1 John
Christ Our Helper
2 Itimhohyamu, uma hapi qa haqam qaanhtotiniqat ōviy nu umumi yan penta. Noqw sen haqawa qaanhtiqw, pay Jesus Christ, pas sūk̇a súantaqa, itamuṅem Itanay aw lavayiʼma. 2 Pu pam itahqaanhtipuy ep mokqe, itamuy Nay enaṅ namivöhikna. Pu pam qa itahqaanhtipuy-sa ep mōki, pas hapi sohsokmuy qaanhtipuyamuy epʼe. 3 Noqw itam put tutavoyat aṅ hiwisqey akw put tuwiʼyuṅqey navotiʼyuṅwa. 4 Hak haqam put tuwiʼtaqey lalvayk̇aṅw put tutavoyat qa aṅ hinmeʼ hapi átsani. Noqw himu pas antsanihqa put hapi ep súlawni. 5 Nīk̇aṅw kurs hak haqam put lavayiyat aṅ hinmaqa pam hapi pas antsa God aw unaṅwayʼtani. It hapi yantaqat akw itam God aṅ yesqey navotiʼyuṅwa. 6 Iʼ hak Tiyat amum hinnumqey paṅqawlawhqa pas put hinmaqw soon piw qa pan hinmani.
The New Command
7 Itupkomu, pay hapi nu qa hihta pas pūhut tutavot umumi penta, nīk̇aṅw pay hisattutavota. Ura uma yayhniwhqat aṅqaqw put oyiʼyuṅwa. Noqw uma yayhniwhqat aṅqaqw lavayit nanvotyaqw, pam hapi hisattutavo. 8 Nīk̇aṅw puʼ piw nāt nu pas pūhut tutavot umumi penta; ispi qatāla ayo ruhpakqʼö; noqw tāla pas antsanihqa puʼ tāla. Noqw pam tutavo Tiyat qatsíyat akw aw antsaniwa, pu umuhqatsiy akw pīwu. 9 Iʼ hak tālat aṅ hinmaqey paṅqawk̇aṅw sinosṅway aw qa suhtaqʼewnihqa hapi nāt qatālat aṅ hinma. 10 Iʼ hak sinosṅway aw unaṅwayʼtaqa hapi tālat aṅ hinma; nihqe sinmuy qa unaṅwmoknani. 11 Pu iʼ hak sinosṅway qa aw suhtaqʼewnihqa hapi qatālat aṅ hinma; nihqe qatalpuva hinmak̇aṅw, haqami hoyoyotaqey qa navotiʼnuma, pi qatāla put pōsiyat qatālawnaqʼö. 12 Nu hapi umumi penta tsatsáyhohyamu, God Tiy tuṅwniyat aw umuy túṅwantaqe, umuhqaanhtipuy umuhpiy ayo yúkuqw ōviyʼo. 13 Nu umumi penta námatu, uma put hakiy yayhniwhqat aṅqaqwnihqat tuwiʼyuṅqw ōviyʼo. Nu umumi penta tōtimu, uma it hakiy qalolmat áṅwutotaqw ōviyʼo. Nu umumi penta tsatsáyhohyamu, uma Itanay tuwiʼyuṅqw ōviyʼo. 14 Nu umumi pēna námatu, uma put hakiy yayhniwhqat aṅqaqwnihqat tuwiʼyuṅqw ōviyʼo. Nu umumi pēna tōtimu, uma hóhoṅvitniqw ōviyʼo, pu God lavayiat umuhpe huruiwtaqʼö. Nihqe uma it hakiy qalolmat áṅwutota. 15 Uma yep qatsit tunatyayat qa kwaṅwátayyuṅwni, piw ep hihta hinyuṅqata. Kurs haqawa yep qatsit tunatyayat hahlayeʼ pam Itanay qa aw unaṅwayʼtani. 16 Pi íi himu sohsoy yep qatsit ahpiyʼo: itahtokoy ahpiy tuṅlayi, pu itahposiy ahpiyʼo, pu kwiviʼnaṅwat ahpiyʼo. Pam qa Itanay ahpiynit, yep qatsit ahpiyʼo. 17 Noqw yep qatsi hapi tūwayato, pu put ep himu tuṅlayi. Nīk̇aṅw iʼ hapi God tunatyayat aṅ hinmaqa pas sútsepni.
The Enemy of Christ
18 Itimhohyamu, soʼṅwamiq hapi pitsíwta. Noqw ura hak Christ ehpewʼiwtaqa pítuniqat uma nanaptaqw, pay hapi k̇aysiwhqam Christ ehpewyaqam puʼ pay yēse. Noqw it yantaqat hapi akw itam soʼṅwamiq pitsíwtaqat mātsiʼyuṅwa. 19 Puma as itamuhpiy aṅqeʼ nankwusak̇aṅw pay puma qa itamum tōnawta. Pi as puma itamum tōnawteʼ, soon as k̇a qa itamum yūmosa hinwisni. Pay qa sohsoyam itamumyaqey mātaktotiniqey ōviy panhtoti. 20 Noqw pay uma hapi hakiy Qahováriwtaqat akw tuvoylatoti. Nihqe uma sohsok hihta navotiʼyuṅwa. 21 Pay uma hihta pas antsanihqat qa navotiʼyuṅqat nu qa panwat umumi pēna, pi uma put navotiʼyuṅqw ōviyʼo. Pu qa haqam himu atsa it pas qaatsat ahpiynihqat uma navotiʼyuṅwa. 22 Noqw ya hak átsani? Iʼ hak Jesus qa Moṅwʼasiʼtaqat paṅqawlawhqa. Iʼ hak Nayat-nik̇aṅw pu Tiyat pumuy ayo yuykuqa hapi Christ ehpewnihqa. 23 Hak hapi haqam Tiyat ayo yuykuqa pay Nayat qa tuwiʼta. Nīk̇aṅw iʼ hak God Tiyat Moṅwʼasiʼtaqat paṅqawhqa hapi Nayat tuwiʼta. 24 Noqw ōviy hapi uma yayhniwhqat aṅqaqw hihta nanaptaqey aw tunatyawwisni. Kurs uma aṅ ahsupoq put aṅ hinwiseʼ, pay uma soon piw Tiyat ep qa yūmosa hinwisni, pu Nayat epʼe. 25 Noqw yan hapi pam itamuy āawna: Itamuy qatsit qasoʼtaqat máqaniqeyu. 26 Nu umuy qa súaqwat lahsintotaqamuy lavayhtiqey umumiq yan pēna. 27 Nīk̇aṅw pay uma Itanay ahpiy Qahováriwtaqat Hikwsit akw tuvoylatiwyaqw, pam umuʼnaṅwpeq qatu. Noqw soon pas hak piw umuy hihta tutuqaynani. Pi Hikwsi hapi umuy sohsok hihta tutuqayna. Pam hapi pas antsaa, pu pas qaatsa; nihqe hin pas umuy tutuqaynaqw pan uma put ep hinwisni. 28 Noqw taa ítimhohyamu, uma Tiyat ep huruiwyuṅwni. Noqw hisat pam mātaktiqw, itam qa ókiwyani; nen put pituqw, itam qa hihta ep hamanhtotini. 29 Uma put súantaqat pan aw navotiʼyuṅwa. Noqw ōviy suyan hapi hak suan hinmaqa God tíyatnihqat uma navotiʼyuṅwa.