Eeksotus

4 Awer Mooses hot keantwort: “Awer, wole mer saan tas se net aan mich klaape un tuun net mayn xtim heere, wayl tii saan: ‘Yeehoowa is net fer tich tsum foer xayn khom.’” 2 Yeehoowa hot tan tëm kefroot: “Was is tas in tayn hant?” Tee hot keantwort: “Eene xtok.” 3 Tee hot iim kesaat: “Xmays tas ufm pootem.” Soo hot eyer te xtok ufm pootem kexmis, un tas is een xlang kep, un Mooses is fon tii aus keris. 4 Yeehoowa hot tan fer Mooses kesaat: “Xtrek tayn hant aus un hool se aan te xwants.” Tee hot sayn hant aus kextrekt un hot se kehool, un tii is een xtok in sayn hant kep. 5 Kot hot tan kesaat: “Tas is fer tii se klaape tas Yeehoowa, te Kot fon tëne sayne foerkhomer, te Kot fon Apraham, te Kot fon Isak un te Kot fon Yaakop, fer tich tsum foer xayn khom is.” 6 Yeehoowa hot iim noch mool kesaat: “Pite, tuu tayn hant unich tayn tsaych, aan te prust.” Soo, hot eyer ti hant unich tas tsaych aan te prust ketuun. Wii eyer ti hant raus ketuun hot, hat se lëpra kriit, ways wii te xnee. 7 Tan hot eyer kesaat: “Tuu ti hant tsurik unich tayn tsaych, aan te prust.” Tee hot ti hant unich tas tsaych aan te prust tsurik ketuun. Wii eyer tii raus ketuun hot, waar ti hant noch mool kesunt, soo wii sayn kanse khërper! 8 Tee hot kesaat: “Wën se net aan tich klaape un aach net acht fer tas eyerste sinaal kepe, sicher tuun se acht kepe aan tëm tsweete sinaal. 9 Awer, aach wën se net aan tiise tswaay sinaale klaape un wole net tayn xtim heere, tuust tuu pisye waser fom Nilo flus hoole un tuust tuu in tëm trokne lant aus xite, un tas waser woos tuu fom Nilo hoolst, wërt in pluut in tëm trokne lant kepe.” 10 Mooses hot tan fer Yeehoowa kesaat: “Entxultich mich Yeehoowa, awer waar nii laycht fer mich se xpreche, in te ferkangne tsayt un aach net tsayt tas tuu mit tayn tiiner kexproch host, wayl fer mich is xweyer se xpreche un mayn tsung is lamsam.” 11 Yeehoowa hot iim kesaat: “Weer hot ti munt fer te mënx kep? Weer macht tas tee net xpreche orer heere khan, kuut siin orer plint sin? Sin net ich, Yeehoowa? 12 Tes weeche, kee yets, un ich wëre mit tich sin wëns tuu xpreche must, un ich tuun tich in lërne was tuu saan solst.” 13 Awer tee hot kesaat: “Entxultich mich Yeehoowa, xik, pite, yemant anere woos tuu wilst.” 14 Tan is Yeehoowa sayn wuut iwer Mooses khom, un tee hot kesaat: “Un tayne pruuter Aron, te lewiiter? Ich wees tas eyer aarich kuut xprecht. Un tee is yets am khome fer tich aan trefe. Wën eyer tich siit, tuut tëm sayn hërts sich fraye. 15 Tes weeche, xprech mit tëm un tuu fer tëm mayne wërter fertseele; un wën teyer xprecht, ich wëre mit aych sin un ich tuun aych in lërne was teyer mache solt. 16 Tee tuut in tayn plats mit tëm folek xpreche; tee wërt tayn representant sin, un tuu tuust wii Kot fer tëm tiine. 17 Un tuu tuust tiise xtok in te hant hoole un ti sinaale mit tëm mache.” 19 Nochter hot Yeehoowa fer Mooses in Mityan kesaat: “Kee, kee tsurik tsu Ejipt, wayl ale mëner woo fersuucht hon tich um se pringe, toot sin.” 24 Im weech, in tëm plats woo se am ruue waare, hot Yeehoowa tëm aan ketrof un wolt tee um pringe. 25 Tsum xlus, hot Siipora een xarf xteen kehool un hot sayn soon pexnit. Tan hot se kemacht tas ti haut woo se pexnit hat uf tëm sayn fiis wiiter khome teet, un hot kesaat: “Es is wayls tuu eene man fon pluut fer mich pist.” 26 Soo, hot Eyer tëm keen kelos. Tii hot “man fon pluut” kesaat weeche ti pexnaytung. 29 Noo heyer, sin Mooses un Aron hin kang un hon ti kanse elteste fon te israeliiter kesamelt. 30 Aron hot fer tëne al ti wërter kesaat woo Yeehoowa fer Mooses kesaat hat, un eyer hot ti tsayche foer tas folek kemacht. 31 Tes weeche, hot tas folek keklaapt. Wii se keheert hon tas Yeehoowa noch mool acht aan ti israeliiter kehal hot un sayn unertrikung kesiin, hon se sich kepikt un sich pis uf te pootem kepoo.