuwikmuy pās oyiʼyuṅwni, it navotiʼyuṅqee, Umuhtutuyqawhqa ōveqatsit ep qátuhqata.

Instructions

2 Uma sohsoyam nāwakinwisqey qa pevewwist, yūmosa tunatyawwisni. Uma yūmosa God aw kwakwhatiwisni. 3 Okiw uma itamuṅem tūviṅtiwisni. Noqw itam haqam yuaaykuniqat God itamuṅem hö́tani; noqw itam Christ tunatyayat as tupkiwtaṅwuqat yuaaykuni; pi nu hapi put ōviy sivilawu. 4 Noqw nu hin yuaayk̇eʼ put pas mātaktaniqey panhtini. 5 Uma aṅ qa tuptsiwniʼyuṅqamuy amumi pās tunatyawk̇ahk̇aṅw hinwisni. Uma qa paysoq hintsatsk̇eʼ, hihta apiiwyuṅwni. 6 Nam umuhlavayi sutsep lolmani. Uma qa nānaphin yuaatotani. Uma hakiy aw ahoy hin lavayhtotiniqey tuwayʼnumyani.

Final Greetings

7 Pay ason Tychicus nuy hin hintaniqat umuy sohsok āawnani. Pam hapi pas aw iunaṅwa itupko, pas qaatsat unaṅwtaviʼtaqa, inumum Tutuyqawhqat eṅem tumalayʼta. 8 Pam itamuy hin hintaniqat umuy navotnaniqat ōviy nu put umumiq hōna, pu umuhʼunaṅway öqawhtaniqat ōviyʼo. 9 Nu piw Onesimus pas qaatsat hinmaqat, pu pas aw itahʼunaṅway itahtupkoy put enaṅ hōna. Pam piw Colosset aṅqw sino. Ason puma yepeq hin hiniwmaqat umuy sohsok āawnani. 10 Iʼ Aristarchus inumum sivilawhqa umuy öqalanta, pu Marcus, it Barnabas tiwʼayaata. Ura pay put hákiyniqw itam umuy āawna. Noqw ōviy kurs put pituqw, uma pās taviyani. 11 Pu iʼ Jesus, Justus piw yan túṅwantiwhqa, umuy öqalanta. Pay íma-sa God tumalayat ep inumum tumalayʼyuṅwa, Jew-sinmuy tuptsiwniʼyuṅqamuy amuṅaqʼö. Kwakwhat pi puma nuy aʼnö unaṅwtoyniʼyuṅwa. 12 Pu Epaphras, umuhkitsokiy aṅqwnihqa umuy öqalanta. Pam sutsep umuṅem nāwakinpit aṅ qa nātusiʼta. Pam umuṅem tūviṅtima, pay okiw uma tukwsiwyeʼ, God tunatyayat pās aw antsanyaniqata. Uma panwiseʼ, hūrs hoṅni. 13 Pi nu put aw navotiʼtaqw, pas pam umuṅem qa nātusiʼta, pu imuy Laodicea-kitsókit epyaqamuy amuṅemi, pu Hierapolis-kitsókit epyaqamuy amuṅem pīwu. 14 Pu pas aw itahʼunaṅwa ṅatwiʼtaqa Luke-niqw, pu Demas puma umuy öqalanta. 15 Uma Laodiceat ep tuptsiwniʼyuṅqamuy öqalayani, pu Nymphas pīwu, pu put kīyat ep tsotsvalyaqamuyu. 16 Pu ason uma it tutuvenit aṅ túṅwayeʼ, pay Laodiceat ep Christ aw tōnawtaqamuy amumi put taviyaqw, puma tuwat put aṅ túṅwayani. Noqw puma tuwat umumi sukw tutuvenit taviyaqw, uma putwat aṅ túṅwayani. 17 Pu uma Archippus aw paṅqaqwani: Um tunatyalteʼ, Tutuyqawhqat eṅem hihta hintsakniqey aw táviwhqey qaatsáyʼmak̇aṅw aw antsanni. 18 Nu Paul hapi nāp imay akw it umuy öqalantaqey pēna. Uma nuy sivilawhqat qa suhtokyani. Nam núokwa umumi pitsíwtaa. Nam antaa.