1 John
Children of God
3 Meh, kurs huvam aw wūwayaa: Itana pas pavan itamumi unaṅwayʼta! Oviy pi itam God timatnihqey pan túṅwantiwya. Paniqw hapi ōviy yep qatsit tunatyayat hinwisqam itamuy qa tuwiʼyuṅwa, puma put Tiyat qa tuwiʼyuṅqe ōviyʼo. 2 Aw iunaṅwamu, puʼ hapi itam God tímatu. Noqw itam hin yukiltotiniqw pam pantaqa pay nāt qa mātakti. Nīk̇aṅw ason hisat Tiat mātaktiqw itam put anyuṅwniqey navotiʼyuṅwa; ispi itam put hin hintaqat aw yórikyaniqee. 3 Noqw haqam it yantaqat unaṅwvahsit ṅöyiʼtaqa nākwaṅwʼewakwlawṅwu, pas pam hin kwaṅwʼewakwnihqat panʼi. 4 Qaanhtiput hintsakqa piw tutavot ehpewi hintsakṅwu; pi qaanhtipu tutavot ehpewi hintsatskiwhqa. 5 Noqw uma navotiʼyuṅqw, ura God Tiat itahqaanhtipuy ayo yúkuniqe ōviy mātakti. Noqw qaanhtipu put ep súlawu. 6 Noqw put ep huruiwtaqa hapi qaanhtiput aṅ qa hinma. Qaanhinmaqa hapi put aw qa yórikiʼta; piw qa tuwiʼta. 7 Itimhohyamu, qa hak hapi umuy ūnatoynani. Suan hinmaqa hapi súantaṅwu, God Tiat suan hintaqat panʼi. 8 Qaanhinmaqa hapi Nukpanat aṅqwniṅwu. Pi Nukpana yayhniwhqat aṅqaqw qaanhinma. Noqw God Tiat Nukpanat tutmalayat símoknaniqe ōviy mātakti. 9 God aṅqw tihtiwhqa qaanhtiput aṅ qa hinma, pi God tunatyaat put apqölpeniṅwuniqw ōviyʼo. Pu soon pam hihta ep qaanhtiṅwu, pi pam God aṅqw tihtiwṅwunihqee. 10 Yantaqat hapi akw God timat mātakya, pu Nukpanat tímatu: Súantaqat qa hintsakqa hapi qa God aṅqwniṅwu, pu iʼ hak sinosṅway aw qa unaṅwayʼtaqa pīwu.
Love One Another
11 Pi ura uma yayhniwhqat aṅqaqw it hapi yan tūawit aw tūqayyuṅwa: Itam nānami unaṅwayʼyuṅwniqata; 12 Ura iʼ hak Cain Nukpanat ahpiynihqe tupkoy nīnaqat qa panhtotini. Noqw ya hinoqw pam put nīna? Ispi put tumalaat qalolmaniqʼö, noqw tupkoyat tumalaat súanta. 13 Pay uma qa pas pas hin wūwantotani, itupkomu, kurs yep qatsit tunatyayat hinwisqam umumi qa suhtaqʼewyaqʼö. 14 Itam hapi mokiwuy aṅqw qatsit aw nöṅakqey navotiʼyuṅwa, ōviy pi itam itahsinosṅwamuy amumi unaṅwayʼyuṅwa. Nohtumi qa unaṅwayʼtaqa hapi mokiwuy ep hinnuma. 15 Sinosṅway aw qa suhtaqʼewnihqa hapi sinmuy qöyantaqaniṅwu. Noqw uma navotiʼyuṅqw qa hak tuqwyantaqa qatsit qasoʼtaqat pasiwta. 16 Pi God Tiat itamuṅem qatsiy tavi. Put pantaqat akw God itamumi unaṅwayʼtaqat itam māmatsya. Noqw soon as itam tuwat itahqatsiy qa itahsinomuy amuṅem oʼyaniqey suhtaqʼewyani. 17 Noqw sen haqawa yep qatsiy ep hihta hímuyʼtiwhqat himuyʼk̇aṅw, sinosṅway hihta haqniʼtaqw, tuwayʼk̇aṅw put qa ōkwatuweʼ, ya sen hin pam God aṅqw nuhtumi unaṅwayʼtaniqey tuwiʼvaqey paṅqawni? 18 Itimhohyamu, itam qa itahlavayiy-sa akw nānami unaṅwayʼyuṅwni, piw itahleñiy akwʼa. Itam qa panyuṅwt, itahhintsakpiy akw pas antsa panyuṅwni.
Courage before God
19 Pu it hapi akw itam pas antsa God tímatnihqey navotiʼyuṅwni; nihqe qa hin unaṅwayʼk̇ahk̇aṅw put aw ökiwtani. 20 Ispi kurs pay itahʼunaṅwa itamuy sóontsaniʼtaniqw, tis pi God itahʼunaṅwa epnihqe pas sohsok hihta navotiʼta. 21 Aw iunaṅwamu, kurs itahʼunaṅwa itamuy qa sóontsaniʼtaniqw pep hapi puʼ itam God aw qa ókiwyani. 22 Pu itam hihta ōviy tūviṅtoteʼ put aṅqw put ömahtotamantani, ispi itam put tutavoyat aṅ hinwisqee, nihqe put tayawintiwisa. 23 Noqw yan hapi pam tutapta: Itam put Tiyat Jesus Christ aw tūtuptsiweʼ, nānami unaṅwayʼyuṅqwniqata. 24 Noqw iʼ hak God tutavoyat aṅ hinmaqa hapi put ep qátuni; noqw God put ep qátuni. Noqw pam itamuy Hikwsit máqahqat akw itam put itamuhpe huruiwtaqat navotiʼyuṅwa.