Colossians
3 Kurs uma pas antsa Christ amum tātayyeʼ, hihta ōveqatsit ep hinyuṅqat tunatyawwisni. Pi pep hapi Christ God putvaqe qatu. 2 Uma hihta ōveyaqat tunatyawyuṅwni, qa tūwaqatsit epyaqata. 3 Pi uma soñawnen Christ amum soʼqe, put amum God aṅqw qatsit makiwya. Noqw qa aw tuptsiwniʼyuṅqam kurs hin put qatsit māmatsyani. 4 Noqw ōviy ason Christ itahʼunaṅwpeq qátuhqa mātaktiqw, pep puʼ uma piw put amum mātaktoteʼ, put amum k̇aptsitiwyuṅwni.
The Old Life and the New
5 Noqw ōviy uma yep qatsit aṅqw tuṅlayit ayo yukuyani. Uma tokot sokoplalwaniqey qeʼyani, pu itséheet qátsita, pu nuvöqatsita, pu qalomátuṅlayita. Uma yep qatsit ep hinyuṅqat qa kwaṅwáyʼtutuswani. Taq hak panmeʼ soñawnen nāp yukiwhput aw nāwakintimaṅwu. 6 Pi put pantaqat atsviy God itsívuat put aw qa tuqayvastotaqamuy amumi pitsíwta. 7 Pay ura uma as hisat pan yēse, uma nāt umuhtunatyay aṅ hinwisqee. 8 Nīk̇aṅw uma puʼ hapi umuhhisathintsakpiy ayo yukuyani. Uma suyʼtsiptotiniqey qeʼyani. Uma qa hihta ep nāk̇ayʼyuṅwmantani; uma qa nukpanʼunaṅwayʼyuṅwni; nānami qalomálvayhtotiniqey qeʼyani; pu tuyoyʼewakw lavayita. 9 Pu uma nānami hihta qa aʼtsalalwani; pi uma umuhhisatqatsiy, hintsakpiyat enaṅ aṅqw ayo lasyaqee. 10 Puʼ hapi uma pūhut qatsit aṅ hinwisk̇ahk̇aṅw, umuy yúkuhqat suyhtsepṅwat pas pavan tuwiʼwisk̇ahk̇aṅw, pam hin hintaqw, uma pan alöṅtiwisni. 11 Pi put sinomuyatuy amuṅaqw hak hímuniqw pay pam qa hímuu-sen hak Greek-sino, sen Scythian-sino, sen Jew-sino, sen qa-Jew-sino; sen hak poṅotkit akw tuvoylaiwta, sen qa pan tuvoylaiwta, sen tūwiki, sen pay qa tūwiki. Hak Christ aw tuptsiwniʼtaniqw pam hapi pas hímuu. Pi Christ sohsokmuy put aw tuptsiwniʼyuṅqamuy unaṅwayamuy ep qatu. 12 Noqw ōviyʼo, uma God sinomat namorstiwyuṅqamu, pas aw unaṅwamatu, uma yan hinwisni: Uma núokwat wuwniʼyuṅwni; nāvāsyani, okiwʼunaṅwayʼk̇ahk̇aṅw qa kwiviunaṅwayʼyuṅwni; hakiy aw wuhko maqaptsiʼyuṅwni. 13 Uma nēnehpewi hihta aṅ kuyyuṅwni; pu namivöhikiwyuṅwni, sen haqawa hihta ep hakiy ehpewi hinhtiniqʼö. Christ hin umumi pö́hikqat uma pan hinwisni. 14 It yantaqat ep uma pas pavan tis nānami unaṅwayʼyuṅwni. Pi lomahintsakpi namiʼnaṅwat akw namiwiwyuṅwa. 15 Nam God aṅqw kwakwha unaṅwa umuhʼunaṅwpeq tuyqawvani; pi uma kwakwhat qatsit aw wáṅwayniwya. Uma sumiyank̇ahk̇aṅw Christ tokoyat anyuṅweʼ qa hihta akw nānami hinyuṅwniqey ōviyʼo. Pu uma tsúyakiwyuṅwni. 16 Uma Christ lavayiyat umuhʼunaṅwpeq panayeʼ, pas pavan unaṅwtalwuwniʼvayani. Uma nātutuqaynayak̇ahk̇aṅw, nāökwhantotani. Uma God lavayiyat nānami yuaatotani, pu tātawit God tawsomiʼtaqata, pu unaṅwvahsit tātawita. Uma hahlayk̇ahk̇aṅw Tutuyqawhqat tayawintiwisni. 17 Uma Itahtutuyqawhqay Jesus aw yank̇ahk̇aṅw, ahsupoq umuhqatsiy aṅ hinwisni, sen uma yuaatotaniqeyu, sen tumalayʼyuṅwniqeyu. Uma sohsok hihta put eṅem hintsatsk̇amantani. Uma put aw yank̇ahk̇aṅw, yūmosa Itanay God aw kwakwhatiwisni.
Personal Relations in the New Life
18 Uma momoyamu, uma umuhpuwsuṅwmuy amumi tūqayk̇ahk̇aṅw yesni; pi pan hapi Tutuyqawhqa umuṅem tunatyawta. 19 Pu uma tahtaqtu, uma umuhnömamuy amumi unaṅwayʼyuṅwt, pumuy qa qöhqöylalwani. 20 Tsātsayomu, uma umunamuy, umuṅumuy amumi sohsok hihta aṅ tūqayyuṅwni. Uma panwiseʼ, Tutuyqawhqat unaṅwveyani. 21 Pu uma námatu, uma umuhtimuy qa itsívulalwani, taq amumi k̇a puhtsekmokyani. 22 Pu uma aṅ tūtuwiktu, uma yep qatsit ep umuhmomṅwituy amumi sohsok hihta aṅ tūqayyuṅwni. Qa pas umuhmomṅwituy umumi tayyuṅqw, pahsat uma qa nātusiʼk̇ahk̇aṅw tumalayʼyuṅwni. Uma yūmosa pan tumalayʼwisni. Uma qa atsáyʼwisk̇ahk̇anw, Tutuyqawhqat k̇aptsiʼk̇ahk̇aṅw, pan tumalayʼyuṅwni. 23 Pu uma hihta hintsatsk̇eʼ uma qa nātusiʼk̇ahk̇aṅw, tumalayʼyuṅwni, Tutuyqawhqat eṅem tumalayʼyuṅqey pan tunatyawk̇ahk̇aṅwo, qa sinmuy amuṅemi. 24 Pi uma it navotiʼyuṅwa: Uma Tutuyqawhqat Christ eṅem tumalayʼyuṅwa. Noqw pam umuy hihta awiniʼtaqey umumi sisvini. 25 Noqw pay ason hihta qaantsakqa hapi put ep pay piw panwat aw ahoytiwmantani. Pi God qa sinonuiña.